Iechyd a Lles a Gwyddor Data: Ysgoloriaeth WGSSS: Ymagwedd Data Poblogaeth Gyfan Gysylltiedig er mwyn Deall Lles ac Anghydraddoldebau (RS952)

Darparwyr y cyllid:  Mae'n bleser gan y Gyfadran Meddygaeth, Iechyd a Gwyddorau Bywyd ym Mhrifysgol Abertawe gynnig ysgoloriaeth Ysgol Graddedigion Cymru ar gyfer y Gwyddorau Cymdeithasol (WGSSS) (ESRC DTP) a ariennir yn llawn yn y Llwybr Iechyd a Llesiant a Gwyddor Data gan ddechrau ym mis Hydref 2026. 

Y meysydd pwnc:  Iechyd a Lles a Gwyddor Data 

Dyddiadau dechrau'r prosiect:  Hydref 2026 

**(Gweler y nodyn isod ynghylch dyddiadau dechrau hwyrach posibl). 

** Mewn amgylchiadau eithriadol, ac yn amodol ar gymeradwyaeth y Brifysgol a/neu'r corff cyllido perthnasol, gellir caniatáu gohirio cynnig tan y cyfnod cofrestru nesaf sydd ar gael. Fel arfer, ni fydd gohiriad o'r fath yn fwy na thri mis calendr o'r dyddiad dechrau a bennwyd yn wreiddiol. Sylwer, dim ond un cais i ohirio gaiff ei ystyried ac ni ellir gwarantu y caiff ei gymeradwyo. 

Goruchwylwyr:  

• Yr athro Andrew Hadon Kemp 
• Dr Kyle Jones 
• Yr athro Simon Dymond 
• Zoe Fisher  

Rhaglen astudio gydnaws: Iechyd a Llesiant a Gwyddorau Data, PhD 

Dull astudio:  

Mae hyd yr astudiaeth yn amrywio o 3.5 i 4.5 blynedd amser llawn (neu’r hyn sy’n gyfwerth iddi yn rhan-amser).     

Mae hyd yr astudiaeth yn dibynnu ar brofiad ymchwilio blaenorol ac anghenion hyfforddi'r myfyriwr a asesir drwy gwblhau Dadansoddiad o’r Anghenion Datblygu.Rydyn ni’n croesawu ceisiadau am astudio’n amser llawn ac yn rhan-amser. 

Man Astudio: Prifysgol Abertawe (Campws Y Singleton) 

Disgrifiad o'r Prosiect:  

Cyd-destun: Mae Asesiadau o Anghenion y Boblogaeth yn ofyniad statudol o dan Ddeddf Gwasanaethau Cymdeithasol a Llesiant (Cymru) 2014 ac maent yn darparu'r dystiolaeth sylfaenol ar gyfer cynllunio rhanbarthol, trawsnewid gwasanaethau a chomisiynu ar draws systemau iechyd, gofal cymdeithasol a lles ehangach. Yng Ngorllewin Morgannwg (Abertawe a Chastell-nedd Port Talbot), datblygir yr Asesiad Rhanbarthol trwy gydweithrediad rhwng Bwrdd Iechyd Prifysgol Bae Abertawe, awdurdodau lleol, y trydydd sector a'r Bwrdd Partneriaeth Rhanbarthol, ac mae'n dylanwadu ar flaenoriaethau'r Byrddau Gwasanaethau Cyhoeddus. Mae'r PhD gydweithredol hon yn adeiladu ar raglen ymchwil ryngddisgyblaethol sydd wedi bodoli am ddeng mlynedd gan yr Athro Kemp a Dr Fisher sy'n cysyniadoli lles trwy gysylltiadau â'r hunan, eraill a natur. Mae'n cyd-fynd yn agos ag egwyddorion ataliol, sy'n seiliedig ar le a hirdymor Deddf Llesiant Cenedlaethau’r Dyfodol (Cymru). Yng Nghymru, mae cyfrifoldebau dros iechyd, lles a'r amgylchedd naturiol wedi'u halinio'n ffurfiol trwy bolisi cenedlaethol a strwythurau cyflawni dan arweiniad Llywodraeth Cymru a Chyfoeth Naturiol Cymru, ond ar hyn o bryd mae gan Asesiadau o Anghenion y Boblogaeth gapasiti dadansoddol cyfyngedig i archwilio sut mae penderfynyddion cymdeithasol, perthynol ac amgylcheddol yn croestorri â lles, anghydraddoldeb a’r defnydd o wasanaethau dros amser. Mae'r PhD hon wedi'i gwreiddio mewn partneriaethau statudol a bydd yn cryfhau'r dystiolaeth ar lefel y boblogaeth sydd ar gael i gefnogi datblygiad Asesiadau o Anghenion y Boblogaeth. 

