Cyrsiau Ôl-raddedig a ddysgir yn dod yn fuan

Disgrifiad

Nod yr MSc Rheoli Uwch (Technolegau Gofal Iechyd) yw bodloni'r galw cynyddol byd-eang am sgiliau arweinyddiaeth, arloesi a rheoli strategol yn sector y gwyddorau bywyd a'r sector biotechnoleg.

Bydd y rhaglen yn eich arfogi â'r sgiliau arbenigol angenrheidiol i ymdrin â llwybrau arloesi cymhleth - o'r cam darganfod a chynnal ymchwil i ddatblygu cynhyrchion a'u rheoleiddio tuag at y cam masnacheiddio. 

Fe'i bwriedir ar gyfer gweithwyr proffesiynol ac arweinwyr y dyfodol sydd eisiau troi datblygiadau gwyddonol a thechnolegol yn atebion cynaliadwy, moesegol a llawn effaith i gymdeithas.

Mae'r rhaglen yn rhan allweddol o'n portffolio Rheoli Uwch, sy'n cynnig cyfres o lwybrau arbenigol i ddysgwyr sy'n dymuno arwain ymagweddau at newid, arloesi a gwella sydd oll yn berthnasol ar draws sefydliadau perfformiad uchel cymhleth a dibynadwy iawn, Busnesau Bach a Chanolig (BBaChau), yn ogystal â bod yn berthnasol i unigolion entrepreneuraidd.

Mae'r portffolio ar agor i weithwyr proffesiynol o bob sector gan gynnwys iechyd a gofal cymdeithasol, y gwyddorau bywyd a bio-beirianneg, ac mae'n eich galluogi i ddatblygu'r galluoedd rheoli ac arweinyddiaeth uwch angenrheidiol i greu gwerth cynaliadwy a chyflawni canlyniadau trawsnewidiol.

Mae hon yn rhaglen ryngddisgyblaethol ac felly caiff ei haddysgu ar sail campws deuol ar draws campysau'r Bae a Singleton.

Pynciau sy'n Debygol o Gael eu Trafod

Cynhelir y rhaglen ran-amser hon dros ddwy flynedd, gan ddechrau gyda modiwlau MBA craidd ym Mlwyddyn 1 a chan symud ymlaen i gynnwys arbenigol ym maes y gwyddorau bywyd ac arloesi ym Mlwyddyn 2.

Mae'r rhaglen hon yn cynnwys tair rhan sy’n werth 60 credyd yr un. Mae'r rhan gyntaf yn cyflwyno modiwlau lefel MBA craidd sy'n sefydlu sylfaen mewn strategaeth, arweinyddiaeth a rheoli newid. Mae'r ail ran yn cynnwys modiwlau arbenigol sy'n datblygu sgiliau arbenigol sy'n benodol i'r sector ar arloesi ym maes y gwyddorau bywyd a rheoli ymchwil a datblygu. Mae'r rhan olaf yn canolbwyntio ar brosiect ymchwil gymhwysol sylweddol, lle cewch ddylunio a chyflawni prosiectau sy'n cyd-fynd â heriau'r byd go iawn.

Bwriedir i fodiwlau'r rhaglen gynnwys:

• Dadansoddi Strategol a Rheoli
• Ymdrin ag Arloesi, Trawsnewid a Newid
• Arwain Pobl a Sefydliadau
• Ymchwil a Datblygu ar gyfer y Gwyddorau Bywyd
• Bench2Build
• Lab2Life: Parodrwydd Technoleg
• Ymchwil mewn Ymarfer

Dyddiad Cychwyn Bwriededig

Medi 2026

Cwblhewch y ffurflen isod fel y gallwn yrru mwy o wybodaeth atoch am y rhaglen radd hon pan ddaw ar gael e.e. modiwlau, ffioedd, dyddiad dechrau ayyb.

Disgrifiad

Nod yr MSc mewn Gwyddor Data Gymhwysol (Ar-lein) yw darparu hyfforddiant priodol i fyfyrwyr heb gefndir arbenigol i'w galluogi nhw i wella eu cyfleoedd yn y dyfodol a chwarae rhan allweddol yn yr economi ddigidol.  

