Os nad oes modd i chi ddod i Ddiwrnod Agored, neu hoffech chi edrych o gwmpas eto, bydd ein taith hunan-dywys o'r campws yn rhoi blas i chi ar ein Prifysgol, ei champysau ger y traeth a'i bywyd bywiog i fyfyrwyr.
Mae gennym ddau gampws mewn lleoliadau nodedig ac unigryw, ar ddau ben glannau Abertawe: Campws Parc Singleton a Champws y Bae.
Adeilad rhestredig Gradd II yw Tŷ Fulton ac mae'n gartref i lawer o gyfleusterau a mannau lletygarwch y Brifysgol. Ar y llawr gwaelod ceir archfarchnad Costcutter, siop nwyddau'r brifysgol Fulton Outfitters, Greggs, a Tortilla.
Mae'r Ffreutur ar y llawr cyntaf lle mae Uni Food Hub yn darparu gwasanaeth clicio a chasglu a cheir teras sy'n rhoi golygfeydd godidog dros Fae Abertawe. Ar yr ail lawr mae bar a siop goffi Undeb y Myfyrwyr - JCs - lle mae amrywiaeth o fwyd a diodydd alcoholig a di-alcohol ar gael. Mae JCs yn cynnal nifer o ddigwyddiadau cymdeithasol i fyfyrwyr, fel nosweithiau karaoke a chwisiau tafarn a cheir byrddau pŵl a theledu yno hefyd. Mae Tŷ Fulton hefyd yn gartref i nifer o ystafelloedd addysgu a lleoliadau i gynnal digwyddiadau.
Wrth i chi adael drwy brif fynedfa Tŷ Fulton, trowch i'r chwith a cherddwch tua’r chwith rhwng ochr Tŷ Fulton a'r Techniwm Digidol. Ar y llwybr rhwng y ddau adeilad hyn ceir y rhan fwyaf o amwynderau sydd ar gael ar Gampws Singleton.
Mae nifer o amwynderau ar gael i fyfyrwyr ar Gampws Parc Singleton. Ar y dde mae Canolfan Ffydd y Goleudy, lle gallwch ddianc rhag yr awyrgylch prysur ac ymlacio. Mae ardal ymlacio â dwy soffa gyfforddus a bwrdd coffi lle gall pawb ddod i ymlacio i ffwrdd o fwrlwm y campws. Hefyd mae gennym gegin fach lle gallwch fwynhau paned o de neu fwg o goffi poeth ffres. Mae ystafell dawel hefyd y gall myfyrwyr a staff ei defnyddio at ddiben gweddïo, myfyrdod neu ymwybyddiaeth ofalgar.
Ar lawr gwaelod adeilad Penmaen (y tu ôl i Dŷ Fulton), ceir Canolfan Iechyd y Brifysgol, practis cyffredinol y GIG sy'n darparu gwasanaethau meddygol cynhwysfawr a chyfeillgar. I'r dde i adeilad Penmaen, mae deintyddfa yn Adeilad Horton sy'n cynnig ystod lawn o driniaethau'r GIG a phreifat.
Yn adeilad Horton, mae canolfan lles sy'n cynnig cymorth, cyngor a gwybodaeth i helpu pobl i wella eu hiechyd a'u lles. Mae Horton hefyd yn gartref i'r Gwasanaethau Llety Myfyrwyr (SAS Lettings), sef menter ar y cyd rhwng y Gwasanaethau Preswyl ac Undeb y Myfyrwyr sy'n cynnig llety o safon oddi ar y campws i fyfyrwyr. Wrth i chi gerdded i'r chwith a heibio i adeilad Penmaen, byddwch yn gweld yr adeiladau llety sydd ar gael i fyfyrwyr sy'n byw ar Gampws Singleton.
Mae gennym amrywiaeth o fathau o lety ar Gampws Parc Singleton: hunanarlwyo, arlwyo rhannol, ystafelloedd safonol ac en-suite sy'n addas i anghenion a chyllidebau pawb.
Mae tua 1,300 o fyfyrwyr yn byw yn ein llety ar y campws, sy'n cynnwys amrywiaeth o fflatiau hunanarlwyo ac arlwyo rhannol sy'n gartrefi i rhwng 8 ac 16 o fyfyrwyr. Mae'r blociau preswyl gwreiddiol - Cilfái, Preseli, Cefn Bryn a Rhosili - i gyd wedi cael eu hadnewyddu'n ddiweddar ar y tu mewn i gynyddu’r lle byw sydd ar gael i fyfyrwyr ac i greu ceginau ac ystafelloedd ymolchi mwy. Mae'r blociau llai, sef Oxwich, Caswell a Langland i gyd yn llety hunanarlwyo ac yn cynnig ystafelloedd en-suite. Penmaen a Horton yw'r blociau llety mwyaf newydd ac mae'r rhain i gyd yn llety en-suite a hunanarlwyo.
Mae'r holl breswylfeydd yn cynnig yswiriant cynnwys gydag Endsleigh a wi-fi sydd hefyd ar gael ar draws y campws. Mae ardaloedd dynodedig, gan gynnwys ardaloedd tawel, i fyfyrwyr aeddfed ac ardaloedd dim alcohol. Mae tîm diogelwch y campws a wardeiniaid lles ar ddyletswydd bob awr o'r dydd a'r nos. Trowch i'r chwith o adeilad Preseli a cherddwch tuag at Adeilad Richard Price.