Rhesymeg: Bwriad Asesiadau o Anghenion y Boblogaeth yw cefnogi dulliau ataliol, hirdymor sy'n seiliedig ar le ar gyfer lles ond yn aml cânt eu cyfyngu gan ddata dameidiog ar draws sectorau a chyfnodau bywyd a thrwy ddibynnu ar ddadansoddiadau trawstoriadol. Mae Banc Data Cyswllt Gwybodaeth Ddienw Diogel (SAIL) yn cysylltu data poblogaeth dienw yn ddiogel ar draws systemau iechyd, addysg, gofal cymdeithasol a gweinyddol, gan greu cyfleoedd ar gyfer dadansoddiadau rhychwant oes, ar lefel y teulu a gofodol sy'n ymgorffori penderfynyddion lles ehangach, gan gynnwys amgylcheddau lleol a mynediad at natur. 

Nodau tebygol: Nod y PhD yw datblygu a chymhwyso fframwaith rhychwant oes, sy'n seiliedig ar ddamcaniaeth, ar gyfer deall lles y boblogaeth a'i benderfynyddion gan ddefnyddio data gweinyddol ac arolygon cysylltiedig, gan gynhyrchu tystiolaeth i lywio trawsnewid a chomisiynu gwasanaethau yn Asesiad Anghenion Poblogaeth Gorllewin Morgannwg. Bydd y prosiect yn rhoi sylw arbennig i anghydraddoldebau ar draws cymunedau ac yn archwilio cymariaethau â data rhanbarthol, cenedlaethol neu ryngwladol lle mae dangosyddion a seilweithiau cymharol yn bodoli. 

Cwestiynau ymchwil tebygol: Mae cwestiynau mynegol yn cynnwys: sut y gall damcaniaeth lywio dehongliad o les, iechyd meddwl ac angen ar draws rhychwant oes gan ddefnyddio data poblogaeth cysylltiedig; pa anghydraddoldebau o ran lles, iechyd meddwl a’r defnydd o wasanaethau sy'n bodoli ledled Gorllewin Morgannwg a sut mae'r rhain yn amrywio yn ôl lleoliad, amddifadedd a mynediad at amgylcheddau lleol; sut mae lles oedolion a’r defnydd o wasanaethau yn croestorri ag iechyd corfforol, anfantais economaidd-gymdeithasol a chyd-destun teuluol; pa berthnasoedd rhwng cenedlaethau y gellir eu nodi rhwng iechyd meddwl rhieni a lles plant; a sut y gall tystiolaeth ar benderfynyddion sy'n seiliedig ar le, gan gynnwys mynediad at natur, gefnogi Byrddau Partneriaeth Rhanbarthol a Byrddau Gwasanaethau Cyhoeddus i gyflawni dyletswyddau statudol ar gyfer atal a lles hirdymor. 