Wedi'i chyflwyno ar y cyd gan yr Ysgol Mathemateg a Chyfrifiadureg, bydd y rhaglen yn addysgu myfyrwyr i weithio gyda data, ei ddelweddu, a'i ddeall, ac yn eu hannog i feddwl yn ystadegol a datblygu sgiliau gwneud penderfyniadau ar sail data.

Yn ogystal, mae'r rhaglen yn darparu'r sylfaen angenrheidiol mewn mathemateg, ystadegau a sgiliau rhaglennu sylfaenol sy'n allweddol ar gyfer deall cymhlethdod data a'i ddadansoddi mewn ffordd systematig. Mae hefyd yn darparu sgiliau allweddol mewn sawl pwnc cyfrifiadureg, megis cloddio data  a dysgu peirianyddol.

Mae'r rhaglen hon ar gyfer myfyrwyr sydd â gradd mewn pwnc anrhifog, ond sydd â diddordeb mewn dysgu dulliau gwyddor data hanfodol gyda chymwysiadau amrywiol. 

Sylwer,   mae'r MSc mewn Gwyddor Data Gymhwysol yn briodol ar gyfer y rhai hynny heb radd israddedig mewn maes mathemateg (neu bynciau cysylltiedig).

Pynciau sy'n Debygol o Gael eu Trafod

• Mathemateg ar gyfer Gwyddor Data
• Tebygolrwydd ac Ystadegau ar gyfer Gwyddor Data
• Modelu a Dysgu Peirianyddol
• Systemau Cronfa Ddata ac Apiau'r We
• Deallusrwydd Artiffisial Symbolaidd a Phrosesu Iaith Naturiol
• Cloddio Data a Dadansoddeg

Dyddiad Cychwyn Bwriededig

Medi 2026

Cwblhewch y ffurflen isod fel y gallwn yrru mwy o wybodaeth atoch am y rhaglen radd hon pan ddaw ar gael e.e. modiwlau, ffioedd, dyddiad dechrau ayyb.

Disgrifiad

Mae'r rhaglen uwch hon wedi'i chynllunio ar gyfer myfyrwyr sydd wedi cwblhau gradd BSc (Anrh) mewn maes gwyddor iechyd neu feddygol perthnasol sy'n chwilio am gyfle i arbenigo eu sgiliau gwyddor feddygol fel rhan o'u dyheadau gyrfa. Yn ogystal, cynlluniwyd y rhaglen i gefnogi gwyddonwyr biofeddygol y mae angen hyfforddiant lefel ôl-raddedig arnynt fel rhan o'u datblygiad a’u cynnydd gyrfa. Mae'r cwrs wedi'i gynllunio i alluogi myfyrwyr i ddatblygu'n bersonol ac yn broffesiynol ac i ennill galluoedd mewn sgiliau gwyddor fiofeddygol patholeg gellog a moleciwlaidd allweddol.

Mae'r rhaglen yn cynnwys dau fodiwl arbenigol:

• Egwyddorion ac Ymarfer Histopatholeg Ddiagnostig: Ennill gwybodaeth gynhwysfawr am brosesu a dadansoddi samplau meinwe a chelloedd a sut mae eu dehongliad clinigol yn cael ei ddefnyddio i lywio rheolaeth a thriniaeth cleifion.
• Diagnosteg Patholeg Foleciwlaidd ar gyfer Gwyddonwyr Biofeddygol: Archwilio'r cysyniadau sy'n rhan o ddefnyddio a chymhwyso diagnosteg patholeg foleciwlaidd bresennol a newydd mewn Gwyddor Fiofeddygol. Gan gynnwys dulliau genomig a phroteomeg, i wneud diagnosis ac astudio clefydau cymhleth.