Mae Adeilad Richard Price yn gartref i Ysgol y Gyfraith Hillary Rodham Clinton. Mae gan Ysgol y Gyfraith gysylltiadau cryf â’r proffesiwn, ac mae'n cynnig ystod lawn o gyfleoedd dysgu drwy brofiad, gan gynnwys ffug lysoedd barn, cyfweld â chleientiaid a negodi. Ceir ystod helaeth hefyd o gyfleoedd astudio ôl-raddedig sy'n paratoi myfyrwyr ar gyfer yr Arholiad Cymhwyso Cyfreithwyr (SQE). Mae'r adeilad hwn hefyd yn elwa o gyfleusterau creadigol sydd newydd eu creu. Yma gall myfyrwyr ymchwil ôl-raddedig a staff ymgymryd â gweithgareddau cydweithredol yn eu cymunedau eu hunain a chyda rhanddeiliaid allanol. Os cerddwch ymlaen tuag at flaen Campws Singleton gan droi i'r dde, byddwch yn dod o hyd i adeiladau'r Sefydliad Gwyddor Bywyd a Gwyddor Data.
Buddsoddwyd £100 miliwn yn adeiladau 1 a 2 y Sefydliad Gwyddor Bywyd er mwyn creu cyfleusterau addysgu ac ymchwil o'r radd flaenaf ym meysydd y gwyddorau bywyd ac ymchwil feddygol. Mae'r ddau adeilad yn rhan o'r Ysgol Feddygaeth ac maen nhw’n cynnwys dros chwe llawr o labordai ymchwil â'r cyfarpar diweddaraf, nifer o unedau 'deori', lleoedd i'w rhentu i gwmnïau newydd sy'n gweithio ym maes y gwyddorau bywyd a chyfleusterau ar gyfer peirianneg feddygol, gwyddoniaeth, gwyddorau iechyd, delweddu clinigol a threialon clinigol. Mae rhaglenni israddedig mewn geneteg/geneteg feddygol a biocemeg/biocemeg feddygol yn cael eu haddysgu yn y ddau adeilad hyn.
Yr adeilad gwyddor data yw'r adeilad mwyaf newydd ar Gampws Parc Singleton ac mae'n ganolbwynt ar gyfer ymchwil gwybodeg iechyd. Abertawe yw'r unig brifysgol yn y DU i gynnig y pwnc hwn fel gradd israddedig.
Y tu ôl i'r adeiladau hyn ceir Ysbyty Singleton a Pharc Chwaraeon Bae Abertawe. Gallwch gyrraedd Parc Chwaraeon Bae Abertawe drwy gerdded drwy diroedd Ysbyty Singleton.
Mae Parc Chwaraeon Bae Abertawe yn gartref i Bwll Nofio Cenedlaethol Cymru, sy'n un o ganolfannau Perfformio British Swimming, gan gynnwys pwll Olympaidd 50 metr o hyd a phwll cynhesu 25 metr o hyd. Mae llawer o athletwyr elît wedi defnyddio'r pwll i hyfforddi, gan gynnwys Ellie Simmonds a enillodd bedair medal aur yn y Gemau Paralympaidd.
Mae gan Barc Chwaraeon Bae Abertawe neuadd chwaraeon amlbwrpas, tri chwrt sboncen ac ystafell ffitrwydd â thros 80 o eitemau cyfarpar. Cafodd y cyfleusterau hyn eu gwella'n ddiweddar i gynnwys trac athletau wyth lôn newydd, dau gae awyr agored pob tywydd a chanolfan hyfforddi dan do ar gyfer athletau. Trowch i'r chwith wrth ILS1 a dilynwch y ffordd i lawr rhwng adeiladau Glyndŵr a Wallace.
Ar yr ochr chwith, gwelwch adeilad Glyndŵr a Thŵr Vivian, sy'n gartref i'n Cyfadran Meddygaeth, Iechyd a Gwyddor Bywyd, yn ogystal â Ffiseg. Mae'r pynciau'n sy’n cael eu haddysgu yma’n cynnwys Nyrsio, Bydwreigiaeth, Gwyddor Barafeddygol, Osteopatheg, Clywedeg, Ffiseg Feddygol, Technoleg Glinigol, Gwyddor Feddygol, Therapi Galwedigaethol a Seicoleg. Gan weithio'n agos gyda byrddau iechyd lleol y GIG, mae'r Gyfadran yn cynnig amrywiaeth o ystafelloedd ymarfer sy'n creu amgylchedd clinigol realistig i'r disgyblaethau gofal iechyd, gan gynnwys pynciau Gofal Iechyd, Gwyddor Barafeddygol a Nyrsio. Mae pob ystafell yn efelychu amrywiaeth eang o leoliadau clinigol realistig. Hefyd, mae gennym sawl labordy arbenigol, gan gynnwys mesuriad EMC/ECG seicoffysiolegol a ddefnyddir gan ein hadran Seicoleg. Roedd yr adran Seicoleg ar y brig yn y DU am effaith ei hymchwil. Drws nesaf i adeilad Glyndŵr y mae Adeilad Grove.
