A-F

Syr Granville Beynon

Ganwyd Syr Granville Beynon yn Nyfnant a graddiodd â gradd israddedig mewn ffiseg o Goleg Prifysgol Abertawe ym 1934, cyn mynd ymlaen i gwblhau PhD. Ym 1938, ymunodd â'r Labordy Ffiseg Cenedlaethol fel Swyddog Gwyddonol, lle dechreuodd gydweithredu â Syr Edward Appleton. Chwaraeodd rôl hefyd mewn sawl prosiect cydweithredol rhyngwladol o bwys a bu'n Llywydd Cyngor EISCAT, yn gymrawd o'r Gymdeithas Frenhinol, yn Llywydd y Pwyllgor Rhyngwladol ar gyfer Geoffiseg a dyfarnwyd medal Chree y Sefydliad Ffiseg iddo. Ym 1959, dyfarnwyd CBE i Syr Granville Beynon ac ym 1976, cafodd ei urddo'n farchog.

John Beynon

Ganwyd John Beynon yn Ystalyfera a dechreuodd  astudio am ei radd ffiseg israddedig yng Ngholeg Prifysgol Abertawe ac yntau'n 16 oed, gan raddio pan oedd yn 19 oed. Yn ystod y cyfnod hwn, roedd wedi dechrau ymwneud â gwaith rhyfel fel swyddog gwyddonol ym maes ymchwil i arfogaeth tanciau. Ym 1947, gadawodd wasanaeth y llywodraeth i ddechrau ei waith gydol oes yn ICI, gan arbenigo mewn datblygu sbectronomeg màs a'i defnyddio i ddatrys problemau cemegol a ffisegol pob dydd. Ym 1974, dychwelodd i Brifysgol Abertawe i dderbyn Cadair Ymchwil y Gymdeithas Frenhinol a datblygodd ddyluniad sbectromedr màs newydd. Enillodd lawer o wobrau rhyngwladol ac ystyrir mai ef oedd arweinydd y byd yn ei faes. Bu hefyd yn gadeirydd sefydlol Cymdeithas Sbectronomeg Màs Prydain ac yn aelod sefydlol o'r gymdeithas gyfatebol yn America. Dyfarnwyd sawl cymrodoriaeth er anrhydedd iddo gan brifysgolion eraill hefyd. Ym 1971, cafodd ei ethol yn gymrawd o'r Gymdeithas Frenhinol cyn iddo ymddeol ym 1986.

Edward Bowen

Graddiodd Edward George "Taffy" Bowen mewn ffiseg o Goleg Prifysgol Abertawe ym 1930. Ar ôl graddio, aeth ymlaen i wneud MSc cyn parhau â'i ymchwil yn Abertawe ac, yn fuan wedyn, symudodd i Brifysgol Llundain i gwblhau ei ymchwil yno lle enillodd ei PhD. Ymunodd Edward ag Is-adran Radio'r Labordy Ffiseg Cenedlaethol yn Teddington a gwnaeth gyfraniad sylweddol at y gwaith cynnar i ddatblygu radar. Cafodd ei benodi i Gomisiwn Awyr Prydain yn Washington, daeth yn bennaeth yr Is-adran Radioffiseg yn Awstralia ym 1946 ac fe'i hetholwyd yn Gymrawd o'r Gymdeithas Frenhinol ym 1975.

https://www.swansea.ac.uk/alumni/alumni-profiles/george-bowen/

Martin Coles

Astudiodd Martin Coles ym Mhrifysgol Abertawe a graddiodd â BSc (Anrh.) mewn Biocemeg ym mis Mehefin 1977. Bu'n gweithio i Procter a Gamble mewn rolau gweithredol yn Efrog Newydd a Cincinnati cyn ymuno â Pepsico yn Chicago ym 1987. Bu'n gweithio i Nike, bu'n Is-lywydd Gweithredol Reebok International Ltd ac yn Llywydd Rhyngwladol Starbucks. Cafodd ei benodi'n llywydd ac yn brif swyddog gweithredol HaloSource ym mis Hydref 2011. Bu hefyd yn aelod o Fyrddau Cyngor ar Addysg Rhyngwladol nid er elw Ysgol Fusnes Prifysgol Washington yn Bothell ac ym Mhrifysgol Seattle, lle bu hefyd yn gymrawd o Ysgol Fusnes Albers.

 Wrth dderbyn ei radd er anrhydedd gan Brifysgol Abertawe, meddai Mr Coles: "Rwyf wrth fy modd yn cael fy nghydnabod fel hyn ac rwy'n gwerthfawrogi'n fawr yr anrhydedd aruthrol hwn sy'n cael ei roi i mi ac sydd mor annisgwyl. Mae ansawdd yr addysg a'r gofal a'r sylw dderbyniais i a'm cymheiriaid ym Mhrifysgol Abertawe'n dyst i safon y sefydliad hwn. Mae llawer iawn o feddylwyr mawr wedi camu od drwy ddrysau Prifysgol Abertawe, ac rwy'n ddiolchgar iawn am fod yn rhan fechan o'i hanes cyfoethog.”

A Davison

Gadawodd yr Athro Davison yr ysgol ym Mhen-y-bont ar Ogwr pan oedd yn 16 oed i ddechrau prentisiaeth fel cemegydd gyda Chwmni Dur Cymru. Bu'n astudio'n rhan amser am dair blynedd i ennill ei gymwysterau Safon Uwch ac wedi hynny sicrhaodd le yn Abertawe ym 1956. Enillodd ei radd israddedig mewn Cemeg ym 1959 cyn dechrau ei PhD yng Ngholeg Imperial Llundain. Ym 1962, derbyniodd swydd ym Mhrifysgol Harvard cyn symud i Sefydliad Technoleg Massachussetts. Ym 1974, fe'i penodwyd yn Athro llawn yno a dyfarnwyd cymrodoriaeth Alfred P Sloan iddo.