Cwrdd A’n Hymchwilwyr Ôl-Raddedig

Mae Fatmanur wedi bod yn ymgeisydd PhD yn y Gyfraith ym Mhrifysgol Abertawe ers 2021, o dan brif oruchwyliaeth yr Athro Cysylltiol  Stefano Barazza. Mae hi'n angerddol am y Gyfraith a Thechnoleg a Chyfraith Eiddo Deallusol, Cyfraith E-Fasnach, Cyfraith Cystadleuaeth a Chyfraith yr Undeb Ewropeaidd. Teitl ei hymchwil PhD yw “To What Extent Can Territorial Restrictions Be Applied to Digital Products? In-Depth Analysis and Policy Recommendations for EU Policy-Makers”.

Cwblhaodd hefyd ei gradd TechGyfreithiol, LLM ym Mhrifysgol Abertawe yn 2020 gan arbenigo mewn Cyfraith Eiddo Deallusol Digidol, Blockchain a'r Gyfraith, Deallusrwydd Artiffisial a'r Gyfraith, a Hawliau Digidol. Cyn hynny, graddiodd o Gyfadran y Gyfraith, Prifysgol Ankara Yildirim Beyazit yn 2018, a bu'n gweithio fel Cyfreithiwr dan Hyfforddiant yn Nhwrci rhwng 2018-2019.

Mae Hamza yn ymgeisydd PhD yn Ysgol y Gyfraith Hillary Rodham Clinton, Prifysgol Abertawe ers mis Ionawr 2021. Mae e’n gwneud ymchwil ar gyfraith ryngwladol y môr. Teitl yr ymchwil yw “The International Legal Framework Applicable to Unmanned Ships: Is it Fit for Purpose?” o dan oruchwyliaeth Dr. Youri Van Logchem a'r Athro Andrew Tettenborn. Cyn hynny, cwblhaodd ei LLB ym Mhrifysgol Ankara Yildirim Beyazit yn 2018. Llwyddodd hefyd i ennill ei LLM gyda theilyngdod ym Mhrifysgol Abertawe yn 2020. Roedd ei astudiaethau yn yr LLM yn bennaf ym meysydd cyfraith ryngwladol y môr, cyfraith morlys, cyfraith cludo nwyddau ar y môr, y tir a’r awyr, a chyfraith yswiriant morol. Gweithiodd fel cyfreithiwr dan hyfforddiant yn Nhwrci yn 2018, ochr yn ochr â’i yrfa academaidd.

Ymunodd Ramil Gachayev â Phrifysgol Abertawe yn 2021 a theitl ei ymchwil yw 'the Impact of International Investment Law on the Territoriality Principle in International Intellectual Property Law: A Critical Examination of the Impact of Intellectual Property Provisions in Investment Treaties of Middle-Income Countries'. Cyn ymuno â rhaglen PhD Prifysgol Abertawe, roedd yn ymarfer y gyfraith yn Azerbaijan ac yn gweithio fel cyfreithiwr corfforaethol mewn llawer o strwythurau masnachol ym meysydd telathrebu, adeiladu, cynhyrchu bwyd, y cyfryngau, warws ac eraill. Graddiodd Ramil o Academi Economeg Samara State (sydd bellach yn Brifysgol) gyda rhagoriaeth. Ar ben hynny, enillodd Ddiploma Lefel 7 mewn Cyfraith Busnes Rhyngwladol (tystysgrif ôl-raddedig) o un o ysgolion Prydain ac fe gymerodd ran mewn nifer o  gyrsiau yn ymwneud â chyfryngu, hawliau dynol, eirioli ac ati.

Mae Xinge Li yn fyfyriwr PhD ym Mhrifysgol Abertawe. Teitl ei thraethawd ymchwil yw “Disruptive Technologies in Shipping Industry: Insurance Implications”. Cyn ei hastudiaethau PhD, cwblhaodd Xinge ei hastudiaethau israddedig mewn cyfraith forwrol ym Mhrifysgol Forwrol Dalian, lle bu’n rhan o’r Rhaglen Cyfnewid Cyswllt V+1 gyda Phrifysgol Abertawe yn y flwyddyn olaf. Ar ôl hynny, aeth ymlaen i wneud astudiaethau ôl-raddedig pellach mewn Cyfraith Fasnachol a Morwrol Ryngwladol ac enillodd radd Meistr yn y Gyfraith ym Mhrifysgol Abertawe.