Mae adeilad Grove yn gartref i Gemeg a Meddygaeth, lle mae meddygon a gwyddonwyr bywyd yn cael eu hyfforddi. Mae'r cyfleusterau'n cynnwys ystafell anatomeg, labordy sgiliau clinigol, ystafelloedd fferylliaeth a'r ICM, yn ogystal â labordai newydd sbon a adeiladwyd i'r diben a'u hagor yn 2017. Mae'r lleoedd addysgu hyn yn galluogi myfyrwyr i ddysgu rhagor am ymarfer clinigol mewn lleoliad efelychu. Gyferbyn â'r brif fynedfa i adeilad Glyndŵr ac adeilad Grove, ceir adeilad Wallace.
Mae adeilad Wallace yn gartref i'r Biowyddorau a Daearyddiaeth. Mae Prifysgol Abertawe wedi buddsoddi £4.2 miliwn mewn labordai newydd, yn ogystal ag £1.3 miliwn mewn Canolfan Ddelweddu newydd. Mae'r cyfleusterau’n cynnwys clwstwr cyfrifiaduron a meddalwedd ddyfeisgar a ddatblygwyd yn fewnol er mwyn ymdrin â'r data o dagiau sy'n monitro symudiad anifeiliaid i arddangos gwybodaeth aml-ddimensiwn mewn ffurfweddau arloesol ar ein llong ymchwil, Mary Anning, sy'n cael ei defnyddio ar gyfer addysgu a gwaith prosiect. Mae adeilad Wallace hefyd yn gartref i'r Ganolfan ar gyfer Ymchwil Dyfrol Cynaliadwy, CSAR, sy'n cynnwys systemau dyframaeth ailgylchredeg y gellir eu rhaglennu'n llawn. Mae CSAR yn ymgymryd ag ymchwil gymhwysol i amrywiaeth eang o organeddau dyfrol, o amgylcheddau tymherus i drofannol a rhai morol i ddŵr croyw. Mae labordy opteg a labordy addysgu'r adran Ffiseg yma hefyd.
Yn ôl ar gampws y Brifysgol, dilynwch y llwybr ar hyd blaen Tŷ Fulton (ar eich chwith) nes i chi gyrraedd y Techniwm Digidol.
Y Techniwm Digidol yw canolbwynt Cyfadran y Dyniaethau a'r Gwyddorau Cymdeithasol ar Gampws Singleton. Mae'n gartref i dîm Gwybodaeth a Phrofiad Myfyrwyr sy'n darparu amrywiaeth o wasanaethau cymorth i fyfyrwyr, gan gynnwys arweiniad ar leoliadau gwaith a chyngor ar yrfaoedd. Mae nifer o leoedd cymdeithasol ac astudio yma hefyd sydd ar gael i fyfyrwyr eu defnyddio drwy'r dydd a'r tu allan i oriau gwaith.
Yn yr adeilad hwn ceir Clinig y Gyfraith Abertawe, sy'n rhoi cyfle i'n myfyrwyr weithio ochr yn ochr â chyfreithwyr gan gynghori cleientiaid go iawn a helpu'r gymuned leol drwy gynnig cyngor cychwynnol am ddim ar broblemau cyfreithiol.
Mae'r Techniwm Digidol hefyd yn gartref i Labordy Arloesi Cyfreithiol a Chanolfan Ymchwil i Seiberfygythiadau, ac mae Hyb Cyfryngau Byw yn cael ei gynllunio a'i ddatblygu, gan ddangos ymrwymiad y Gyfadran i gyfoethogi dysgu drwy ymchwil. Gyferbyn â'r Techniwm Digidol y mae Adeilad Faraday (ac Adeilad Talbot yn uniongyrchol y tu ôl iddo).
Mae gan Adeilad Faraday ystafelloedd addysgu a darlithfeydd mawr, labordai ymchwil a labordai cyfrifiaduron. Mae'r adeilad wedi cael ei adnewyddu'n ddiweddar i wella cyfleusterau ar gyfer myfyrwyr.
Mae Tŵr Faraday yn gartref i Undeb y Myfyrwyr a'i chwe swyddog amser llawn etholedig sydd ar gael bob dydd ac yn cynrychioli gwahanol agweddau ar gylch gorchwyl yr Undeb. Mae Undeb y Myfyrwyr yn gweithio ar gampws y Bae a Champws Parc Singleton, gan reoli pedair siop, tri bar ac mae hefyd yn cynnal dros 280 o ddigwyddiadau ar gyfer myfyrwyr bob blwyddyn.
Mae Undeb y Myfyrwyr hefyd yn gyfrifol am dros 100 o glybiau chwaraeon a chymdeithasau, gan amrywio o Amnest Rhyngwladol, clwb trafod a chymdeithasau penodol i bynciau, i chwaraeon megis rygbi, nofio, codi hwyl a ffrisbi eithafol sydd bob amser yn boblogaidd, i gymdeithasau ar gyfer y rhai sy'n angerddol am faes penodol megis 'Disney' a ffasiwn. Mae rhagor o wybodaeth am ein clybiau a'n cymdeithasau ar gael ar wefan Undeb y Myfyrwyr.