Bydd gan y rhaglen bwyslais cryf ar gymhwyso ymarferol ac astudiaethau achos byd go iawn, ac mae wedi'i chynllunio i ddarparu'r sgiliau a'r hyder i fyfyrwyr ragori ym maes y gwyddorau biofeddygol. Nid yw'r cwrs hwn wedi’i achredu gan yr IBMS

Pynciau sy'n Debygol o Gael eu Trafod

Bydd y modiwl Histopatholeg Ddiagnostig yn cynnwys archwilio samplau meinwe i ganfod clefydau mawr, gan gynnwys canser, gan archwilio'r newidiadau strwythurol  a all ddigwydd mewn clefyd yn ogystal â thechnegau staenio a delweddu meinwe. Bydd y modiwl yn cynnwys ymagwedd astudiaeth achos i roi cyfle fyfyrwyr gymhwyso ac integreiddio gwybodaeth o safbwynt rheoli cleifion.

Bydd y modiwl patholeg foleciwlaidd yn defnyddio ymagwedd astudiaeth achos i ddadansoddi cymwysiadau moleciwlaidd mewn clefyd ac archwilio datblygiadau technegol diweddar mewn dadansoddi patholeg foleciwlaidd, gan gynnwys PCR digidol a microfesiglau. Bydd ystyriaethau ymarferol paratoi samplau ar gyfer dadansoddiadau moleciwlaidd a thechnegau diagnostig moleciwlaidd cyffredin megis croesrywedd in situ yn cael eu harchwilio.

Bydd myfyrwyr yn datblygu ystod eang o sgiliau trosglwyddadwy o'r rhaglen; gan gynnwys datrys problemau'n greadigol, gwerthuso, dysgu a gweithio'n annibynnol, cynllunio a threfnu, ymchwil a sgiliau labordy ymarferol.

Dyddiad Cychwyn Bwriededig

Medi 2026

Cwblhewch y ffurflen isod fel y gallwn yrru mwy o wybodaeth atoch am y rhaglen radd hon pan ddaw ar gael e.e. modiwlau, ffioedd, dyddiad dechrau ayyb.

Disgrifiad

Dyluniwyd y cwrs hwn i Wyddonwyr Biofeddygol sy'n dymuno datblygu a rhoi hwb i'w gyrfa drwy ddilyn astudiaethau ôl-raddedig ac i fyfyrwyr sydd wedi cwblhau gradd yn ddiweddar ym maes iechyd neu'r gwyddorau meddygol, sydd eisiau meithrin sgiliau Gwyddor Fiofeddygol arbenigol i gefnogi eu dyheadau gyrfa.

Bydd y cwrs uwch hwn yn galluogi myfyrwyr i feithrin galluoedd mewn sgiliau biofeddygol allweddol ym maes patholeg gellog a moleciwlaidd, gyda phwyslais cryf ar gymhwyso'r sgiliau hyn yn ymarferol ac archwilio astudiaethau achos go iawn. Byddant hefyd yn datblygu amrywiaeth eang o sgiliau ymchwil a labordy er mwyn rhagori ym maes y gwyddorau biofeddygol.     

Nid yw'r cwrs hwn wedi'i achredu gan yr IBMS. 

Pynciau sy'n Debygol o Gael eu Trafod

Mae'r rhaglen yn cynnwys dau fodiwl arbenigol:

• Egwyddorion ac Ymarfer Haematoleg Ddiagnostig: Bydd y modiwl hwn yn darparu gwybodaeth gynhwysfawr am gasglu a phrosesu samplau a dadansoddi anhwylderau haematolegol cyffredin a chymhleth. Bydd hefyd yn archwilio sut y caiff y samplau hyn eu dehongli o safbwynt clinigol i reoli a thrin cleifion. Bydd y modiwl yn cynnwys ymagwedd astudiaeth achos i roi cyfle i fyfyrwyr gymhwyso ac integreiddio gwybodaeth o safbwynt rheoli cleifion.
• Egwyddorion ac Ymarfer y Gwyddorau Trallwyso Gwaed: Bydd y modiwl hwn yn archwilio amrywiaeth gynhwysfawr o ymagweddau dadansoddol a ddefnyddir ar hyn o bryd ym maes y gwyddorau trallwyso ac yn ystyried pwysigrwydd rheoli ansawdd a rheoleiddiadau ym maes y gwyddorau trallwyso gwaed.

