Canlyniadau a'ch penderfyniad terfynol ar gyfer astudiaethau israddedig

Mae'n rhaid i chi fod ar gael pan gyhoeddir y canlyniadau. Mae'n bosib y bydd rhaid i chi wneud penderfyniadau cyflym, ac efallai anodd, am eich dyfodol, felly byddwch yn barod i siarad â phrifysgolion a cholegau eich hun a pheidiwch â gadael hyn i rywun arall.

Byddwn yn eich e-bostio ar fore diwrnod y canlyniadau Safon Uwch i roi gwybod i chi a ydych chi wedi cael eich lle, neu a ydym yn ystyried eich cais o hyd. Hefyd, byddwn yn rhoi gwybod i chi a ydym yn dal i aros am ganlyniadau cymwysterau gennych chi neu a oes unrhyw ofynion eraill i chi eu bodloni, megis geirda neu gliriad gan y Gwasanaeth Anabledd.

Byddwn wedi ysgrifennu atoch eisoes ynglŷn â hyn felly mae hi o fudd i chi gyflwyno unrhyw wybodaeth sy'n weddill i ni er mwyn osgoi oedi wrth ddyrannu eich lle a'ch llety.

Gallwch chi wirio statws eich cais ar fore'r diwrnod canlyniadau drwy ddefnyddio gwasanaeth UCAS.

Byddwn hefyd yn eich e-bostio cyn diwrnod y canlyniadau gyda manylion am sut i fewngofnodi i'n system gadarnhau i wirio statws eich cais - bydd hyn hefyd yn darparu manylion unrhyw gamau gweithredu mae angen i chi eu cymryd.

Os oes gennych gynnig cadarn amodol gennym ac rydych yn bodloni’r gofynion, byddwch yn cael eich derbyn yn awtomatig i'ch rhaglen (bydd eich statws yn newid i Gadarn Diamod). Peidiwch â ffonio'r Brifysgol oni bai eich bod wedi edrych ar statws eich cynnig ar-lein yn gyntaf. Byddwn yn anfon gwybodaeth atoch yn eich croesawu i'r Brifysgol yn ystod yr wythnosau canlynol a bydd ar gael ar-lein.

Os na chawsoch y graddau y gofynnon ni amdanynt yn eich arholiadau, byddwn yn ailystyried ein cynnig yng ngoleuni eich perfformiad gwirioneddol a pherfformiad eraill sy'n ceisio mynediad i'r un rhaglen.

Mewn rhai achosion bydd modd i ni eich derbyn neu gynnig lle i chi ar raglen amgen. Byddwn yn anfon e-bost atoch ar ddiwrnod y canlyniadau i roi gwybod i chi os ydych yn y categori hwn. Byddwn yn ceisio penderfynu ar yr holl achosion ffiniol erbyn y diwrnod ar ôl diwrnod y canlyniadau.

Mae hyn yn golygu nad oedd modd i ni gadarnhau eich lle ar eich cwrs gwreiddiol gan na wnaethoch fodloni’r amodau gwreiddiol, ond rydym yn fodlon cynnig lle i chi ar gwrs gwahanol.

Gallwch ddewis derbyn neu wrthod y cynnig. Mae'n rhaid i chi ymateb ar UCAS - os oes gennych ddewis wrth gefn, gallwch ymateb ar ôl cael penderfyniad gan eich dewisiadau cadarn ac wrth gefn. Dim ond pum niwrnod sydd gennych i ateb i gynnig am gwrs sydd wedi'i newid ond dylech wneud hyn cyn gynted â phosib, oherwydd gall unrhyw oedi effeithio ar eich gallu i sicrhau llety.

Ni fydd y Tîm Llety yn cadarnhau eich dyraniad llety nes bod eich lle wedi'i wneud yn ddiamod, ac rydym wedi cael cadarnhad o'ch canlyniadau. I'r rhan fwyaf o fyfyrwyr, dylech ddisgwyl cael cynnig llety yn y Brifysgol erbyn y diwrnod ar ôl diwrnod y canlyniadau – bydd hyn yn cyrraedd drwy e-bost.

Os ydych chi'n ennill AAA neu AAB ar Safon Uwch neu gyfwerth, efallai y byddwch yn gymwys i gael ysgoloriaeth oherwydd eich perfformiad academaidd cryf. Byddwn yn ysgrifennu atoch am hyn ar ôl diwrnod canlyniadau Safon Uwch.

Nid yw ysgoloriaethau yn berthnasol i bob cwrs, fodd bynnag, a gallwch weld rhagor o wybodaeth ar ein tudalennau Ysgoloriaethau a Bwrsariaethau.