Gwleidyddiaeth a Pholisi Cymharol (CPP)

Dr Bettina Petersohn

Mae Dr Petersohn yn Uwch Ddarlithydd mewn Gwleidyddiaeth, yn gweithio ar ffederaliaeth gymharol, cydlynu rhynglywodraethol, a democratiaeth leol. Mae hi'n gwasanaethu fel Cyd-arweinydd Gweithgor Cydlynu Llorweddol IGCOORD (Cydlynu Rhynglywodraethol o Lywodraethu Lleol i Lywodraethu Ewropeaidd). Ymhlith prosiectau eraill, mae ei hymchwil ar hyn o bryd yn canolbwyntio ar gydlynu llywodraeth leol yn y DU, gan ganolbwyntio'n benodol ar y berthynas rhwng ffactorau gwleidyddol ac economaidd, homoffili gwleidyddol, a phwysau problemau. Yn ogystal, mae Dr Petersohn yn gweithio gydag ysgolheigion o'r DU ac yn rhyngwladol ar brosiect arolwg o gynghorwyr trefol yn Ewrop, gan ganolbwyntio ar eu hannibyniaeth, eu dylanwad ar bolisi a chanfyddiad y cyhoedd ar draws cyd-destunau sefydliadol. 

Dr Bryn Willcock

Mae Dr Willcock wedi bod yn addysgu ym Mhrifysgol Abertawe ers 1995. Mae ei brif ddiddordebau addysgu ac ymchwil yn canolbwyntio ar bolisi tramor America, hanes America, terfysgaeth, hanes niwclear yn ogystal â gwleidyddiaeth Prydain ac Ewrop. Mae Dr Willcock wedi cyfrannu at lyfrau a gyhoeddwyd gan Oxford University Press a Taylor and Francis. Yn 2010, bu’n rhan o’r prosiect PartiRep, astudiaeth gymharol a oedd yn cynnwys Ewrop gyfan o fecanweithiau cysylltedd rhwng dinasyddion a’r system wleidyddol. Yn 2014, bu’n gweithio fel ymgynghorydd ar bolisi cyhoeddus Prydain wrth greu prosiect pleidleisio EUVOX, gwefan sy’n galluogi pleidleiswyr i gymharu eu barn â barnau pleidiau gwleidyddol amrywiol.

Dr Caner Sayan

Mae Dr Sayan Uwch-ddarlithydd mewn Dadansoddi Polisi sy'n arbenigo yng ngwleidyddiaeth dŵr, cyfiawnder amgylcheddol, llywodraethu dŵr a newid hinsawdd. Mae ganddo ddiddordeb arbennig mewn addasu i newid hinsawdd yn Affrica, Twrci, a'r Dwyrain Canol. Ymhlith prosiectau eraill, mae ar hyn o bryd yn gweithio ar allu tyddynwyr yn Kenya i wrthsefyll sychder a dŵr a rhanbarthiaeth yn Nalgylch Afon Ewffrates-Tigris. Mae Dr Sayan yn gwasanaethu ar bwyllgor llywio Sefydliad Ymchwil Gweithredu Hinsawdd Abertawe a Rhwydwaith Ymchwil Gweithredu Hinsawdd y Gyfadran.

Dr Dion Curry

Mae Dr Curry yn Athro Cyswllt mewn Gwleidyddiaeth a Pholisi Cyhoeddus, yn gweithio ar ymddiriedaeth wleidyddol, cyfreithlondeb gwleidyddol, llywodraethu, arbenigedd/cymunedau epistemig, a thechnolegau aflonyddgar. Mae hefyd yn gwasanaethu fel Arweinydd Ymchwil Ysgol Gwyddorau Cymdeithasol Abertawe a Dirprwy Arweinydd Amgylchedd yr uned ar gyfer REF'28. Ymhlith prosiectau eraill, ar hyn o bryd mae'n ymchwilio i seiliau seicolegol canfyddiadau dinasyddion o ymddiriedaeth mewn arbenigedd, gyda chefnogaeth Grant Uwchgynhadledd MASI dan arweiniad Dr Gabi Jiga-Boy (yr Ysgol Seicoleg), ac effaith a llywodraethu technoleg cadwyn flociau.

