Cyfleoedd Interniaeth i Fyfyrwyr

Wyt ti'n fyfyriwr israddedig neu ôl-raddedig ym Mhrifysgol Abertawe a hoffai fod yn rhan o'n tîm?

Mae'r Sefydliad Diwylliannol yn meithrin partneriaethau â sefydliadau celfyddydol a diwylliannol, yn ogystal â'r diwydiant cyhoeddi.

Mae ein prosiectau allweddol yn cynnwys Gwobr Ryngwladol Dylan Thomas, y wobr lenyddiaeth fwyaf yn y byd ar gyfer llenorion ifanc, i gyfres salon llenyddol sy'n cynnwys rhai o'r ysgrifenwyr mwyaf cyffrous o Gymru a'r tu hwnt, cymryd rhan yn Being Human, sef unig Ŵyl y Dyniaethau genedlaethol yn y DU a rhaglen addysgol helaeth ar gyfer ysgolion a cholegau o'r enw 'DylanED'.

Rydym yn gweithio gyda phartneriaid megis Amnesty International UK, Achub y Plant, Ymddiriedolaeth Rhys Davies, British Council Cymru a Gŵyl y Gelli.

Eisiau rhagor o wybodaeth? Llenwch y ffurflen hon a byddwn yn cysylltu â chi!

*CYFLEOEDD DIWEDDARAF*
'Words that Burn' - Cyfleoedd am interniaethau â thâl ar gyfer myfyrwyr ôl-raddedig o Brifysgol Abertawe mewn Llenyddiaeth Saesneg ac Ysgrifennu Creadigol.

Mae prosiect ‘Words that Burn’ yn fenter gyffrous sy'n canolbwyntio ar addysg Hawliau Dynol ar gyfer disgyblion Cyfnod Allweddol 3. Mae'r fenter, a arweinir gan Dr Elaine Canning o Sefydliad Diwylliannol Prifysgol Abertawe, yn rhan o raglen fawr o weithgareddau allgymorth DylanED sydd wedi cael ei hariannu drwy gyllid hael gan Ymddiriedolaeth Rhys Davies mewn cydweithrediad ag Amnesty International UK (AIUK). Nod y prosiect yw grymuso pobl ifanc i ddysgu am hawliau dynol a theimlo eu bod wedi'u gwerthfawrogi fel beirdd a gwneuthurwyr newid.

MWY O WYBODAETH A SUT I WNEUD CAIS: 'Words that Burn'

Tystebau

Luke Blake

Ymgollais i'n llwyr yn interniaeth y Sefydliad Diwylliannol yn ystod Gŵyl Llenyddiaeth Plant 2023 ac rwyf heb edrych yn ôl! Roedd yn brofiad anhygoel a sylweddolais i fy mod i wedi dod o hyd i'm galwedigaeth ddelfrydol. Roedd y gwaith yn wobrwyol, yn ddiddorol ac yn llawn ysbrydoliaeth a (gan amlaf), doedd dim rhaid i mi gerdded ryw lawer.

O dan arweiniad tîm y Sefydliad Diwylliannol, gwnes i ddarganfod byd o gyfleoedd nad oeddwn i'n gwybod amdano. Rwyf wedi rhwydweithio â gweithwyr proffesiynol yn y diwydiant, rwyf bellach yn wyneb cyfarwydd yn y maes ysgrifennu lleol ac rwyf hyd yn oed wedi gweithio'n frwdfrydig gyda siopau llyfrau Abertawe a'u cefnogi. Mae'r profiadau hyn wedi bod yn hynod werthfawr, gan fy helpu i ddatblygu fy sgiliau a meithrin cysylltiadau mewn diwydiant sydd ag enw drwg am fod yn anodd.

Gwnaeth fy mrwdfrydedd am y Sefydliad Diwylliannol fy ysbrydoli i ymgymryd â modiwl Gwobr Dylan Thomas yn fy ngradd Llenyddiaeth Saesneg, a gwnaeth hyn agor drysau at hyd yn oed fwy o gyfleoedd cyffrous. O gyfweld ag awduron ar Bodlediad Bookends i feirniadu cystadlaethau llenyddol plant, mae hon wedi bod yn daith anhygoel. Rwyf wedi ennill profiad ymarferol gwerthfawr mewn rheoli digwyddiadau, creu podlediadau a chyfweld ac mae hyn i gyd wedi bod yn werth chweil.