Dyddiad Cychwyn Bwriededig

Medi 2026

Cwblhewch y ffurflen isod fel y gallwn yrru mwy o wybodaeth atoch am y rhaglen radd hon pan ddaw ar gael e.e. modiwlau, ffioedd, dyddiad dechrau ayyb.

Disgrifiad

Mae ein cwrs MA mewn Addysg (ar-lein) newydd wedi cael ei ddylunio ar gyfer addysgwyr, llunwyr polisi, neu'r rhai hynny sy'n gweithio ym maes Technoleg Addysg neu mewn cyrff anllywodraethol, sydd eisiau cael effaith fyd-eang a datblygu'n rym trawsnewidiol yn eu meysydd.

Os ydych chi'n angerddol am ddatblygiad a thegwch addysgol ac yn awyddus i ddyfnhau eich ymarfer, ysgogi arloesedd a llunio dyfodol addysg, mae ein MA mewn Addysg (ar-lein) yn berffaith i chi.

Mae ein cwrs hyblyg, rhan-amser yn cynnig dysgu a gynhelir yn gyfan gwbl ar-lein, gan eich galluogi chi i ddatblygu eich gwybodaeth, eich sgiliau a'ch profiad ar eich cyflymder eich hunan, ac o unrhyw le yn y byd, gan gydbwyso eich astudiaethau â’ch gyrfa a'ch bywyd personol heb gyfaddawdu ar ansawdd neu uchelgais.

Byddwch chi'n ymuno ag amgylchedd dysgu ar-lein bywiog, lle mae academyddion arbenigol, safbwyntiau byd-eang ac astudiaethau achos o'r byd go iawn yn dod ynghyd i rymuso eich taith, gan geisio mynd i'r afael â heriau addysgol presennol gyda strategaethau ar sail tystiolaeth, drwy gyfrwng ymarfer beirniadol a myfyriol.

Pynciau sy'n Debygol o Gael eu Trafod

Bydd ein cwrs yn cynnwys amrywiaeth o fodiwlau sy'n berthnasol yn rhyngwladol gan gynnwys:

• Addysg, addysgwyr a chymdeithas

• Cysyniadau allweddol mewn addysg: addysgu, dysgu, hygyrchedd, ac asesu
• Dulliau ymchwil addysgol
• Addysg mewn byd digidol
• Trefnu addysg: llywodraethu, polisi, ac arweinyddiaeth
• Anghenion Addysgol Arbennig ac ymarfer cynhwysol

Dyddiad Cychwyn Bwriededig

Medi 2026

Cwblhewch y ffurflen isod fel y gallwn yrru mwy o wybodaeth atoch am y rhaglen radd hon pan ddaw ar gael e.e. modiwlau, ffioedd, dyddiad dechrau ayyb.

Disgrifiad

Mae ymasiad niwclear yn dechnoleg sy'n datblygu'n gyflym, o'r cam ymchwil wyddonol i ddatblygiad masnachol, gan greu galw cynyddol am beirianwyr sydd â'r ddealltwriaeth a'r gallu i ddylunio, gweithredu a chynnal a chadw gorsafoedd pŵer ymasiad. Ar y cwrs hwn byddwch chi’n meithrin yr wybodaeth a'r sgiliau sy'n hanfodol ar gyfer y sector hwn, yn ogystal â datblygu'r sgiliau trosglwyddadwy sydd eu hangen i weithio mewn meysydd technoleg eraill.

Byddwch yn cael eich addysgu gan academyddion sydd ag arbenigedd helaeth yn y diwydiant, ym meysydd ynni cynaliadwy, efelychu a modelu yn ogystal â deunyddiau strwythurol uwch. Mae'r rhaglen yn cynnwys cydweithrediad cryf â diwydiant ymasiad niwclear y DU, sy'n cynnwys darlithoedd a phrosiectau diwydiannol integredig yn ogystal â rhai bwrsariaethau a ariennir gan y diwydiant.

