Ar ôl gwneud cais i Brifysgol Abertawe

Fel arfer, rydyn ni’n derbyn dros 1,000 o geisiadau yr wythnos yn ystod y cyfnodau prysuraf, ond rydyn ni’n gwneud ein gorau glas i roi gwybod i chi am ein penderfyniad cyn gynted ag y bo modd.

Pan fyddwn yn derbyn eich cais, byddwn yn anfon e-bost atoch i roi gwybod i chi. Yna mae’r Tîm Derbyniadau yn cynnal gwiriadau ar bob cais ac yn tynnu sylw at wybodaeth bwysig i’r Dewiswyr Derbyniadau (megis prif gymwysterau, graddau rhagfynegol neu wybodaeth berthnasol o’r datganiad personol).

Os oes unrhyw wybodaeth ar goll yn eich cais - megis cyfeiriad academaidd, neu os nad yw’n glir pa gymwysterau sydd gennych - byddwn yn cysylltu â chi drwy e-bost i ofyn am wybodaeth ychwanegol a fydd yn ein helpu i wneud y penderfyniad mwyaf addas.

Unwaith y bydd yr holl wiriadau wedi’u cwblhau, mae’r cais yn cael ei basio ymlaen at ein Dewiswyr Derbyniadau, a fydd yn ystyried eich cais.

Mae gan bob un o'n hadrannau neu ein hysgolion Ddewiswr Derbyn Myfyrwyr a fydd yn adolygu'ch cais. Byddant yn asesu eich graddau a ragwelir a pherfformiad academaidd blaenorol, yn ogystal â'ch geirda a'ch datganiad personol, a byddant yn defnyddio'r wybodaeth hon i benderfynu a allwn gynnig lle i chi ar y cwrs.

Os ydych chi’n ymgeisydd sydd ag anabledd ddifrifol neu gyflwr meddygol cronig, neu os oes gennych anghenion cymorth sylweddol, byddwn yn anfon holiadur atoch i asesu eich anghenion cymorth. Efallai y bydd angen i chi gael cyfweliad gyda Swyddog Anabledd y Brifysgol a/neu Gyfarwyddwr Iechyd Galwedigaethol ar ôl i’r penderfyniad academaidd gael ei wneud.

Gwneir hyn i sicrhau ein bod yn ymwybodol o unrhyw amgylchiadau a allai effeithio ar eich derbyn i’r Brifysgol, a’ch astudiaethau wedyn, ac i sicrhau y gallwn roi ar waith unrhyw systemau cymorth y gallech eu hangen.

Unwaith y bydd y Dewiswr Derbyniadau wedi ystyried y cais yn llawn, caiff y penderfyniad ei fewnbynnu i’n systemau ac yna ei anfon at UCAS.

Bydd UCAS yn rhoi gwybod i chi’n ffurfiol a yw’r Brifysgol yn cynnig lle i chi, gan gynnwys unrhyw amodau y mae’n rhaid eu bodloni cyn dechrau’r flwyddyn academaidd. Bydd y manylion yn ymddangos yn eich Hwb UCAS - byddwch yn cael hysbysiad gan UCAS yn dweud bod diweddariad ar gael. Yna gallwch fewngofnodi a gweld unrhyw benderfyniad sydd wedi’i anfon atoch.

Gallwch hefyd ddefnyddio’r UCAS Hub i dderbyn neu wrthod cynigion, unwaith y byddwch wedi cael ymateb gan bob un o’ch dewisiadau. Gallwch hefyd newid rhai manylion personol, megis eich cyfeiriad post, eich rhif ffôn a’ch cyfeiriad e-bost.

Nid yw unrhyw gynigion derbyn a wneir drwy ddulliau eraill yn cael eu hystyried yn rhwymol yn gyfreithiol. Ni ddylid ystyried unrhyw awgrym o dderbyn gan aelod o staff unrhyw Adran fel cynnig o le, nac fel rhywbeth swyddogol mewn unrhyw ffordd, nes i chi dderbyn cynnig ffurfiol drwy UCAS.

Os gwnaethoch chi wneud cais cyn y dyddiad cau ond heb sicrhau lle addas (os ydych wedi cael eich gwrthod gan bob dewis a/neu wedi gwrthod unrhyw/gyd o’r cynigion), o unrhyw adeg rhwng diwedd Chwefror a dechrau Gorffennaf, byddwch yn cael cyfle arall drwy UCAS Extra.

Dilynwch ganllaw fesul cam UCAS ar sut i wneud dewisiadau ychwanegol gydag UCAS Extra.

Sylwer, os ydych wedi cyflwyno eich cais cyntaf am gwrs nad yw ar gael ar UCAS Extra mwyach, efallai yr hoffech ystyried pynciau cysylltiedig neu amgen.

Bob blwyddyn, yn dilyn Diwrnod y Canlyniadau, mae Abertawe'n cynnig nifer o leoedd am gyrsiau drwy Glirio. Mae ein tudalennau Clirio'n dweud popeth y mae angen i chi ei wybod am yr hyn i'w ddisgwyl, os ydych am gyflwyno cais am un o'n cyrsiau drwy Glirio.

Mae llawer o fyfyrwyr yn ymuno â ni bob blwyddyn drwy Glirio, ac yn mynd ymlaen i gael profiad anhygoel yn y brifysgol.  Ewch i'n tudalen Straeon Myfyrwyr am Glirio i gael mwy o wybodaeth am eu profiadau.