Yn Faraday hefyd, byddwch yn dod o hyd i'r Ganolfan Cyngor a Chymorth sy'n cael ei rheoli gan Undeb y Myfyrwyr a thîm o gynghorwyr hyfforddedig i ddarparu cyngor a chynrychiolaeth cyfrinachol a diduedd am ddim. Gallant eich helpu gyda nifer o faterion cyfreithiol a phersonol, gan gynnwys arian, lles, materion academaidd, tai, ac anawsterau iechyd meddwl.
Mae Tîm EWCH YN FYD-EANG yn gweithio yn adeilad Talbot hefyd. Mae Tîm Ewch yn Fyd-eang, sy'n rhan o'r Swyddfa Datblygu Rhyngwladol, yn helpu myfyrwyr ym Mhrifysgol Abertawe i achub ar nifer o gyfleoedd dramor. Mae hyn yn cynnwys blwyddyn neu semester dramor, yn astudio yn un o'n prifysgolion partner neu'n cwblhau lleoliad gwaith neu leoliad cynorthwy-ydd addysgu. Bydd y cyfleoedd sydd ar gael yn dibynnu ar eich maes pwnc. Mae'r tîm hefyd yn cynorthwyo myfyrwyr a hoffai gael profiad gwirfoddoli, diwylliannol neu academaidd yn ystod yr haf, drwy amrywiaeth o raglenni rhyngwladol sy'n agored i fyfyrwyr ar bob cynllun gradd. Mae manylion llawn ar gael ar-lein yn ar dudalen we Ewch yn Fyd-eang, ynghyd â gwybodaeth am y cyllid a'r cymorth sydd ar gael. Wrth i chi adael Adeilad Faraday, bydd Canolfan y Celfyddydau Taliesin a'r Ganolfan Eifftaidd ar eich chwith.
Theatr ar y campws â seddi i 300 yn yr awditoriwm yw Canolfan y Celfyddydau Taliesin. Mae'n cael ei defnyddio'n wythnosol gan fyfyrwyr ac ymwelwyr sy'n mwynhau rhaglen lawn o ffilmiau, dawns, cerddoriaeth fyw a pherfformiadau theatraidd, gan gynnwys darllediadau wedi'u ffrydio'n fyw o leoliadau megis y Tŷ Opera Brenhinol a'r Royal Shakespeare Company. Mae gostyngiadau ar gael i fyfyrwyr Prifysgol Abertawe sy'n cyflwyno cerdyn myfyriwr.
Agorwyd Creu Taliesin ym mis Mawrth 2018 i fod yn lleoliad astudio hyblyg a chynhwysol i fyfyrwyr, staff a'r gymuned ehangach. Mae Creu Taliesin yn cynnig lle astudio agored i grwpiau ac unigolion, ynghyd â mannau cwrdd a sgrîn werdd at ddiben ffilmio.
Mae'r Ganolfan Eifftaidd yn amgueddfa o bwys rhyngwladol sy'n gartref i gasgliad cyffrous o dros 5,000 o arteffactau o'r Hen Aifft, y casgliad mwyaf o’i fath yn y DU y tu allan i Lundain. Wrth gerdded ar hyd y rhodfa, byddwch yn mynd heibio i'r Llyfrgell a Chanolfan Wybodaeth ar y dde ac Adeilad Keir Hardie a James Callaghan ar y chwith.
Ar agor bob awr o’r dydd a’r nos, 362 o ddiwrnodau'r flwyddyn. Dyma le mae'r timau cymorth TG, Cyngor ar Yrfaoedd a'r llyfrgellwyr pwnc arbenigol yn gweithio. Mae'r llyfrgell yn rhoi mynediad at fwy na 900,000 o eitemau argraffedig a chasgliad mawr o e-adnoddau. Ceir dros 1,100 o fannau astudio hefyd a thua 400 o gyfrifiaduron personol sy'n cynnig cyfleusterau e-bost a'r rhyngrwyd am ddim ac yn ddi-derfyn. Mae wifi ar gael am ddim ym mhob rhan o'r campws ac yn llety'r Brifysgol.
Mae'r Tîm Gwasanaeth Cwsmeriaid wrth y ddesg wybodaeth yn gallu ateb eich holl ymholiadau am bob un o'r gwasanaethau hyn.
Mae hefyd yn gartref i MyUni Hub, sydd ar agor o ddydd Llun i ddydd Gwener rhwng 0830 a 1730 lle bydd staff hyfforddedig ac ymroddedig iawn wrth law i ymdrin ag unrhyw gwestiynau neu bryderon. Yma gallwch ddod o hyd i'r brif dderbynfa ar gyfer Gwasanaethau Cymorth Myfyrwyr, y Swyddfa Datblygu Rhyngwladol, y Swyddfa Arian, y Swyddfa Cyngor a Chymorth Ariannol a'r Swyddfa Anableddau.
Yn gartref i nifer o bynciau yng Nghyfadran y Dyniaethau a'r Gwyddorau Cymdeithasol, mae Keir Hardie a James Callaghan yn darparu cyfleusterau addysgu sy'n cyfoethogi profiad y myfyrwyr, gan gynnwys labordai cyfrifiaduron, stiwdio deledu, ystafell gyfieithu a chyfieithu ar y pryd ac ystafell realiti rhithwir.
