Technegydd (Astudiaeth Dadansoddi Cnawd Cocos Cymreig)

Y Brifysgol

Mae Prifysgol Abertawe'n brifysgol a arweinir gan ymchwil sydd wedi bod yn gwneud gwahaniaeth ers 1920. Mae cymuned y Brifysgol yn ffynnu ar archwilio a darganfod ac mae'n cynnig y cydbwysedd cywir o addysgu ac ymchwil rhagorol i gyd-fynd ag ansawdd bywyd ardderchog.

Mae ein campysau glan môr a'n cymuned amlddiwylliannol yn gwneud y Brifysgol yn weithle dymunol i gydweithwyr o bedwar ban byd. Mae ein cydnabyddiaeth a'n buddion, a'n ffyrdd o weithio, yn galluogi i bobl sy'n ymuno â ni i gael gyrfaoedd gwobrwyol, ar y cyd â chydbwysedd gwaith-bywyd rhagorol.

Y rôl

Dyma gyfle cyffrous i ymuno â Phrifysgol Abertawe fel Technegydd Ymchwil i gefnogi'r Astudiaeth Dadansoddi Cnawd Cocos Cymreig, prosiect a ariennir gan Lywodraeth Cymru sy'n archwilio amrywiad tymhorol a gofodol mewn cynnyrch cig cocos ac amodau atgenhedlu ar draws pysgodfeydd yng Nghymru. Bydd y dystiolaeth a grëwyd yn helpu i wella dealltwriaeth a rheolaeth o’r adnodd hwn sy'n bwysig yn economaidd ac yn ecolegol.

Gan weithio yn adran y Biowyddorau yn y Gyfadran Gwyddoniaeth a Pheirianneg, byddwch yn chwarae rôl ganolog yn y gwaith o brosesu a dadansoddi samplau cocos a gesglir yn fisol o ardaloedd ar draws Cymru. Gan weithio'n agos gydag arweinydd y prosiect, cydweithwyr technegol, partneriaid y prosiect a Llywodraeth Cymru, byddwch yn mesur cragen, yn pwyso ac yn dyrannu, yn paratoi meinweoedd ar gyfer asesiad histoleg, ac yn cefnogi microsgopeg a delweddu digidol. Byddwch hefyd yn sicrhau bod samplau, data a chofnodion y labordy'n parhau'n gywir trwy gydol yr astudiaeth.

Byddai'r rôl yn ddelfrydol i biowyddonydd medrus a threfnus iawn sy'n mwynhau gwaith labordy ymarferol ac sy'n ymfalchïo mewn creu canlyniadau cywir, dibynadwy. Mae profiad o brosesu samplau biolegol, dyraniad cocos a deuglawr a thechnegau histoleg yn hanfodol. Byddwch yn hyderus wrth reoli blaenoriaethau cystadleuol, yn gweithio i weithdrefnau gweithredu safonol ac yn cynnal amgylchedd labordy diogel a threfnus. Efallai y bydd hefyd gyfleoedd i gefnogi gweithgareddau maes rhynglanwol achlysurol a darparu goruchwyliaeth ymarferol i fyfyrwyr neu gydweithwyr sy'n cwblhau ymchwil gysylltiedig.

Byddwch yn ymuno â thîm cyfeillgar a chydweithredol sydd ag arbenigedd ar draws bioleg ddyfrol, pysgodfeydd, dyframaethu, iechyd anifeiliaid a chadwraeth forol. Mae cyfleusterau labordy a morol ardderchog Abertawe'n darparu amgylchedd ysgogol i gymhwyso a datblygu eich sgiliau technegol ymhellach, wrth gyfrannu'n uniongyrchol at ymchwil sydd â pherthnasedd ymarferol at reolaeth gynaliadwy o bysgodfeydd cocos yng Nghymru.

Cydraddoldeb, Amrywiaeth a Chynhwysiant

Mae'r Brifysgol yn ymrwymedig i gefnogi a hyrwyddo cydraddoldeb ac amrywiaeth yn ei holl arferion a gweithgareddau. Rydym yn ymdrechu i greu amgylchedd cynhwysol a chroesawn geisiadau gan ymgeiswyr amrywiol o'r grwpiau nodweddion gwarchodedig canlynol: oedran, anabledd, ailbennu rhywedd, priodas a phartneriaeth sifil, beichiogrwydd a mamolaeth, hil (gan gynnwys lliw croen, cenedligrwydd, tarddiad ethnig a chenedlaethol), crefydd a chred, rhyw, tueddfryd rhywiol.

Sgiliau Cymraeg

Lefel y sgiliau Cymraeg sydd ei hangen ar gyfer y rôl hon yw Lefel 1 - Ychydig. Bydd deiliad y swydd yn gallu ynganu geiriau Cymraeg, ateb y ffôn yn Gymraeg, a defnyddio geiriau ac ymadroddion sylfaenol bob dydd (diolch, os gwelwch yn dda). Gellir cyrraedd lefel 1 o gwblhau cwrs hyfforddi un awr.

Mae’r Brifysgol yn sefydliad dwyieithog balch, ac mae Strategaeth Gymraeg y Brifysgol yn amlinellu ein dyheadau i hyrwyddo’r iaith a galluogi ein staff i ddod i gyswllt â’r iaith fel sgil ychwanegol yn y gweithle ac fel porth i gyfleoedd diwylliannol a chymdeithasol newydd. Croesewir ceisiadau yn y Gymraeg ac ni chaiff cais a gyflwynir yn y Gymraeg ei drin yn llai ffafriol na chais a gyflwynir yn Saesneg. Mae gan siaradwyr Cymraeg yr hawl i gael cyfweliad yn Gymraeg. Disgwylir i ymgeiswyr ar gyfer rôl lle mae sgiliau Cymraeg yn hanfodol gyflwyno’u cais yn Gymraeg, a bydd y cyfweliad yn Gymraeg, os byddwch yn cyrraedd y rhestr fer.

Gwybodaeth Ychwanegol

Gallwch gyflwyno CV a llythyr eglurhaol ar gyfer y swydd hon.

Rhannu Lawrlwytho Disgrifiad swydd.docx Lawrlwytho FSE-Candidate-Brochure-(CY).pdf Argraffu'r dudalen hon Yn ôl at y rhestr