Mae Alicia Mckenzie yn  ymgeisydd PhD yn Ysgol y Gyfraith Hillary Rodham Clinton, Prifysgol Abertawe. Mae ei hymchwil yn canolbwyntio ar yswiriant risgiau seiber yn y diwydiant llongau. Mae gan Alicia ddiddordeb hefyd mewn gwerthuso effaith technoleg ar weithrediadau llongau a masnachol. Mae hi wedi bod yn tiwtora (yn rhan-amser) yn Abertawe am y 4 blynedd diwethaf ac mae hi wedi cyflwyno seminarau mewn Methodoleg Gyfreithiol, Cyfraith Camwedd  a Chyfraith Contract. 

Cwblhaodd Alicia ei gradd LLM mewn Cyfraith Fasnachol a Morwrol Ryngwladol ym Mhrifysgol Abertawe yn 2017. Mae ganddi Dystysgrif Addysg Gyfreithiol o Ysgol y Gyfraith Norman Manley yn Jamaica (2015), Baglor yn y Gyfraith o Brifysgol India'r Gorllewin, Cavehill Barbados (2013) a Baglor yn y Gwyddorau mewn ‘International Relations with minors in criminology and social policy administration’ o Brifysgol India'r Gorllewin, Mona Jamaica (2010). Mae Alicia yn atwrnai yng nghyfraith cymwysedig yn Jamaica lle bu hi'n arbenigo mewn ymgyfreitha materion sifil a masnachol. 

Mae Gayle yn ymgeisydd PhD sy’n cael ei hariannu gan Brifysgol Abertawe a Chyngor Ymchwil Economaidd a Chymdeithasol Cymru (ESRC) a’i phrif oruchwyliwr yw Dr. Jon Burnett o'r adran droseddeg. Ymunodd â'r adran gyntaf yn 2015 lle enillodd radd israddedig ac MA mewn troseddeg, cyn mynd ymlaen i ennill MSc mewn dulliau ymchwil a chychwyn ar ei PhD. Mae Gayle yn aelod o Gymdeithas Troseddeg Prydain.

Gyda’i phrif ddiddordeb mewn troseddeg feirniadol a radical, ffocws PhD Gayle yw'r ystad carchardai i ddynion yng Nghymru, a'r niwed a achosir gan garcharu. Mae’n ystyried yn benodol sut y gall mesurau adsefydlu fel addysg a hyfforddiant galwedigaethol leddfu – neu beidio – y boen o ailsefydlu ar ôl i rywun gael ei ryddhau o'r carchar; sut y gallent helpu’r person sy’n gadael y carchar i ymatal rhag troseddu yng nghyd-destun y stigma, y rhwystrau economaidd-gymdeithasol, a’r effeithiau andwyol a ddaw o garcharu.

Mae Connor yn Ymgeisydd PhD ym Mhrifysgol Abertawe, dan oruchwyliaeth Dr. Lella Nouria (Troseddeg) a Dr. Bertie Muller (Cyfrifiadureg). Ymunodd â'r sefydliad am y tro cyntaf yn 2015 i astudio Troseddeg a Chyfiawnder Troseddol ac wedyn dau gwrs meistr yn olynol ar Seiberdroseddu a Therfysgaeth, ac yna deallusrwydd artiffisial sy'n canolbwyntio ar bobl.

Ymdrinnir â phynciau rhyngddisgyblaethol gwaith PhD Connor o dan gylch gorchwyl rôl platfformau cyfryngau cymdeithasol mewn cymedroli cynnwys, yng nghyd-destun dileu cynnwys eithafol (yn benodol y dde eithafol). Er bod ei ymchwil yn edrych ar eithafiaeth ar-lein, y mae hefyd yn ymdrin â Rhyngweithio rhwng Pobl a Chyfrifiaduron, Moeseg, a rheoleiddio Deallusrwydd Artiffisial o fewn yr un cylch gwaith. Y tu hwnt i'w waith ymchwil mae Connor wedi arwain seminarau yn yr adran ac mae wedi bod yn ymwneud â nifer o brosiectau rhyngddisgyblaethol gan gynnwys prosiect DRAGON-S Prifysgol Abertawe.