Mae adeilad James Callaghan hefyd yn gartref i'r adrannau Hanes, y Clasuron, Eifftoleg, Gwleidyddiaeth a Chysylltiadau Rhyngwladol, Athroniaeth, PPE (Athroniaeth, Gwleidyddiaeth ac Economeg) ac Astudiaethau Americanaidd. Yn islawr adeilad James Callaghan mae siop goffi Callaghan’s ar ei newydd wedd - 'Change Please' - yn gwerthu amrywiaeth o ddiodydd poeth ac oer a bwyd. Mae lleoliad profiad myfyrwyr hefyd newydd gael ei greu yn yr adeilad hwn, nesaf at y siop goffi.
Mae adeilad Keir Hardie yn gartref i'r adrannau Addysg ac Astudiaethau Plentyndod Cynnar, Economeg, Cymraeg, Troseddeg, Ieithoedd Modern, Saesneg ac Ysgrifennu Creadigol, Ieithyddiaeth Gymhwysol ac Ieithoedd Modern. Hefyd, mae gan yr adeilad ystafell greadigol sydd newydd ei chreu er mwyn i fyfyrwyr a staff ymchwil ôl-raddedig ymgymryd â gweithgarwch cydweithredol yn eu cymunedau eu hunain ac ar y cyd â rhanddeiliaid/partneriaid allanol.
Mae myfyrwyr yn cymryd rhan mewn teithiau maes yn y DU a thramor, a chânt gyfle i gydweithredu â'r Ganolfan Eifftaidd a'r Senedd drwy fodiwlau. Cânt eu cefnogi hefyd i gael profiad gwaith mewn amrywiaeth eang o sectorau, o'r heddlu i gyhoeddi. Cerddwch ymlaen heibio i Adeilad James Callaghan ac mae Abaty Singleton yn uniongyrchol o'ch blaen.
Mae Abaty Singleton yn gartref i nifer mawr o adrannau gweinyddol y Brifysgol. Ar un adeg yr adeilad hwn oedd cartref y Teulu Vivian, a oedd yn berchen ar brif weithfeydd cynhyrchu copr yr ardal yn y bedwaredd ganrif ar bymtheg. Adeilad ffug-gothig o'r bedwaredd ganrif ar bymtheg ydyw'n bennaf, ond mae rhannau o'r adeilad rai canrifoedd yn hŷn. Os dilynwch y llwybr i'r dde, byddwch yn mynd heibio i'r gerddi addurnol ac yn cyrraedd blaen yr adeilad, sy'n cynnig golygfeydd godidog dros Fae Abertawe. Cynhelir Dawns Haf Flynyddol Undeb y Myfyrwyr ar Ddôl yr Abaty, sy'n troi'n safle gŵyl fach am y dydd ynghyd â thri llwyfan, ffair a dewis o fariau a stondinau bwyd. Mae’r prif berfformwyr yn y gorffennol wedi cynnwys Pixie Lott, Florence and the Machine a Jonas Blue. Gan barhau drwy'r maes parcio o flaen Abaty Singleton a throi i'r chwith, byddwch yn cyrraedd un o fynedfeydd Parc Singleton - y parc dinesig mwyaf yn Abertawe. Os hoffech ddychwelyd i fan cychwyn eich taith y tu allan i Dŷ Fulton, trowch i'r chwith yn lle mynd i mewn i'r parc a cherddwch yn ôl ar hyd y rhodfa nes i chi gyrraedd y cylchfan.
Y Neuadd Fawr eiconig yw'r adeilad cymynrodd a roddwyd gan BP i Brifysgol Abertawe. Mae ganddi naw lle addysgu, gan gynnwys darlithfeydd â 300 o seddi rhenciog ac ystafelloedd seminar ag 20 sedd.
Ar y llawr cyntaf ceir Awditoriwm Syr Stanley Clarke sydd ar agor i'r cyhoedd ac sy'n cynnig lle i 700 o bobl mewn cynadleddau, cyngherddau cerddoriaeth, seremonïau graddio, darlithoedd cyhoeddus a digwyddiadau mawr eraill.
Cerddwch tuag at flaen y Campws i ddod o hyd i'r Ffowndri Gyfrifiadol sydd gyferbyn â'r safle bws.
Wedi'i hagor yn 2018 yn sgil buddsoddiad gwerth £32.5 miliwn, mae'r Ffowndri Gyfrifiadol yn ganolfan o safon fyd-eang i gynnal ymchwil gyfrifiadol ac mae'n gartref i'r adrannau Cyfrifiadureg a Mathemateg. Y meysydd ymchwil craidd yn y pynciau hyn yw seiberddiogelwch, technolegau iechyd a chyffredinolrwydd y digidol yn ein bywydau beunyddiol. Ceir yma cyfleusterau ymchwil sy'n cynnwys labordy golwg a biometrig, labordy gwneuthurwyr, labordy damcaniaeth, labordy seiberddiogelwch/rhwydweithio, labordy defnyddwyr ac ystafell ddelweddu.
