Canlyniadau a derbyn penderfyniad terfynol

Myfyrwyr yn dathlu wrth chwarae pêl foli ar y traeth yn Abertawe

Abertawe bydd eich hoff le newydd oherwydd...

Pam astudio yn Abertawe?

Casglu eich canlyniadau

Mae ‘Cadarnhad’ yn cyfeirio at y cyfnod ym mis Awst bob blwyddyn pan fo'r brifysgol yn derbyn canlyniadau arholiadau TAG Safon Uwch neu gymwysterau eraill ymgeiswyr sydd wedi derbyn cynigion amodol.

Mae rhestr o'r canlyniadau arholiadau rydym yn eu derbyn yn uniongyrchol gan UCAS ar gael ar wefan UCAS – gwiriwch y rhestr, ac os NAD yw'r gymhwyster rydych chi'n ei chyflawni ar y rhestr, bydd angen i chi anfon y canlyniadau atom yn uniongyrchol drwy e-bost neu yn y post. Bydd angen i chi wneud hyn cyn gynted ag y gwyddech eich canlyniadau er mwyn cadarnhau eich lle yn gyflym, ac er mwyn atal unrhyw oedi wrth ddyrannu eich llety, manylion cofrestru ac ati.

Cynghorion ar gyfer Diwrnod Canlyniadau

Gwnewch yn siŵr eich bod yn rhydd

Rhaid i chi fod ar gael pan gaiff y canlyniadau eu cyhoeddi. Mae’n bosib y bydd rhaid i chi wneud penderfyniadau cyflym, a rhai anodd efallai, am eich dyfodol, felly dylech fod yn barod i siarad â rhai prifysgolion a cholegau yn bersonol yn hytrach na gadael hyn i rywun arall.

Cadwch olwg ar eich ebyst

Byddwn yn anfon ebost atoch ar fore Diwrnod Canlyniadau Lefelau A i roi gwybod i chi p’un a ydych wedi ennill eich lle, neu os yw’ch cais yn dal i gael ei ystyried. Byddwn hefyd yn dweud wrthych os ydym yn dal i ddisgwyl canlyniadau eich cymwysterau gennych neu os oes amodau eraill yn perthyn i’ch cynnig nad ydych wedi’u bodloni, megis geirda neu gliriad y Gwasanaeth Anabledd. Byddwn eisoes wedi ysgrifennu atoch ynglŷn â hyn, felly, er eich budd eich hun, dylech anfon unrhyw wybodaeth goll atom er mwyn osgoi oedi wrth neilltuo eich lle a’ch llety.

Gwiriwch statws eich Cais

Byddwch yn gallu gweld statws eich cais ar fore Iau 15 Awst gan ddefnyddio eich Hwb UCAS.

Byddwn hefyd yn anfon ebost atoch ychydig cyn diwrnod canlyniadau gyda manylion mewngofnodi i’r system gadarnhau fel y gallwch wirio statws eich cais – bydd hyn hefyd yn rhoi manylion unrhyw gamau sydd angen i chi eu cymryd.

Os byddwch yn bodloni telerau eich cynnig amodol

Os oes gennych gynnig Cadarn Amodol oddi wrthym ac rydych yn cyflawni’r gofynion, byddwch yn cael eich derbyn yn uniongyrchol ar ein rhaglen (bydd eich statws yn newid i ‘cadarn diamod’). Peidiwch â ffonio’r Brifysgol hyd nes y byddwch wedi edrych ar statws eich cynnig ar lein. Caiff gwybodaeth i’ch croesawu i’r Brifysgol ei hanfon yn ystod yr wythnosau dilynol a bydd ar gael ar lein hefyd.

Os na fyddwch yn bodloni telerau eich cynnig

Os na lwyddoch i gael y graddau y gwnaethom ofyn i chi eu cael yn eich arholiadau, byddwn yn ailystyried ein cynnig yng ngoleuni eich perfformiad go iawn a pherfformiad y bobl eraill sy’n ceisio lle ar yr un rhaglen. Mewn rhai achosion mae’n bosib y byddwn yn dal i allu cynnig lle i chi ar raglen amgen. Byddwn yn anfon ebost atoch ddydd Iau 15 Awst i roi gwybod os ydych chi’n perthyn i’r categori hwn. Ewn ati i wneud penderfyniad am achosion ffiniol erbyn dydd Gwener 16 Awst.

Os byddwch yn derbyn neges ‘Cynnig Cwrs wedi Newid’

Mae hyn yn golygu nad ydym wedi gallu cadarnhau eich lle ar eich cwrs gwreiddiol gan nad ydych wedi bodloni’r amodau gwreiddiol, ond ein bod ni’n barod i gynnig lle i chi ar gwrs gwahanol. Gallwch ddewis derbyn neu wrthod y cynnig. Rhaid i chi ymateb ar UCAS – os ydych yn cadw dewis yswiriant, gallwch ymateb unwaith ichi dderbyn penderfyniad oddi wrth y ddau sefydliad. Pum niwrnod yn unig fydd gennych i ymateb i gynnig cwrs sydd wedi newid ond dylech wneud hyn cyn gynted â phosibl, gan y gallai unrhyw oedi effeithio ar y broses o neilltuo llety i chi.