Yn y bôn, mae astudio peirianneg ymasiad yn golygu bod ar flaen y gad o ran un o'r heriau mwyaf cyffrous a chymhleth ym maes ynni: rheoli'r amodau eithafol sy'n ofynnol ar gyfer ymasiad mewn ffordd sy'n ddiogel, yn ddibynadwy, ac yn economaidd hyfyw. Bydd y sgiliau a'r profiad y byddwch chi'n eu hennill yn y maes hwn yn werthfawr ar gyfer ymasiad - ond maent hefyd yn drosglwyddadwy iawn ar draws amrywiaeth eang o sectorau, gan agor drysau i ystod amrywiol o gyfleoedd gyrfa.

Pynciau sy'n Debygol o Gael eu Trafod

Mae'r rhaglen yn canolbwyntio ar yr egwyddorion peirianneg sy'n sail i weithrediad gorsafoedd pŵer ymasiad, gan gynnwys y gofynion strwythurol a deunyddiau, rheoli thermohylifau ynni uchel iawn, pwysigrwydd gweithgynhyrchu cydrannau o ansawdd uchel ac efelychu'r prosesau ar gyfrifiadur i hwyluso ffyrdd cyflym o ddylunio, rhagfynegi a datrys problemau.

Ochr yn ochr ag ehangu eich gwybodaeth yn y meysydd hyn, byddwch hefyd yn meithrin sgiliau rheoli busnes a phrosiectau, gwaith tîm, cyfathrebu ac asesiadau effaith amgylcheddol.

Mae'r modiwlau a gynlluniwyd ar gyfer y rhaglen hon yn cynnwys*:

• Peirianneg a Thechnoleg Ymasiad
• Rheoli Busnes a Rheoli Prosiectau
• Efelychu Peirianyddol
• Deunyddiau Uwch a Chyfanrwydd Strwythurol
• Thermohylifau Uwch
• Systemau Gweithgynhyrchu Uwch
• Prosiect Ymchwil a Dylunio

*Gall y modiwlau hyn newid a byddant yn cael eu cadarnhau pan fydd tudalen lawn y cwrs ar gael.

Dyddiad Cychwyn Bwriededig

Medi 2026

Cwblhewch y ffurflen isod fel y gallwn yrru mwy o wybodaeth atoch am y rhaglen radd hon pan ddaw ar gael e.e. modiwlau, ffioedd, dyddiad dechrau ayyb.

Disgrifiad

Mae'r rhaglen MSc mewn Heriau Byd-eang mewn Iechyd a Meddygaeth yn tynnu ar arbenigedd a gwybodaeth yr Ysgol Feddygaeth i archwilio heriau iechyd byd-eang cyfoes. Bydd y rhaglen yn cynnwys pynciau megis iechyd plant, systemau iechyd, anghydraddoldeb, iechyd mamau, pŵer a gwleidyddiaeth mewn cyd-destun byd-eang. Nod y rhaglen ryngddisgyblaethol hon yw creu gwyddonwyr byd-eang a fydd yn effeithiol, yn ddadansoddol, yn benderfynol, yn greadigol ac yn croesawu newid.

Bydd myfyrwyr yn cymryd rhan mewn cymysgedd o ddysgu wyneb yn wyneb ac ar-lein, gan feithrin sgiliau mewn dulliau ymchwil, moeseg, dylunio a rheoli prosiectau, a datblygu cynigion. Bydd gan fyfyrwyr y cyfle i gydweithio ag ymchwilwyr rhyngwladol yn yr Ysgol Feddygaeth ym Mhrifysgol Abertawe drwy gysgodi ac elwa o rwydwaith amrywiol o siaradwyr gwadd, gan gynnwys clinigwyr, ymarferwyr ac ymchwilwyr rhyngwladol sydd â phrofiad helaeth o'r byd go iawn yn y maes iechyd byd-eang. Mae'r rhaglen yn gosod pwyslais cryf ar ddatblygu sgiliau ymchwil myfyrwyr a ysgogir gan effaith, yn benodol drwy ymchwil gweithredu cyfranogol, gan roi cyfle i fyfyrwyr feithrin y sgiliau sydd eu hangen arnynt i fynd i'r afael â heriau'r byd go iawn mewn amrywiaeth o leoliadau iechyd byd-eang.