Y tu ôl i'r Ffowndri Gyfrifiadol ceir Adeilad Gogleddol Peirianneg, yr Ystafell Ddosbarth Weithredol a'r Swyddfa Weithredol. Cerddwch ar hyd y llwybr rhwng y Ffowndri Gyfrifiadol ac Adeilad Canolog Peirianneg a dilynwch y llwybr i lawr. Ar ochr chwith y llwybr ceir Adeilad Gogleddol Peirianneg, Impact a'r Ystafell Ddosbarth Weithredol a'r Swyddfa Weithredol yn ogystal ac ISM ac ESRI.
IMPACT yw'r sefydliad ymchwil ar gyfer deunyddiau arloesol, prosesu a thechnolegau rhifiadol. Canolfan amlddisgyblaethol a chydweithredol ydyw ar gyfer diwydiant a'r gymuned academaidd. Mae ganddo dri labordy sy'n canolbwyntio ar beirianneg fiofeddygol, fecanyddol, awyrofod a chemegol.
Yr Ystafell Ddosbarth Weithredol yw prosiect adeilad arddangos maint llawn diweddaraf SPECIFIC sy'n cynnwys labordy ac ystafell ddosbarth a chaiff ei ddefnyddio i addysgu myfyrwyr. Mae'r Ystafell Ddosbarth yn cynhyrchu ei hynni ei hun gan ddefnyddio technoleg arloesol.
Y Swyddfa Weithredol yw'r swyddfa ynni gweithredol gyntaf sy'n gallu cynhyrchu mwy o ynni na'r hyn mae'n ei ddefnyddio gan gynnig lle i 40 o aelodau staff.
Mae'n gartref i Ganolfan Technoleg Rolls-Royce y Brifysgol lle gwneir ymchwil i beiriannau tyrbin nwy awyrennau. Caiff ei ddefnyddio at gyfuniad o ddibenion academaidd a masnachol.
Dyma ganolfan ymchwil gydweithredol sy'n manteisio ar gryfder y Coleg Peirianneg yn y sector ynni, gan ganolbwyntio ar y materion diogelwch sy'n gysylltiedig â datblygu ac ehangu prosesau ynni sydd eisoes yn bodoli.
Mae ei hymchwil yn canolbwyntio ar danwyddau cynaliadwy, e.e. prosesu cemegol, ynni morol a'r llanw.
Mae'r Ganolfan Deunyddiau Lled-ddargludol Integreiddiol nesaf at ESRI.
Mae'r Ganolfan Deunyddiau Lled-ddargludol Integreiddiol (CISM) yn adeilad newydd sbon a agorwyd yn yr ardal beirianneg ym mis Hydref 2022. Bydd y lleoliad hwn yn hwyluso gwaith ar y cyd a chyfle i rannu cyfleusterau â'r adeiladau peirianneg presennol sydd o gwmpas.
Mae gan yr adeilad tri llawr 4320 metr sgwâr o ystafelloedd glân, cyfleusterau ymchwil a swyddfeydd. Mae'r adeilad yn defnyddio technegau adeiladu cynaliadwy ac ynni effeithlon a thechnoleg ynni adnewyddadwy gan gynnwys technoleg ffotofoltäig solar ac adfer gwres. Cerddwch yn ôl yr un ffordd tuag at y lawnt a chroeswch yr heol i gyrraedd y tŵr cloc ar y stryd fanwerthu.
Canolfan Wybodaeth y Tŵr yw'r brif dderbynfa ar gyfer Gwasanaethau Cymorth Myfyrwyr, y Swyddfa Datblygu Rhyngwladol, y Swyddfa Arian, y Swyddfa Cyngor a Chymorth Ariannol a'r Swyddfa Anableddau.
Mae'r cyfleuster hwn o'r enw My Uni Hub ar agor o ddydd Llun i ddydd Gwener, rhwng 08.30 a 17.30. Mae staff hyfforddedig ac ymroddedig iawn wrth law i ateb unrhyw gwestiynau neu bryderon. Mae swyddfa Cartrefi Myfyrwyr St Modwen yng Nghanolfan Wybodaeth y Tŵr hefyd ac mae'n ymdrin â gofynion gweithredol o ddydd i ddydd llety ar Gampws y Bae Prifysgol Abertawe. Mae'n darparu gwasanaethau gweinyddu, derbynfa, gofalwyr, glanhau, diogelwch, dosbarthu post, cadw a chynnal tiroedd, rheoli gwastraff ac ailgylchu.
Cerddwch i mewn i'r ardal breswyl ar y llwybr rhwng Tesco's a'r Tŵr i weld yr adeiladau preswyl sydd ar gael i fyfyrwyr ar Gampws y Bae.
Mae 2000 o fyfyrwyr yn byw ar Gampws y Bae. Enwyd pob preswylfa ar ôl brenhinoedd, breninesau a chestyll Cymru.
Mae'r llety ar Gampws y Bae i gyd yn newydd sbon, en suite â gwelyau tri chwarter. Dyluniwyd y llety gan Sefydliad Ymddiriedolaeth y Tywysog ac mae'n cynnig awyrgylch yn debyg i goleg yn America. Darperir yswiriant cynnwys gan Endsleigh ac mae Wi-fi ar gael yn yr holl fflatiau.