Cwmpas, dulliau a dyluniad: Y ffocws empirig craidd yw Gorllewin Morgannwg a'r Asesiad Rhanbarthol a gwaith cymharol y tu hwnt i'r rhanbarth. Bydd y prosiect yn defnyddio data cysylltiedig, dienw, y gellir cael mynediad ato drwy Fanc Data SAIL, gan dynnu ar setiau data iechyd, addysg, gofal cymdeithasol, arolygon a gweinyddol, a ffynonellau data perthnasol eraill a allai gael eu hadnabod wrth i'r prosiect ddatblygu. Bydd y dulliau'n cynnwys mapio disgrifiadol, modelu atchweliad a modelu aml-lefel, dadansoddiadau ar lefel teulu a gofodol, a dulliau archwiliadol sy'n seiliedig ar ddata, wedi'u harwain gan fframweithiau damcaniaethol penodol. Bydd dadansoddiadau'n cyfuno dulliau hydredol a thrawsdoriadol yn ôl yr angen. Bydd canfyddiadau'n dylanwadu ar Asesiad Anghenion Poblogaeth Gorllewin Morgannwg, ac yn galluogi cymariaethau â dangosyddion lles rhanbarthol, cenedlaethol neu ryngwladol. 

Meini Prawf Mynediad:   

I dderbyn cyllid un o ysgoloriaethau ymchwil yr WGSSS, mae’n rhaid bod gennych chi gymwysterau neu brofiad sy'n cyfateb i radd anrhydedd yn y DU ar lefel dosbarth cyntaf neu ail ddosbarth uwch, neu radd meistr. Mae croeso i fyfyrwyr sydd â chefndir academaidd anhraddodiadol hefyd wneud cais.   

Nodyn ar gyfer ymgeiswyr rhyngwladol ac Ewropeaidd: 

Gellir dod o hyd i fanylion ynghylch sut mae eich cymhwyster yn cymharu â’r gofynion mynediad academaidd sydd wedi'u cyhoeddi ar ein tudalen Gofynion Mynediad Gwledydd Penodol. 

Os oes gennych gwestiynau o ran eich cymhwysedd academaidd neu ffïoedd yn seiliedig ar yr uchod, e-bostiwch pgrscholarships@swansea.ac.uk gyda'r ddolen i'r ysgoloriaethau y mae gennych chi ddiddordeb ynddynt.

Ymgeiswyr sy’n gymwys i dalu ffioedd y DU yn unig. 

Gofynion rhyngwladol ynghylch bod yn gymwys:  

Mae ysgoloriaethau ymchwil yr WGSSS ar gael i fyfyrwyr y DU a myfyrwyr rhyngwladol. Caiff hyd at 30% o'n carfan gynnwys myfyrwyr rhyngwladol. Ni chodir y gwahaniaeth rhwng ffi y DU a'r ffi ryngwladol ar fyfyrwyr rhyngwladol. Dylai ymgeiswyr fodloni gofynion UKRI o ran bod yn gymwys.

Mae ysgoloriaethau ymchwil a ariennir gan yr ESRC yn talu ffioedd dysgu, cyflog byw di-dreth blynyddol yn unol ag isafswm cyfraddau UKRI (£20,780 ar hyn o bryd) ac mae'n cynnwys mynediad at Grant Cymorth Hyfforddiant Ymchwil.     

Os oes gennych chi anabledd, efallai y bydd gennych chi hawl i Lwfans Myfyrwyr Anabl (DSA) ar ben eich ysgoloriaeth ymchwil. 

I wneud cais, cwblhewch y ffurflen gais gyfan, gan ddilyn y ddolen hon. 

Er mwyn cael eich ystyried ar gyfer y dyfarniad ysgoloriaeth hon, mae angen y camau canlynol hefyd.  

1) Yn yr adran 'Gwybodaeth sy'n gysylltiedig â'r Rhaglen', rhowch y Cod RS perthnasol ar gyfer y dyfarniad ysgoloriaeth h.y. RS952 

2) Yn yr adran 'Ymchwil' fe welwch 'Teitl prosiect arfaethedig/teitl ysgoloriaeth'* (Gorfodol)  

• Yn 'Teitl prosiect arfaethedig/teitl ysgoloriaeth' rhowch y ddau:   

• y Cod RS952, a  
• teitl yr ysgoloriaeth.    