Bydd y cwrs hwn yn darparu hyfforddiant a sgiliau graddedig o ansawdd uchel ar gyfer astudiaethau ôl-raddedig pellach, neu i'r rhai hynny sy'n chwilio am gyflogaeth yn y sector iechyd byd-eang, lleoliadau argyfwng dyngarol, llunio polisi, y byd academaidd, ymchwil a rolau eiriolaeth.

Pynciau sy'n Debygol o Gael eu Trafod

Poblogaethau byd-eang sy'n heneiddio, newid yn yr hinsawdd ac iechyd byd-eang, epidemigau a chlefydau, argyfwng newyn a bwyd, mudo gorfodol a dadleoli, iechyd plant byd-eang, iechyd mewn ardaloedd o wrthdaro, iechyd meddwl, dulliau, gwerthuso a moeseg mewn iechyd byd-eang ac ymchwil meddygaeth, clefydau anhrosglwyddadwy, ymchwil gweithredu cyfranogol, rheoli prosiectau ym maes iechyd a meddygaeth byd-eang ac iechyd trefol.

Dyddiad Cychwyn Bwriededig

Medi 2026

Cwblhewch y ffurflen isod fel y gallwn yrru mwy o wybodaeth atoch am y rhaglen radd hon pan ddaw ar gael e.e. modiwlau, ffioedd, dyddiad dechrau ayyb.

Disgrifiad

MSc yn y Gwyddorau Meddygol yw'r astudiaeth a'r ymchwil integredig o ddisgyblaethau gwyddonol, megis biocemeg, microbioleg, bioleg foleciwlaidd, genomeg, imiwnoleg a nanofeddygaeth i fynd i'r afael â heriau ym maes gofal iechyd, diagnosio, triniaeth ac iechyd y cyhoedd.Mae natur ryngddisgyblaethol y gwyddorau biofeddygol yn tanlinellu eu pwysigrwydd wrth ddatblygu gwybodaeth feddygol a gwella effeithiolrwydd ymyriadau gofal iechyd, gan gyfuno'r disgyblaethau hyn.

Nod gyffredinol y cwrs hwn yw galluogi myfyrwyr i ddatblygu'n bersonol ac yn broffesiynol, er mwyn meithrin gwyddonwyr a fydd yn ddadansoddol, yn bendant, yn greadigol, yn ddiogel, yn hyderus ac yn benderfynol, gan groesawu newid a datblygu'n arweinwyr ac yn ddefnyddwyr ymchwil. Mae'r rhaglen wedi cael ei datblygu mewn cydweithrediad â themâu ymchwil yr Ysgol Feddygaeth (Biofarcwyr a genynnau; Microbau ac Imiwnedd;Technolegau Meddygol) fel llwybr i ymchwil ôl-raddedig bellach a'r diwydiant. Caiff y cwrs ei ddylunio fel bod ganddo ymagwedd at gymhwyso egwyddorion gwyddonol a thechnegau ymchwil sy'n canolbwyntio ar ymchwil er mwyn datblygu atebion ymarferol ar gyfer deall a rheoli clefydau, datblygu cyffuriau a mentrau iechyd y cyhoedd.

Mae ethos y rhaglen ôl-raddedig hon yn amlddisgyblaethol ac yn rhyngddisgyblaethol a bydd yn rhoi'r sgiliau y mae eu hangen ar fyfyrwyr ôl-raddedig i ymgymryd ag astudiaethau ôl-raddedig pellach e.e. PhD, a chyfleoedd am gyflogaeth ar draws y sectorau cyhoeddus a phreifat sy'n gysylltiedig ag ymchwil a datblygu mewn meysydd megis gofal iechyd,  diagnosteg a datblygu cyffuriau.

Pynciau sy'n Debygol o Gael eu Trafod

• Sgiliau Ymchwil
• Biocemeg
• Microbioleg
• Imiwnoleg
• Bioleg Foleciwlaidd
• Geneteg
• Genomeg
• Nanofeddygaeth
• Ffarmacoleg

Dyddiad Cychwyn Bwriededig

Medi 2025

Cwblhewch y ffurflen isod fel y gallwn yrru mwy o wybodaeth atoch am y rhaglen radd hon pan ddaw ar gael e.e. modiwlau, ffioedd, dyddiad dechrau ayyb.

