Rhagoriaeth mewn addysgu

Mae ein haddysgu’n cael ei harwain gan ymchwil a’i yrru gan arfer

Fframwaith Rhagoriaeth Addysgu a Chanlyniadau Myfyrwyr Llywodraeth y DU (TEF)

Mae'r Fframwaith Rhagoriaeth Addysgu a Chanlyniadau Myfyrwyr (TEF) yn cydnabod addysgu rhagorol ymhlith darparwyr addysg uwch y DU trwy eu sgorio fel aur, arian neu efydd. Mae'r canlyniadau’n helpu darpar fyfyrwyr i ddewis lle i astudio.

Datganiad o ganfyddiadau

Adolygodd Panel y Fframwaith Rhagoriaeth Addysgu fetrigau a chyflwyniad y darparwr yn unol â'r broses a'r meini prawf a bennir yng nghanllawiau'r Fframwaith.

Dangosodd metrigau'r darparwr, wedi'u hategu gan y cyflwyniad, fod myfyrwyr o bob math o gefndir yn cyflawni canlyniadau rhagorol yn gyson. Yn benodol, nododd y Panel fod y cyfraddau symud ymlaen i gyflogaeth fedrus iawn neu astudiaethau pellach, a boddhad myfyrwyr â chymorth academaidd i fyfyrwyr amser llawn, uwchlaw meincnod y darparwr. Mae'r cyfraddau parhad a boddhad myfyrwyr o ran addysgu ac asesu ac adborth yn gyson â meincnod y darparwr.

Bu'r Panel yn ystyried cyflwyniad a metrigau ategol y darparwr, lle bo'n briodol, mewn perthynas â meini prawf y Fframwaith ac mae ei farn yn adlewyrchu tystiolaeth, yn benodol, o:

strategaeth cyflogadwyedd glir â lefelau uchel iawn o ymgysylltu â chyflogwyr a chyrff proffesiynol
cynllun cyrsiau ac arferion asesu sy'n rhoi cyfleoedd dysgu difyr i fyfyrwyr, gan arwain at fyfyrwyr yn magu gwybodaeth, sgiliau a dealltwriaeth y mae cyflogwyr yn eu gwerthfawrogi fwyaf
cymorth o ansawdd uchel, wedi'i bersonoli, ar gyfer dysgu myfyrwyr, gan gynnwys cyfleoedd drwy gyfrwng y Gymraeg a gofal bugeiliol
cryfder ac amrywiaeth partneriaethau rhwng staff a myfyrwyr
ymagwedd draws-ddisgyblaethol at ymchwil effeithiol sy'n arwain y ffordd yn fyd-eang yn dylanwadu ar ddysgu ac addysgu
diwylliant cryf o wobrwyo a chydnabod addysgu ac integreiddio ag ymchwil ac ysgolheictod
adnoddau ffisegol a digidol neilltuol, â lefelau uchel o fuddsoddi i wella dysgu myfyrwyr.

Yn gyffredinol, roedd y Panel o'r farn bod y cyfuniad o dystiolaeth ym metrigau'r darparwr a chyflwyniad y darparwr yn cydweddu orau â'r disgrifydd ar gyfer gwobr Aur.

Aseswyd ein haddysgu israddedig ar sail meini prawf sy'n berthnasol i feysydd ansawdd addysgu, amgylchedd dysgu a deilliannau a chynnydd dysgu myfyrwyr.

Bu Panel y Fframwaith Rhagoriaeth Addysgu'n pwyso ac yn mesur tystiolaeth o gyfres o fetrigau, gan ddefnyddio data cenedlaethol, yn ogystal â thystiolaeth ysgrifenedig a gyflwynwyd gan y darparwr.

Roedd y metrigau'n ymwneud â chyfraddau parhad, boddhad myfyrwyr a chanlyniadau cyflogaeth (cyflogaeth a/neu astudiaethau pellach). Cafodd metrigau pob darparwr eu meincnodi i gyfrif am

wahaniaeth yn nodweddion a chymwysterau ei fyfyrwyr, ynghyd â'r pynciau roeddent yn eu hastudio.

Dyfarnwyd y gwobrau gan banel o arbenigwyr annibynnol y Fframwaith Rhagoriaeth Addysgu, yn eu plith, academyddion, myfyrwyr a chynrychiolwyr cyflogwyr.

Gwnaed y dyfarniad hwn ym mis Mehefin 2018 ac mae'n ddilys am hyd at dair blynedd.

Ceir rhagor o wybodaeth yma am y Fframwaith Rhagoriaeth Addysgu.