Mae ardaloedd wedi'u neilltuo i fyfyrwyr aeddfed, rhai sydd am amgylchedd tawel, di-alcohol a myfyrwyr ag alergedd cnau. Mae golchdy, banc a siop gyffredinol ar y safle hefyd. Mae'r Brifysgol yn darparu staff diogelwch a Wardeiniaid Lles ar y campws sydd ar ddyletswydd 24 awr y dydd drwy gydol y flwyddyn.
Trowch i'r chwith i'r cwadrangl nesaf i ymweld â Chwaraeon Abertawe a'r UNIGym
Mae Chwaraeon Abertawe yn gyfrifol am y clybiau chwaraeon sy'n rhan allweddol o fywyd yn y brifysgol. Yn yr adeilad hwn ceir Neuadd Chwaraeon sy'n addas i gynnal gemau pêl-fasged, badminton, pêl-rwyd, pêl-foli, cleddyfaeth a saethyddiaeth. Mae gennym gampfa (UniGym) arall hefyd â dwy ystafell sy'n cynnig dewis o gyfarpar cardiofasgwlaidd yn ogystal â phwysau rhydd a pheiriannau gwrthiant. Mae Chwaraeon Abertawe'n gyfrifol am dros 50 o glybiau chwaraeon sy'n amrywio o Focsio a Hwylio i Ffrisbi Eithafol.
Ewch allan i'r stryd fanwerthu ar y brif ffordd rhwng preswylfeydd y myfyrwyr i weld y mannau arlwyo a lletygarwch.
Cuddfan Gymdeithasol Abertawe (Swansea Social Hideaway) yw enw'r prif gwrt bwyd ar y campws ac mae'n cynnig ardal fawr, gyfoes a hyblyg sy'n darparu amrywiaeth o arddulliau a dewisiadau bwyd.
Bar a chaffi bywiog yw Tafarn Tawe sy'n gwerthu bwyd a diodydd, yn cynnal nosweithiau thema ac yn dangos chwaraeon byw ar y sgrîn fawr. Mewn lleoliad cyfleus nesaf at Dafarn Tawe ceir Tesco Express a Subway. Os ewch dros y ffordd o'r stryd fanwerthu, byddwch yn gweld adeilad newydd y Twyni.
Y Twyni, yw’r adeilad mwyaf newydd ar Gampws y Bae ac mae’n cynnig amrywiaeth o fannau i gynnal cyfarfodydd a digwyddiadau. Mae'r adeilad deulawr yn cynnwys mannau addysgu mawr, cynllun agored, ar y llawr gwaelod ac ystafelloedd addysgu llai a labordai cyfrifiaduron ar y llawr cyntaf. Mae’n lleoliad perffaith i gynnal cynadleddau, digwyddiadau ac arddangosiadau llai, neu gellir ei ddefnyddio i gynnal sesiynau ymneilltuo ychwanegol ar gyfer digwyddiadau mwy sy'n cael eu cynnal ar Gampws y Bae.
Mae gan Undeb y Myfyrwyr swyddfa yn y Twyni hefyd. Mae gan Undeb y Myfyrwyr chwe swyddog amser llawn etholedig sydd ar gael bob dydd ac yn cynrychioli agweddau gwahanol ar gylch gorchwyl yr Undeb. Mae Undeb y Myfyrwyr yn gweithio ar gampws y Bae a Champws Parc Singleton, gan reoli pedair siop a thri bar ac mae'n cynnal dros 280 o ddigwyddiadau ar gyfer myfyrwyr bob blwyddyn.
Mae Undeb y Myfyrwyr hefyd yn gyfrifol am dros 100 o glybiau chwaraeon a chymdeithasau, gan amrywio o Amnest Rhyngwladol, clwb trafod a chymdeithasau penodol i bynciau, i chwaraeon megis rygbi, nofio, codi hwyl a ffrisbi eithafol sydd bob amser yn boblogaidd, i gymdeithasau ar gyfer y rhai sy'n angerddol am faes penodol megis 'Disney' a ffasiwn. Mae rhagor o wybodaeth am ein clybiau a'n cymdeithasau ar gael ar wefan Undeb y Myfyrwyr. O'r tu ôl i adeilad Y Twyni, cerddwch tuag at Y Coleg.
Y Coleg, Prifysgol Abertawe, yw darparwr rhaglenni llwybrau rhyngwladol y Brifysgol. Drwy gyfuniad o ddatblygu gwybodaeth a sgiliau academaidd cyffredinol a phenodol i bynciau, mae ein cyrsiau Sylfaen, Rhyngwladol Blwyddyn Un a Chyn-feistr yn cynnig ymagwedd unigryw at addysg, sy'n trawsnewid myfyrwyr rhyngwladol yn raddedigion Prifysgol Abertawe ac yn ddysgwyr gydol oes.
