Enillodd Max Porter y wobr yn 2016 gyda’r rhyddiaith a barddoniaeth hybrid sef Grief is the Thing with Feathers, a ganmolwyd gan y beirniaid fel ‘hudolus a syfrdanol.’ Enillodd y nofel fer hefyd Wobr Ysgrifennwr Ifanc Gorau’r Flwyddyn PFD y Sunday Times, a chyrraedd rhestr fer Gwobr Llyfr Cyntaf The Guardian a Gwobr Goldsmiths. Mae apêl fyd-eang y llyfr wedi arwain at werthiannau mewn 29 o wledydd yn rhyngwladol.
Ers cyhoeddi, mae wedi cael ei addasu ar gyfer y llwyfan gyda’r seren Cillian Murphy. Perfformiwyd y ddrama gyntaf yn Nulyn ac yna fe’i perfformiwyd i fwy na 26,000 o bobl yn Llundain ac Efrog Newydd yn ystod gwanwyn 2019. Yn ddiweddar, mae Porter wedi cyhoeddi ei ail lyfr, y nofel Lanny (2019), unwaith eto’n herio confensiynau naratif â strwythur arbrofol sy’n cynnwys themâu pwerus. Cyrhaeddodd Lanny’r rhestr hir ar gyfer Gwobr Wainwright a Gwobr Booker. Mae addasiad ffilm ar y gweill sy’n cynnwys Rachel Weisz.
Crynodeb - 'Grief is the Thing With Feathers'
Mewn fflat yn Llundain, mae dau fachgen ifanc yn wynebu tristwch annioddefol marwolaeth sydyn eu mam. Mae eu tad, sy’n ysgolhaig Ted Hughes ac yn ddyn rhamantus blêr, yn dychmygu dyfodol llawn ymwelwyr da eu bwriad a gwacter.
Yn y foment hon o anobaith, mae brân yn ymweld â nhw – yn wrthwynebydd, yn gastiwr, yn iachäwr ac yn warchodwr plant. Mae’r aderyn sentimental hwn, yn ôl ei ddisgrifiad ei hun, wedi’i denu at y teulu galarus ac mae’n bygwth aros tan nad oes ei angen arnynt mwyach. Wrth i wythnosau droi’n fisoedd ac wrth i boen ddofn colled droi’n atgofion, mae’r tri’n dechrau iacháu.
Yn y nofel gyntaf ryfeddol hon – yn nofel fer, yn chwedl bolyffonig ac yn draethawd ar alar – mae tosturi ac arddull orchestol Max Porter yn cyfuno i greu effaith syfrdanol. Mae Grief is the Thing with Feathers, sy’n llawn synnwyr digrifwch annisgwyl a gwirionedd emosiynol dwfn, yn nodi cyrhaeddiad dawn wefreiddiol newydd.
Press Releases
Bydd Max Porter, awdur Grief is the Thing with Feathers, a enillodd Wobr Ryngwladol Dylan Thomas 2016, yn teithio o amgylch Tecsas yn nes ymlaen yr wythnos hon.
Grief is the Thing with Feathers, a gyhoeddwyd gan Faber & Faber, yw llyfr cyntaf Max – cyfuniad o nofel, chwedl bolyffonig a thraethawd ar ofid.
Mae Grief is the Thing with Feathers, a ysbrydolwyd gan Crow, sef casgliad o gerddi gan Ted Hughes, yn stori am ddau fachgen sy'n wynebu tristwch annioddefol ar ôl i'w mam farw'n sydyn. Mae eu tad, un o ysgolheigion Ted Hughes a dyn rhamantaidd blêr, yn dychmygu dyfodol gwag ond sy'n llawn ymwelwyr â bwriadau da. Gan deimlo'n anobeithiol, mae brân yn ymweld â nhw - gwrthwynebydd, chwaraewr triciau, iachawr, gofalwr plant. Mae'r aderyn sentimental hwn yn cael ei ddenu i'r teulu galarus ac yn bygwth aros hyd nes ei fod yn ddiangen. Wrth i wythnosau droi'n fisoedd, mae'r boen sy'n gysylltiedig â'r golled yn ymollwng i atgofion, ac mae'r teulu bach o dri yn dechrau gwella.
Yn The Guardian, dywedodd yr adolygydd Sarah Crown fod nofel Porter "yn dorcalonnus, yn ddoniol, yn ddirdynnol ac yn crynhoi'n berffaith yr hyn y mae'n ei olygu i golli rhywun ond yn caru'r byd o hyd."
Bydd Max Porter yn darllen darn o'r llyfr ac yn ateb cwestiynau yn Ystafell Ddarllen Joynes yn Adran Saesneg Prifysgol Tecsas yn Austin am 7pm ddydd Iau, 3 Tachwedd. Mae'r digwyddiad hwn yn rhad ac am ddim ac agor i'r cyhoedd.
Am 1pm ddydd Sadwrn, bydd Max yn ymuno â Paul Lisicky (The Narrow Door) yng Ngŵyl Lyfrau Tecsas i drafod yr hyn y mae'n ei olygu i ysgrifennu am eich profiad o golli rhywun, a beth sy'n digwydd pan fydd awdur yn teithio i drafod am y profiad hwnnw drosodd a throsodd.
Gŵyl Lyfrau Tecsas yw un o wyliau llenyddol mwyaf a nodedig y dalaith, ac mae'n cynnwys 250+ o awduron cydnabyddedig yn rhyngwladol ac yn feirniadol, 20+ o leoliadau gan gynnwys State Capitol, 80+ o arddangoswyr, cerddoriaeth fyw, tryciau bwyd lleol, gweithgareddau i'r teulu a chyfleoedd i gwrdd ag awduron a phobl eraill sy'n hoffi llyfrau. Mae'r Ŵyl, a sefydlwyd yn 1995 gan y Brif Foneddiges Laura Bush, wedi croesawu miloedd o awduron nodedig a llwyddiannus dros y blynyddoedd, gan gynnwys Margaret Atwood, Robert Caro, Sandra Cisneros, Salman Rushdie, Cheryl Strayed, Walter Mosley, Molly Shannon, Frank McCourt, Ziggy Marley, Liz Carpenter, Doris Kearns Goodwin a sawl un arall.
Meddai'r Athro Kurt Heinzelman, aelod o'r panel beirniaid ar gyfer Gwobr Ryngwladol Dylan Thomas: "Mae Adran Saesneg Prifysgol Tecsas wedi noddi darlleniad ac ymweliad gan enillydd Gwobr Ryngwladol Dylan Thomas bron bob blwyddyn ers i'r wobr gael ei chreu dros ddeng mlynedd yn ôl, ac rydym yn falch iawn o gydweithio â Phrifysgol Abertawe wrth ddathlu'r wobr ryngwladol ac arbennig hon."
Max Porter - Enillyd 2016
Yn y bennod hon, mae intern o’r Sefydliad Diwylliannol Eddie Matthews yn siarad â’r awdur arobryn Max Porter.