Lawrllwythwch Strategaeth Dysgu ac Addysgu Prifysgol Abertawe

"Mae Abertawe yn cynnig profiad unigryw i fyfyrwyr; mynediad at ymchwil o’r radd flaenaf yn fyd-eang, ymgysylltu â chyflogwyr rhyngwladol mawr, a chael profiad o addysg gan addysgwyr gwych." Yr Athro Martin Stringer, Dirprwy Is-Ganghellor

Cynnig Darparwr TEF Blwyddyn Tri

Llun o Gampws y Bae Prifysgol Abertawe yn yr heulwen

Lawrllwythwch Strategaeth Dysgu ac Addysgu Prifysgol Abertawe

Llun o adeilad stablau Abaty Singleton gyda myfyrwyr yn cerdded o'i flaen

Cefndir

Rhagoriaeth Addysgu yn Abertawe

Prifysgol Abertawe yw un o'r pedwar sefydliad yn y DU sy'n cael ei gydnabod am ei ragoriaeth ymchwil ac addysgu. Rydym yn sefydliad uchelgeisiol, yn y 30 uchaf, sy'n rhoi pwyslais ar ymchwil, ac yn cynnig amgylchedd academaidd a chytbwys rhagorol sy'n galluogi myfyrwyr a staff i ragori. Mae ein hymrwymiad at amrywiaeth, ar y cyd â'n gallu i dderbyn myfyrwyr sydd â thariffau mynediad isel, yn ogystal â chyflawni lefelau cyflogadwyedd graddedigion sy'n arwain y sector, yn dangos pa mor werthfawr yw profiad cyfoethog y myfyrwyr ac ansawdd yr addysgu. Mae Abertawe'n gyson yn cyrraedd yr 20 uchaf yn y DU am gyflogadwyedd graddedigion/astudiaethau pellach, yn ogystal â'r 15 uchaf am fodlonrwydd cyffredinol myfyrwyr, sy'n dystiolaeth o hyn (Guardian University Guide 2019). Rydym yn ymrwymedig i weithio gyda myfyrwyr i wella profiad y myfyrwyr, creu amgylchedd o onestrwydd a pharodrwydd i gynnwys myfyrwyr er budd pawb. Mae staff yn Abertawe wedi ymrwymo i ddatblygu'n broffesiynol, cynnig dysgu arloesol, ysbrydoledig a thrawsnewidiol sydd ar flaen y gad o ran gweithgareddau addysgu. Mae'r Brifysgol yn un o sefydliadau addysg uwch blaenllaw y DU am gynnydd dysgu, ac mae cyflogaeth graddedigion wrth wraidd ein darpariaeth. Rydym yn ymroddedig i ymgysylltu ag ystod eang o fyfyrwyr ac yn ymfalchïo yn ein gallu i ysbrydoli a chefnogi'r holl fyfyrwyr i gyflawni canlyniadau cadarnhaol sy'n rhagori ar safonau'r sector.

Cyd-destun y DU

Gallwch gael rhagor o wybodaeth am addysg uwch yng Nghymru ar wefan Cyngor Cyllido Addysg Uwch Cymru.

Gallwch gael rhagor o wybodaeth am y Fframwaith Rhagoriaeth Addysgu a'r rhesymeg sydd y tu cefn iddo drwy fynd i wefan y Cyngor Cyllido Addysg Uwch yn Lloegr.

Beth sy’n digwydd nesaf:

Ar hyn o bryd rydym yn rhan o ddwy brif raglen newid sydd wedi'u hanelu at wella eich rhagoriaeth addysgu ymhellach:

Mae Camu i Ragoriaeth yn canolbwyntio ar weithio'n agos gyda'n myfyrwyr i ymgorffori gwaith ar y cyd a gwella profiad y myfyrwyr.
Mae Mynd y tu hwnt i Ddisgwyliadau'n canolbwyntio ar gynnal adolygiad o'n cwricwlwm ar draws y campws, a'r nod yw ymgorffori arfer gorau a gwella cyflogadwyedd.

Bydd y ddau brosiect hyn yn parhau i weithio tuag at wella a datblygu'r hyn sy'n cael ei gynnig yma yn Abertawe.

Mae'r Brifysgol hefyd yn paratoi i gymryd rhan ym mhroses nesaf y Fframwaith Rhagoriaeth Addysgu. Bydd TEF 2019/20 yn canolbwyntio ar feysydd pwnc, ac rydym yn cymryd rhan yn y profion ar lefel pwnc ar hyn o bryd, gan weithio gyda'r Swyddfa Myfyrwyr i helpu i lywio dyfodol TEF.