Mae gan Y Coleg, Prifysgol Abertawe, athroniaeth addysgu gefnogol ac wedi'i phersonoli, sy'n annog myfyrwyr i gyflawni eu potensial academaidd mwyaf ac yn eu cynorthwyo i bontio'n llwyddiannus i astudio yn y brifysgol, i'r gweithle ar ôl y brifysgol ac, yn wir, i fywyd yn y DU. Mae ein hadeilad academaidd ar y campws ar lan y môr yn cynnwys mannau astudio a chymdeithasol, yn ogystal â siop goffi Costa tua'r cefn ac mae ar agor i holl fyfyrwyr Prifysgol Abertawe. Dilynwch y llwybr nes i chi gyrraedd tu allan i'r Ysgol Reolaeth.
Dyma gartref Rheoli Busnes, Cyfrifeg a Chyllid, Marchnata a Thwristiaeth. Yn y dderbynfa byddwch yn dod o hyd i'r tîm Gwybodaeth a Phrofiad Myfyrwyr sy'n gwasanaethu Cyfadran y Dyniaethau a'r Gwyddorau Cymdeithasol. Y tîm hwn yw'r pwynt cyswllt canolog ar gyfer myfyrwyr sy'n astudio neu'n byw ar Gampws y Bae ac mae'n cynnig mynediad at amrywiaeth o wasanaethau cymorth myfyrwyr, gan gynnwys arweiniad ar leoliadau gwaith a chyngor ar yrfaoedd.
Mae'r adeilad hefyd yn cynnwys nifer o gyfleusterau sy'n cyfoethogi profiad dysgu'r myfyrwyr, gan gynnwys labordy cyllid sy'n cynnig y feddalwedd a'r galedwedd ddiweddaraf i ategu damcaniaeth a ddysgir yn yr ystafell ddosbarth a datblygu amrywiaeth eang o sgiliau trosglwyddadwy allweddol, gan gynnwys dadansoddeg data, datrys problemau a llythrennedd digidol.
Cafodd y lle a adeiladwyd at y diben ei greu a'i ddylunio i hwyluso addysgu, gweithio mewn grwpiau ac astudio unigol.
Cerddwch i lawr y llwybr rhwng yr Ysgol Reolaeth a'r Neuadd Fawr. Ar eich chwith gwelwch y cyfleusterau chwaraeon awyr agored, sef yr ardaloedd gemau amlddefnydd (MUGAs).
Mae'r rhain yn ddelfrydol ar gyfer chwarae pêl-droed, rygbi a chwaraeon pêl eraill. Mae cyfleoedd hefyd i chwarae pêl-foli traeth, pêl-droed traeth a ffrisbi eithafol. Mae'r ardaloedd awyr agored hyn ar gael i fyfyrwyr, staff ac aelodau'r gymuned eu defnyddio. Ewch ymlaen tua'r traeth y tu ôl i Gampws y Bae.
Mae'n swyddogol! Prifysgol Abertawe yw'r brifysgol agosaf at draeth yn y byd, ac mae ganddi ei hardal breifat ei hun ar y traeth nesaf at y campws i fyfyrwyr ei mwynhau. Trowch yn ôl tua blaen y campws a cherddwch tuag at ochr dde'r campws. Ar y dde ceir Llyfrgell Campws y Bae.
Ar agor bob awr o'r dydd a'r nos, 362 o ddiwrnodau'r flwyddyn. Yma byddwch yn dod o hyd i gymorth TG, cyngor ar yrfaoedd a llyfrgellwyr pwnc arbenigol.
Mae'r Tîm Gwasanaeth Cwsmeriaid wrth y ddesg wybodaeth yn gallu ateb eich holl ymholiadau am bob un o'r gwasanaethau hyn. Mae staff ar ddyletswydd rhwng 8am a chanol nos o ddydd Llun i ddydd Gwener a rhwng 10am a chanol nos ar ddydd Sadwrn a dydd Sul yn ystod y tymor. Maen nhw'n helpu gyda chysylltu â'r Wifi, cymorth gyda dyfeisiau a dod o hyd i adnoddau'r llyfrgell. Ceir tua 500 o fannau astudio mewn grwpiau ac astudio unigol, ardaloedd astudio tawel a desgiau â chyfrifiadur.
Adeilad Canolog Peirianneg yw prif ganolbwynt gweinyddol ac academaidd yr Ardal Beirianneg ac mae'n cynnwys derbynfa, ystafelloedd addysgu, labordai a gweithdai.
Cyn hir, bydd myfyrwyr yn gallu elwa o'r dechnoleg ddiweddaraf - dau efelychydd hedfan Merlin sy'n gallu darparu delweddu 3D hynod soffistigedig a'r gallu i fapio tir yn y byd go iawn, ynghyd â thwnnel gwynt y buddsoddwyd £1.2 miliwn ynddo a chyfarpar peilot sy'n bodloni safonau diwydiant at ddefnydd myfyrwyr Peirianneg Gemegol.
Yn y man astudio BASE a'r Caffi Mathemateg, gall myfyrwyr gael cymorth gyda CAD, mathemateg a sgiliau ysgrifennu mewn grwpiau neu'n unigol.
Yng nghlos Adeilad Canolog Peirianneg ceir Coffeeopolis, lle gwych i fyfyrwyr eistedd ac ymlacio dros latte 'Change Please'.
Eisiau parhau ag archwilio? Beth am fynd ar daith rithwir o'n prifysgol a chymryd cipolwg agosach ar ein neuaddau a'n cyfleusterau.