Disgrifiad

Mae'r cwrs PGDip Nyrsio (Oedolion) yn rhaglen 2 flynedd achrededig ar lwybr carlam, ac mae'n addas i raddedigion unrhyw ddisgyblaeth sy'n dymuno dechrau gyrfa nyrsio. Drwy gydol y cwrs, byddwch yn meithrin y sgiliau a'r profiad i fod yn nyrs dosturiol a gofalgar, sydd â’r hyder i fynd i’r afael â’r heriau cynyddol sy’n wynebu gweithwyr gofal iechyd. 

Bydd pwyslais cryf ar sgiliau ymarferol, a byddwch yn treulio 50% o'r cwrs ar leoliadau gwaith clinigol mewn amrywiaeth eang o leoliadau gan gynnwys ysbytai, y gymuned a chartrefi nyrsio.

Os ydych chi'n fyfyriwr o’r DU sy'n gallu ymrwymo i weithio yng Nghymru am ddwy flynedd ar ôl graddio, efallai gellir talu eich ffïoedd dysgu'n llawn drwy Gynllun Bwrsariaethau GIG Cymru.

Pynciau sy'n Debygol o Gael eu Trafod

Bydd eich astudiaethau'n cynnwys amrywiaeth o bynciau i ddatblygu'r wybodaeth ddamcaniaethol ac ymarferol y bydd ei hangen arnoch i roi gofal nyrsio tosturiol o safon i ddiwallu anghenion cyfannol pobl o oedolaeth ifanc, gan gynnwys:

• Hanfodion nyrsio
• Hybu iechyd
• Atal salwch
• Ymarfer ar sail tystiolaeth

Sylwch: mae'r cwrs hwn yn ddarostyngedig i ganiatâd NMC / Prifysgol

Dyddiad Cychwyn Bwriededig

Mawrth 2026

Cwblhewch y ffurflen isod fel y gallwn yrru mwy o wybodaeth atoch am y rhaglen radd hon pan ddaw ar gael e.e. modiwlau, ffioedd, dyddiad dechrau ayyb.

Disgrifiad

Mae'r cwrs PGDip Nyrsio (Iechyd Meddwl) yn rhaglen 2 flynedd achrededig, ac mae'n addas i raddedigion unrhyw ddisgyblaeth sy'n dymuno dechrau gyrfa nyrsio. Drwy gydol y cwrs, byddwch yn meithrin y sgiliau a'r profiad i fod yn nyrs dosturiol a gofalgar, sydd â’r hyder i fynd i’r afael â’r heriau cynyddol sy’n wynebu gweithwyr gofal iechyd. 

Bydd pwyslais cryf ar sgiliau ymarferol a byddwch yn treulio 50% o'r cwrs ar leoliadau gwaith clinigol mewn amrywiaeth eang o leoliadau gan gynnwys ysbytai, y gymuned a chartrefi nyrsio.

Os ydych chi'n fyfyriwr o’r DU sy'n gallu ymrwymo i weithio yng Nghymru am ddwy flynedd ar ôl graddio, efallai gellir talu eich ffïoedd dysgu'n llawn drwy Gynllun Bwrsariaethau GIG Cymru.

Pynciau sy'n Debygol o Gael eu Trafod

Bydd eich astudiaethau'n cynnwys amrywiaeth o bynciau i ddatblygu'r wybodaeth ddamcaniaethol ac ymarferol y bydd ei hangen arnoch i roi gofal nyrsio tosturiol o safon i wella iechyd meddwl a lles, gan gynnwys:

• Hanfodion nyrsio (Iechyd Meddwl)
• Hybu iechyd
• Atal salwch
• Ymarfer ar sail tystiolaeth

Sylwch: mae'r cwrs hwn yn ddarostyngedig i ganiatâd NMC / Prifysgol

Dyddiad Cychwyn Bwriededig

Mawrth 2026

Cwblhewch y ffurflen isod fel y gallwn yrru mwy o wybodaeth atoch am y rhaglen radd hon pan ddaw ar gael e.e. modiwlau, ffioedd, dyddiad dechrau ayyb.

