Astudiaethau Ôl-raddedig â darpariaeth cyfrwng Cymraeg

Myfyrwyr tu allan i Lyfrgell Campws y Bae

Bydd parhau i astudio trwy’r Gymraeg ar lefel ôl-raddedig yn gam naturiol ac o fantais sylweddol

Astudio trwy'r Gymraeg ar Raglenni Ôl-raddedig

Mae gan Brifysgol Abertawe nifer o gyfleoedd ar gyfer myfyrwyr sy’n dymuno astudio drwy gyfrwng y Gymraeg ar lefel ôl-raddedig ac mae Academi Hywel Teifi yma i’th gefnogi i wneud hynny trwy gydol dy amser gyda ni. Bydd parhau i astudio trwy’r Gymraeg wedi i ti astudio drwy’r iaith ar lefel israddedig yn gam naturiol ac o fantais sylweddol ac fe gei gefnogaeth ac anogaeth lawn i wneud hynny er mwyn ychwanegu at dy gyflogadwyedd, i feithrin sgiliau dadansoddi ac i ddangos y gallu i weithio mwy mwy nag un iaith.

Mae’r Academi yn darparu cymuned i’r miloedd o fyfyrwyr sy’n siarad Cymraeg yma, ac i staff cyfrwng Cymraeg y Brifysgol. Drwy gefnogi adrannau’r Brifysgol mae’r Academi wedi galluogi cynnydd sylweddol yn nifer y pynciau sydd yn cael eu dysgu trwy’r Gymraeg yn Abertawe. Ymhlith y datblygiadau diweddaraf mae ein Tystysgrif Addysg i Raddedigion (TAR) er mwyn hyfforddi Athrawon Uwchradd y dyfodol mewn ystod o feysydd, ac mae’n cwrs Meddygaeth i ôl-raddedigion yn un uchel iawn ei barch.

Ysgoloriaethau a Bwrsariaethau Ôl-raddedig

Myfyriwr mewn darlith yn Ysgol y Gyfraith

Tystysgrif Addysg i Raddedigion

Tystysgrif Addysg i Raddedigion drwy gyfrwng y Gymraeg

Mae’r Brifysgol wedi ymrwymo’n llwyr i sicrhau pob cyfle i fyfyrwyr sydd am astudio'r cwrs Tystysgrif Addysg i Raddedigion drwy gyfrwng y Gymraeg ar gyfer yr holl lwybrau arbenigedd pwnc. Gallwch astudio o leiaf 80 credyd o’r cwrs hwn drwy gyfrwng y Gymraeg. Bydd cyfle i dderbyn darlithoedd, hyfforddiant, cyflwyno aseiniadau a mentora yn y Gymraeg. Mae’r Brifysgol hefyd yn gweithio yn agos gyda nifer o ysgolion Uwchradd Cymru, yn ogystal ag ysgolion cyfrwng Cymraeg penodol, megis; Ysgol y Strade, Ysgol Gyfun Gwyr, Ysgol Gyfun Gymraeg Bryn Tawe ac Ysgol Gymraeg Ystalyfera Bro Dur.

Meistr a Addysgir

Rhaglenni Meistr a Addysgir drwy gyfrwng y Gymraeg

Ar hyn o bryd mae nifer o adrannau’r Brifysgol yn datblygu ac yn cynnig modiwlau cyfrwng Cymraeg neu fodiwlau dwyieithog fel rhan o’u cyrsiau felly trafoda'r posibiliadau gyda Chyfarwyddwr y Rhaglen mae gen ti ddiddordeb ynddi. Mewn egwyddor mae modd cyflwyno traethawd estynedig a derbyn cymorth i astudio trwy gyfrwng y Gymraeg trwy waith yn Rhan 2 y cwrs gradd ar y rhaglenni isod. Mae Bwrsariaethau Llywodraeth Cymru gwerth £1,000 yr un ar gael i fyfyrwyr sy’n dewis astudio o leiaf 40 credyd o'u cwrs Meistr a Addysgir drwy gyfrwng y Gymraeg. Gall myfyrwyr sy’n dewis astudio cwrs cymwys mewn gwyddoniaeth, technoleg, peirianneg, mathemateg neu feddygaeth hefyd dderbyn bwrsariaeth ychwanegol o £2,000.

Ymhlith y pynciau lle gellid derbyn cymorth i astudio trwy gyfrwng y Gymraeg trwy waith yn Rhan 2 y cwrs gradd mae:

Astudiaethau Busnes

Saesneg

Daearyddiaeth

Hanes

Y Gyfraith

LLM mewn Ymarfer Cyfreithiol a Drafftio Uwch

Astudiaethau’r Cyfryngau a Chyfathrebu

Meddygaeth, Geneteg a Biocemeg

MSc mewn Meddygaeth Genomeg

Ieithoedd Modern a Chyfieithu

MA mewn Cyfieithu Proffesiynol

Gwaith Cymdeithasol

MSc mewn Gwaith Cymdeithasol

Cefnogaeth Ariannol ar gyfer Ôl-raddedigion o Gymru

Cefnogaeth Ariannol i Ôl-raddedigion

Bwrsariaethau Llywodraeth Cymru (Meistr a Addysgir)