Dewch i ymweld â ni ar ôl Diwrnod Canlyniadau

Bydd modd i chi ymweld â ni ar ôl i chi dderbyn eich canlyniadau, (bydd manylion ein diwrnodau agored Clirio yn cael eu cyhoeddi yn agosach at yr amser). Yn ystod rhain gallwch ymweld â’ch adran o ddiddordeb, gweld ein llety, mynd ar daith o’r campws ac ymweld â’n cyfleusterau chwaraeon arobryn. Bydd myfyrwyr wrth law i’ch arwain a rhoi mewnwelediad i fywyd myfyrwyr Prifysgol Abertawe, sydd wedi ennill sawl gwobr.

Clirio

Os na chewch eich derbyn gan eich Prifysgol Cadarn nac Yswiriant byddwch yn gymwys, yn uniongyrchol, i’r broses Glirio. Dylech fynd i wefan UCAS i gael y cyngor diweddaraf ar y Prifysgolion sydd â lleoedd Clirio.

Os byddwch yn rhagori ar delerau eich cynnig - gallwch chwilio am Brifysgol neu gwrs wahanol drwy Clirio

Bob blwyddyn mae rhai ymgeiswyr yn pasio’u harholiadau gyda chanlyniadau gwell na’r disgwyl; gallai hyn olygu eu bod nhw nid yn unig wedi bodloni amodau eu dewis cadarn, ond wedi rhagori arnynt. Mae modd i chi gysylltu â phrifysgolion i weld a oes lle gennynt ar gwrs o'ch dewis ac os ydynt yn cynnig lle i chi, gallwch wrthod eich lle cadarn gwreiddiol ac ychwanegu'r cwrs neu brifysgol newydd fel dewis Clirio. Edrychwch ar wefan UCAS neu ein tudalennau gwrthod eich lle cadarn er mwyn defnyddio Clirio am ragor o wybodaeth am hyn.

Pryd fyddwch yn cael gwybod am eich Llety?

Ni fydd yr adran Lety yn cadarnhau eich llety hyd nes bod cynnig diamod gennych. I’r mwyafrif o fyfyrwyr, dylech ddisgwyl cael cynnig llety y Brifysgol ar ôl dydd Gwener 16 Awst drwy ebost.

Cymhwysedd ar gyfer Ysgoloriaethau Rhagoriaeth a Theilyngdod

Delwedd yn dangos gliniadur, cyfrifiannell a phen yn edrych i lawr ar y ddesg.

Os byddwch yn ennill AAA neu AAB yn eich lefelau A, byddwch yn cael Ysgoloriaeth yn uniongyrchol ar ôl i chi gofrestru a byddwn yn ysgrifennu atoch pan fydd canlyniadau lefel A yn cael eu cyhoeddi er mwyn cadarnhau p’un a ydych wedi bod yn ddigon ffodus i gael un. Nid yw pob cwrs yn gymwys; am ragor o wybodaeth ewch i'r dudalen ysgoloriaethau.

Os byddwch yn newid eich meddwl, am newid cwrs neu ohirio

Ebostiwch ni

Trwy dderbyn cynnig rydych yn ymrwymo i gytundeb contractiol difrifol, ac ni allwch wrthod lle yn syml pan fyddwch wedi cymryd y cam hwn. Bydd angen i chi anfon ebost atom i drafod eich opsiynau; caiff eich cais ei gyfeirio at Diwtor Derbyn ac mae’n bosibl y byddant yn eich ffonio chi i drafod eich rhesymau am eisiau cael eich rhyddhau. Dylech ystyried pam rydych wedi newid eich meddwl am eich cynnig gwreiddiol cyn gwneud unrhyw benderfyniadau: os byddwn yn cytuno i dynnu’r cynnig yn ôl, caiff y lle ei gynnig i rywun arall.

Unwaith ichi dderbyn eich canlyniadau efallai y byddwch yn penderfynu eich bod am wneud cwrs gwahanol gyda ni. Os bydd hyn yn digwydd, anfonwch ebost atom gan grynhoi pam rydych wedi newid eich meddwl. Yna byddwn yn anfon eich cais ymlaen at y Ddetholwr Derbyn y cwrs amgen er mwyn cael penderfyniad.

Gallwn ohirio’ch lle chi; nid yw hyn yn broblem. Y cyfan sydd angen ei wneud yw anfon ebost atom sy’n cadarnhau mai dyma rydych am ei wneud, a byddwn yn trefnu hyn ar eich rhan chi drwy UCAS.

Derbyn penderfyniad terfynol ynghylch eich lle

Os oes gennych gynnig cadarn amodol neu yswiriant gennym ac rydych yn bodloni'r gofynion, byddwch yn cael eich derbyn yn awtomatig i'ch rhaglen (bydd eich statws yn newid i Yswiriant neu Gadarn Diamod), gwiriwch statws eich cais ar-lein yn UCAS. Os yw eich lle wedi'i gadarnhau, nid oes angen cysylltu â'r brifysgol hefyd. Caiff gwybodaeth yn eich croesawu i'r brifysgol ei hanfon atoch o fewn yr ychydig ddyddiau nesaf.

Os na lwyddoch i gael y graddau gofynnol yn eich arholiadau, byddwn yn ailystyried ein cynnig ym mis Awst ar sail eich gwir berfformiad a pherfformiad pobl eraill sy'n ymgeisio ar gyfer yr un raglen, ac mewn rhai achosion efallai y byddwn yn gallu cynnig lle i chi o hyd neu gynnig le ar raglen arall. Byddwn yn anfon e-bost atoch ar ddiwrnod y canlyniadau i roi gwybod i chi os ydych yn y categori hwn.