• Gadewch y maes Goruchwyliwr Arfaethedig yn wag  
• Gadewch y Prosiect Ymchwil (os yw'n berthnasol) yn wag  
• Yn 'Oes gennych gynnig i'w uwchlwytho?*' (Gorfodol) Dewiswch Ydw  
• Yna uwchlwythwch gopi o'r hysbyseb (gallwch gadw'r hysbyseb trwy glicio print, ac yna argraffu i pdf)  

3) Yn yr adran 'Gwybodaeth am gyllid' dewiswch yr opsiwn 'Cyllid Ysgoloriaeth' yn unig. Gwnewch yn siŵr nad oes unrhyw opsiynau eraill wedi'u dewis.   

* Cyfrifoldeb yr ymgeisydd yw rhestru'r wybodaeth uchod yn gywir wrth wneud cais, sylwch na fydd ceisiadau a dderbynnir heb y wybodaeth uchod a restrir yn cael eu hystyried ar gyfer dyfarniad yr ysgoloriaeth.  

Pwysig: Os ydych chi eisoes wedi cyflwyno cais am yr un rhaglen a dyddiad dechrau, peidiwch ag ail-ymgeisio gan ddefnyddio cyfeiriad e-bost gwahanol. Ni fydd ceisiadau a gyflwynir gyda chyfeiriad e-bost sy'n wahanol i'r un a ddefnyddiwyd yn eich cais gwreiddiol yn cael eu derbyn na'u hystyrid. 

Mae angen un cais i bob dyfarniad ysgoloriaeth ymchwil unigol dan arweiniad Prifysgol Abertawe; ni ellir ystyried ceisiadau sy'n rhestru sawl dyfarniad ysgoloriaeth ymchwil dan arweiniad Prifysgol Abertawe.  

NODER: Ymgeiswyr ar gyfer PhD/EngD/ProfD/EdD - er mwyn cefnogi ein hymrwymiad i ddarparu amgylchedd heb wahaniaethu a dathlu amrywiaeth ym Mhrifysgol Abertawe, mae'n ofynnol i chi lenwi Ffurflen Monitro Cydraddoldeb, Amrywiaeth a Chynhwysiant (EDI) yn ychwanegol at eich ffurflen gais rhaglen.     

Sylwch fod llenwi'r Ffurflen Monitro EDI yn orfodol; Efallai na fydd eich cais yn symud ymlaen os na chyflwynir y wybodaeth hon.  

Cofiwch gynnwys y dogfennau canlynol yn eich cais:   

• Ffurflen Gais yr WGSSS  

• CV academaidd (dim mwy na dwy dudalen).  

• Dau eirda academaidd neu broffesiynol (mae’n rhaid i ymgeiswyr gysylltu â chanolwyr a chynnwys y geirdaon yn eu cais. Mae’n rhaid i'r geirdaon fanylu ar gryfderau ymchwil yr ymgeisydd.  

• Tystysgrifau a thrawsgrifiadau gradd (gan gynnwys cyfieithiadau os yw'n berthnasol)  

• Llythyr eclawrol sy'n cynnwys 'Datganiad Personol Atodol' i esbonio pam mae'r swydd yn cyd-fynd yn arbennig â'ch sgiliau a'ch profiad a sut rydych chi'n dewis datblygu'r prosiect.  

• Tystiolaeth o fodloni gofynion Iaith Saesneg (os yw'n berthnasol).  

• Copi o fisa preswyl y DU (os yw'n berthnasol)  

• Cadarnhau cyflwyno ffurflen EDI  

Croesewir ymholiadau anffurfiol; cysylltwch â:  

NAME: Prof Andrew Kemp 

EMAIL: a.h.kemp@swansea.ac.uk  

*Rhannu Data Cais Partner Allanol – Sylwer, fel rhan o'r broses dethol ceisiadau am ysgoloriaeth, y gall rhannu data cais ddigwydd gyda phartneriaid allanol y tu allan i'r Brifysgol, pan fo cyd-ariannu prosiect ysgoloriaeth yn berthnasol.