Disgrifiad

Nod ein MA mewn Cyfieithu a Chyfathrebu Rhyngddiwylliannol yw'ch arfogi fel ieithydd â'r wybodaeth, y sgiliau a'r arbenigedd technolegol sydd eu hangen i lwyddo yn y diwydiant ieithoedd byd-eang amrywiol.

Bydd y rhaglen hon yn eich paratoi'n drylwyr ar gyfer gyrfa broffesiynol, a all gynnwys gweithio fel cyfieithydd, cyfieithydd ar y pryd, neu arbenigwr cyfathrebu rhyngddiwylliannol, yn ogystal â rolau sy'n dod i'r amlwg megis arbenigwr lleoleiddio a thrawsgreu, rheolwr prosiectau, arbenigwr technoleg iaith neu weithiwr proffesiynol mewn addasu cynnwys.

Drwy gydol eich astudiaethau, byddwch yn gweithio gyda Saesneg ac un neu fwy o ieithoedd ychwanegol (yn amodol ar alw), sy'n cynnwys:

• Arabeg
• Tsieineaidd
• Ffrangeg
• Almaeneg
• Eidaleg
• Sbaeneg
• Cymraeg

Mae'r radd yn cynnig strwythur hyblyg sy'n eich galluogi i deilwra eich astudiaethau i'ch diddordebau proffesiynol. Hefyd mae sawl hyd a fersiwn ar gael ar gyfer astudio’r rhaglen, fel a ganlyn:

• MA safonol (amser llawn neu ran-amser dros 1, 2 neu 3 blynedd)
• MA estynedig (amser llawn neu ran-amser dros 2 neu 4 blynedd)
• MA ddwbl ar y cyd ag Université Grenoble (amser llawn dros 2 flynedd) gan arwain at raddau MA a ddyfernir gan y ddau sefydliad

Mae'r fersiwn estynedig hefyd yn eich galluogi i wella eich profiad a'ch cyflogadwyedd drwy:

• Gwblhau credydau arbenigol ychwanegol yn Abertawe; neu
• Dreulio semester dramor yn un o'n prifysgolion partner

Pynciau sy'n Debygol o Gael eu Trafod

Yn y rhan gyntaf, gallwch ddewis o blith y llwybrau canlynol:

Cyfieithu Proffesiynol/Technolegol
Gan gyfuno cyfieithu uwch â hyfforddiant ar y technolegau sy'n diffinio'r diwydiant, gyda modiwlau ar y canlynol:

• Cyfieithu â Chymorth Technoleg
• Lleoleiddio a Thrawsgreu yn yr Oes AI
• Cyfieithu Clyweledol

Cyfieithu ar y Pryd
Gan ddarparu hyfforddiant trwyadl ar ddamcaniaeth ac ymarfer cyfieithu ar y pryd, gyda modiwlau ar y canlynol:

• Cyfieithu ar y pryd mewn cynadleddau
• Cyfieithu ar y pryd ym maes gofal iechyd

Cymysg
Gallwch hefyd gyfuno modiwlau o'r ddau lwybr, gan greu rhaglen deilwredig.

Mae modiwlau dewisol ar y naill lwybr yn cynnwys:

• Efelychu Swyddfa Gyfieithu
• Cloddio Gwybodaeth
• Iaith Cyfieithu Arbenigol

Yn yr ail ran, gallwch gwblhau:

• Interniaeth 12 wythnos
• Dau Gyfieithiad Estynedig gyda sylwadau
• Traethawd hir academaidd traddodiadol

Ar y rhaglen estynedig, gallwch ddechrau dysgu iaith hollol newydd (Eidaleg, Catalaneg, Portiwgaleg), neu gallwch wella'ch gwybodaeth am Ffrangeg, Almaeneg neu Sbaeneg.

Dyddiad Cychwyn Bwriededig

Medi 2026

Cwblhewch y ffurflen isod fel y gallwn yrru mwy o wybodaeth atoch am y rhaglen radd hon pan ddaw ar gael e.e. modiwlau, ffioedd, dyddiad dechrau ayyb.