Os ydych chi'n frwdfrydig am lyfrau ac rydych chi am wneud mwy na darllen yn unig, yna mae'r interniaeth hon yn ddelfrydol i chi. Byddwch chi'n ennill profiad gwerthfawr ynghyd â chyfleoedd am rwydweithio a fydd yn gwneud i'ch CV ddisgleirio.

Nathaniel Phillips

Fel myfyriwr newydd yn Abertawe, roeddwn yn nerfus ac yn ansicr sut y byddwn i'n cwrdd â phobl a ffrindiau newydd oedd o'r un meddylfryd - roedd y Sefydliad Diwylliannol yn lle perffaith i wneud hynny. Mae wedi fy helpu gyda magu fy hyder, cynyddu fy sgiliau cymdeithasol, ac yn bwysicach oll, mae wedi rhoi cyfle i mi gwrdd ag egin awduron arbennig sy’n llawn ysbrydoliaeth.

Ashish Dwivedi

Mae tua 3 blynedd wedi mynd heibio ers i mi gael y cyfle i weithio gyda'r Sefydliad Diwylliannol wrth nodi pymtheng mlynedd ers sefydlu Gwobr Dylan Thomas Prifysgol Abertawe, ac mae fy atgof mor ffres ag erioed. Wel, fydd hi ddim yn anodd disgrifio pa mor wych oedd y profiad - yn ogystal â chydweithio â thîm eithriadol a chefnogol, ces i gyfle hefyd i gwrdd a chyfweld â rhai o gyn enillwyr y wobr gan gynnwys Rachel Trezise a Lucy Caldwell, a hyd yn oed bod yn un o feirniaid cystadleuaeth ysgrifennu plant ar un adeg. I mi, roedd yr interniaeth honno'n agoriad llygad o safbwynt creadigol a phroffesiynol. Roedd hi'n gyfle i feithrin rhwydweithiau ag unigolion o'r un meddylfryd sy'n ymroddedig i hyrwyddo pwysigrwydd y Dyniaethau, a dwi mewn cysylltiad â llawer ohonyn nhw o hyd. Felly, dwi'n argymell yn gryf bod myfyrwyr yn achub ar y cyfle i wneud interniaeth yn y Sefydliad Diwylliannol. Mae'n eich helpu ei ehangu eich gorwelion, cael profiad proffesiynol anhygoel a chydweithio â thîm o feddylwyr hynod ddawnus.

Angie Bosher

Roeddwn i ar bigau drain ar y dechrau, ond yn y pen draw llwyddais i i siarad â fy hoff awdur ar y rhestr fer a ches i sgwrs hyfryd â'r enillydd, a lofnododd ei lyfr! Roedd llawer o westeion yn chwilfrydig am y modiwl a'n cyfraniadau at y noson, ac roedd hi'n ffordd wych o orffen y flwyddyn. Siarad â'r interniaid eraill ar ddiwedd y noson a myfyrio ar y cwrs a'n meddyliau cyffredinol oedd y rhan orau o ddifrif calon.

Ruth Williams

Yn ddiau, yr interniaeth a gynigiwyd ar fodiwl Gwobr Dylan Thomas oedd y cyfle gorau a dderbyniais i ar unrhyw adeg yn fy ngyrfa yn y brifysgol! Mae'r rhaglen interniaethau'n cynnig cyfle i chi gael profiad o reoli digwyddiadau, gan bodledu ag awduron a gyrhaeddodd y rhestr fer, ac mae'n ffordd ardderchog o orffen eich blwyddyn olaf â digwyddiad gwych. Byddwn i'n argymell y cyfle hwn i unrhyw un â diddordeb mewn cael profiad ymarferol o'r diwydiant cyhoeddi gan y bydd yr interniaeth yn edrych yn wych ar eich CV yn y dyfodol!

Ruby Burgin

Y cyfleoedd interniaeth a ddarperir gan Brifysgol Abertawe oedd y tro cyntaf imi gael profiad o'r diwydiant ysgrifennu. Dan adain gefnogol, roedd modd imi rwydweithio a chyfathrebu â gweithwyr proffesiynol ym myd diwydiant a datblygu fy ngwybodaeth a'm hyder yn y man creadigol hwnnw. Yn hynod werthfawr ac yn angenrheidiol i bawb sy'n dymuno gweithio yn y maes llenyddol.