Mae ymchwil Leonie yn canolbwyntio ar grwpiau o droseddwyr, ymddygiadau troseddol a nodweddion personoliaethau tywyll, ac mae ei PhD cyfredol yn canolbwyntio ar droseddwyr rhywiol benywaidd, sut maen nhw'n cael eu gweld yn y system cyfiawnder troseddol, a’r anghenion hyfforddi sydd gan weithwyr proffesiynol ar hyn o bryd. Trwy'r gwaith hwn, mae'n gobeithio taflu goleuni ar bolisïau sy'n canolbwyntio ar ddynion yn ogystal â barn am droseddwyr rhywiol ar sail eu rhyw.

Mae gan Leonie radd BSc mewn Troseddeg a Seicoleg, gradd MSc mewn Seicoleg Annormal a Chlinigol, ac mae'n Aelod Graddedig o Gymdeithas Seicolegol Prydain. Er mai cefndir ym maes Troseddeg a Seicoleg sydd gan Leonie, mae ei diddordebau yn eang ac mae hi wedi cyhoeddi papurau ar nodweddion personoliaethau sadistaidd, “Creating Evil: Can Sadism be induced?”, ac ar ddatblygiad economaidd rhanbarthol, “A well-being network approach to covid-19 recovery: The approach of 4theRegion”. Roedd Leonie yn gysylltiedig â’r ail waith hwn drwy ei swydd fel cynorthwy-ydd ymchwil yn yr adran fusnes ym Mhrifysgol Abertawe.

Mae ymchwil Kerime yn canolbwyntio ar droseddau cyfundrefnol, troseddau ariannol, a defnydd troseddol o gryptoarian. Mae ganddi ddiddordeb arbennig mewn sut caiff yr arian a ddaw o droseddau sy’n gysylltiedig â chryptoarian ei wyngalchu. Mae hi'n aelod o CYTREC (Y Ganolfan Ymchwil i Seiberfygythiadau) yn y brifysgol. Mae hi hefyd yn gynrychiolydd myfyrwyr yn yr adran droseddeg.

Dechreuodd Kerime ei gyrfa mewn swyddfa cyfraith, yn canolbwyntio ar gyfraith trosedd a bu'n gweithio fel atwrnai yn y gyfraith yn Nhwrci. Mae hi wedi astudio masnachu eiddo diwylliannol yn anghyfreithlon yn ei thraethawd ymchwil ar gyfer ei gradd Meistr. Mae Kerime yn gweithio'n agos gyda rhwydweithiau cyrff anllywodraethol sy'n arbenigo mewn cyfraith ryngwladol, a rhoddodd ddarlithoedd ar Gyfraith Ryngwladol yn yr ICIL (Canolfan Cyfraith Ryngwladol Istanbul). Mae hi ar fwrdd goruchwylio'r sefydliad hwn.

Mae Shahed yn ymgeisydd PhD mewn Troseddeg. Mae ei phrosiect, a ariennir gan Gyngor Ymchwil Economaidd a Chymdeithasol Cymru (ESRC), mewn cydweithrediad â Tech Against Terrorism, yn dwyn y teitl "The Application of Digital Forensics and Machine Learning to Automatically Detect and Flag Modified Online Terrorist Propaganda". Bydd y prosiect hwn yn defnyddio fframweithiau troseddeg yn ogystal â chyfrifiadureg i wella ein dealltwriaeth o sut mae terfysgwyr yn defnyddio gofodau ar-lein a strategaethau lledaenu propaganda, er mwyn cyfrannu at ymdrechion i ddatblygu offer sy’n gallu canfod cynnwys sydd wedi'i addasu er mwyn osgoi cael ei ganfod.

Mae gan Shahed radd Meistr Ryngwladol mewn Diogelwch, Deallusrwydd ac Astudiaethau Strategol (IMSISS), a ddyfarnwyd gan Brifysgol Glasgow, Prifysgol Dinas Dulyn, a Phrifysgol Charles ym Mhrag.   Mae ganddi brofiad o ddiogelwch corfforaethol, ymddiriedaeth a diogelwch. Mae ei hymchwil flaenorol yn cynnwys defnydd eithafwyr o ariannu torfol, cryptoarian, a thechnoleg blockchain.   Mae ganddi ddiddordeb hefyd mewn moeseg, ôl-wladychiaeth, preifatrwydd, a seiberddiogelwch. Cafodd ei chynnwys yn rhestr Fforwm Future Leaders 35 Under 35 Canolfan Materion Rhyngwladol Barcelona (CIDOB) ar gyfer "Global Techno-politics: Technology, the next global order and the role of the EU.”