Mae Llywodraeth Cymru wedi adnabod bod astudio drwy’r Gymraeg ar lefel ôl-raddedig o fantais sylweddol. Mae tri Chynllun Bwrsariaeth ar gael ar gyfer myfyrwyr o Gymru sy’n astudio cyrsiau Meistr a Addysgir ym Mhrifysgol Abertawe. Un o’r cynlluniau hynny yw Bwrsariaethau gwerth £1,000 yr un sy’n benodol i fyfyrwyr sy’n dewis astudio o leiaf 40 credyd trwy gyfrwng y Gymraeg. Am fanylion pellach, cer i dudalen Bwrsariaethau Llywodraeth Cymru ar gyfer Astudio Trwy'r Gymraeg.

Gall myfyrwyr sy’n dewis astudio cwrs cymwys mewn gwyddoniaeth, technoleg, peirianneg, mathemateg neu feddygaeth hefyd dderbyn bwrsariaeth ychwanegol o £2,000. Am fanylion pellach, cer i dudalen Bwrsariaethau Llywodraeth Cymru ar gyfer Pynciau STEMM.

Gall myfyrwyr 60 oed a hŷn o Gymru sy'n astudio gradd Meistr a Addysgir dderbyn bwrsariaeth gwerth £4,000. Am fanylion pellach, cer i dudalen Bwrsariaeth Llywodraeth Cymru ar gyfer Pobl 60+.

Ysgoloriaethau a Bwrsariaethau cyfrwng Cymraeg Academi Hywel Teifi

Mae cynllun Ysgoloriaethau a Bwrsariaethau cyfrwng Cymraeg Academi Hywel Teifi yn agored i fyfyrwyr sydd eisoes wedi dewis dod i Brifysgol Abertawe ac sydd yn dewis astudio trwy gyfrwng y Gymraeg lle bo cyfle, yn hytrach na thrwy’r Saesneg. Am fwy o wybodaeth ac i weld y pynciau sy'n gymwys, cer i dudalen Ysgoloriaethau Academi Hywel Teifi a Bwrsariaethau Academi Hywel Teifi.

Ysgoloriaeth Goffa Hywel Teifi

Mae Ysgoloriaeth Goffa Hywel Teifi ar gael ar gyfer myfyrwyr ôl-raddedig cyfrwng Cymraeg sydd am astudio gradd Meistr trwy Ymchwil, MPhil neu PhD mewn maes yn ymwneud â chyfraniad y diweddar Athro Hywel Teifi Edwards i ddysg a diwylliant Cymru, meysydd megis llenyddiaeth Gymraeg, yr iaith Gymraeg, y Cyfryngau, Gwleidyddiaeth neu Hanes.

Benthyciadau a Grantiau Tystysgrif Addysg i Raddedigion

Gall myfyrwyr sy'n astudio Tystysgrif Addysg Ôl-raddedig mewn Addysg (TAR) yn llawn amser neu'n rhan-amser gael arian i helpu gyda chostau'r cwrs, ar yr amod bod holl feini prawf cymhwysedd Cyllid Myfyrwyr yn cael eu bodloni.

Mae cyrsiau Tystysgrif Addysg Ôl-raddedig (TAR) yn derbyn yr un arian â chwrs gradd israddedig. Mae hyn yn golygu, os ydych yn gymwys, byddwch yn gallu cyflwyno cais am gymorth gyda ffioedd dysgu a chostau byw.

Gallai graddedigion sy'n dymuno astudio TAR mewn meysydd pwnc penodol fod yn gymwys am gymhellion hyfforddiant athrawon. Mae cymhellion hyfforddiant athrawon yn cael ei weinyddu gan Lywodraeth Cymru ac mae'n werth £20,000 (gan ddibynnu ar y maes pwnc a dosbarthiad gradd/meistr).

Am fanylion pellach, cer i dudalen Cyllid TAR

Cynllun Ysgoloriaethau Ymchwil y Coleg Cymraeg Cenedlaethol (PhD)

Mae Cynllun Ysgoloriaethau Ymchwil y Coleg Cymraeg Cenedlaethol yn cefnogi myfyrwyr sy’n astudio ar gyfer doethuriaeth trwy gyfrwng y Gymraeg. Mae ysgoloriaethau doethuriaeth diweddar a gyd-ariannwyd gan y Coleg Cymraeg a Phrifysgol Abertawe yn cynnwys meysydd Seicoleg, Cyfieithu, Cymraeg, Cemeg a Gwyddorau Biofeddygol. Am fanylion pellach, cer i wefan y Coleg Cymraeg Cenedlaethol neu cysyllta gyda Swyddog Cangen Prifysgol Abertawe i.l.owen@abertawe.ac.uk

Gwybodaeth bellach

I ddysgu am ffioedd ac ariannu cyffredinol y Brifysgol ar gyfer Ôl-raddedigion, cer i dudalen Ffioedd ac Ariannu.