Dr Kristan Stoddart 

Mae Kristan Stoddart yn Athro Cyswllt ar gyfer Bygythiadau Seiber yn Ysgol y Gwyddorau Cymdeithasol ac mae hefyd yn gweithio gydag Ysgol y Gyfraith Hillary Rodham Clinton. Mae'n aelod o'r Prosiect ar Faterion Niwclear yn y Ganolfan Astudiaethau Strategol a Rhyngwladol yn Washington DC ac yn Gymrawd y Gymdeithas Hanesyddol Frenhinol. Yn 2022 fe'i gwnaed yn Gymrawd Cymdeithas Frenhinol y Celfyddydau (FRSA). Mae wedi cwblhau tri llyfr yn ddiweddar, gan gynnwys Cyberwar: Threats to Critical Infrastructure (Palgrave/Springer, 2022). Yn achos y ddau arall, mae’r naill yn archwilio ymosodiadau seiber Rwsia yn erbyn y Gorllewin a’r llall yn edrych ar sut mae Tsieina wedi mabwysiadu ysbïo seiber ymosodol. Yn ogystal, mae'n cymryd rhan mewn prosiect ymchwil a ariennir gan yr Undeb Ewropeaidd sy'n archwilio i ba raddau gall yr UE wrthsefyll rhyfela hybrid.

Yr Athro Jonathan Bradbury

Mae’r Athro Bradbury yn ymchwilio i’r wleidyddiaeth diriogaethol sy’n gysylltiedig â sut caiff y DU ei llywodraethu, mewn perthynas â’r llywodraethau datganoledig a llywodraeth leol. Mae ganddo ddiddordeb mewn dadansoddi crefft llywodraethu, yn ogystal â goblygiadau gwleidyddol llywodraeth diriogaethol a’r goblygiadau o ran polisi a chynrychiolaeth. Mae ei waith diweddar wedi canolbwyntio ar ddadansoddi datganoli ers y 1990au hwyr ac mae’n cynnwys ei lyfr Constitutional Policy and Territorial Politics in the UK: Union and Devolution, 1997-2007 (Bristol University Press, 2021). Ers 2021, mae wedi bod yn Ddeon Cysylltiol yng Nghyfadran y Dyniaethau a'r Gwyddorau Cymdeithasol, yn gyfrifol am Ymchwil, Arloesi ac Effaith. Ef hefyd yw Arweinydd Cyfrifon Cyflymu Effaith yr ESRC a’r AHRC yn y Brifysgol.

Mae Dr Bromfield yn ymchwilydd ym meysydd ymgysylltu gwleidyddol, gemeiddio, darogan gwleidyddol a chyfranogi gwleidyddol. Mae ganddo BA mewn Gwleidyddiaeth, MSc mewn Cyfrifiadureg a PhD mewn Gwleidyddiaeth o Brifysgol Abertawe. Yn nhraethawd ymchwil ei PhD, a ariannwyd gan Ysgoloriaeth Rhagoriaeth Ymchwil Prifysgol Abertawe, archwiliodd effaith seicolegol defnyddio platfform darogan gwleidyddol ar-lein. Yn 2022 defnyddiodd gronfa UKRI Challenge gwerth £12,932 i gynnal arbrawf maes gyda 500 o gyfranogwyr yn defnyddio ei wefan ddarogan ei hun. Mae’n bwriadu parhau â'i ymchwil i ddarogan gwleidyddol ag elfennau gemeiddio, â’r nod o gynnwys mwy o etholiadau i ychwanegu at ffocws ei PhD ar Etholiadau Lleol y DU ym mis Mai 2023.

Yr Athro Matthew Wall

Mae'r Athro Wall yn cynnal ymchwil i wleidyddiaeth gymharol, etholiadau a barn y cyhoedd, darogan etholiadau, cymwysiadau cyngor pleidleisio a systemau etholiadol. Mae ei ymchwil wedi cael ei chefnogi, ymhlith eraill, Gronfa Robert Carr, yr Academi Brydeinig ac Ymddiriedolaeth Leverhulme, a Chymdeithas Ddysgedig Cymru. Mae ei brosiectau presennol yn canolbwyntio ar wleidyddiaeth ddigidol, gan gynnwys defnyddio newydd-bethau amhleidiol fel rhaglenni cyngor ar bleidleisio mewn ymgyrchoedd etholiadol, darogan etholiadau amser real, ac ymgysylltu democrataidd.

Danielle Joyce 

Mae ymchwil Danielle yn canolbwyntio ar y perthnasoedd cymhleth rhwng dosbarth cymdeithasol, lle a theyrngarwch i blaid wleidyddol. Drwy ddadansoddiad cynhwysfawr o ddata demograffig, dangosyddion economaidd-gymdeithasol a thueddiadau etholiadol, mae prosiect ei PhD yn ceisio esbonio’r grymoedd cydgysylltiol sy’n dylanwadu ar wleidyddiaeth gyfoes y DU. Drwy nodi’r cysylltiadau rhwng dosbarth, lle a theyrngarwch, mae’n ceisio egluro’r ffactorau sy’n ysgogi newidiadau yn newisiadau pleidleiswyr yn y blynyddoedd diweddar. Bydd y prosiect hwn yn defnyddio ymagweddau dulliau cymysg, gan gyfuno data meintiol sydd eisoes ar gael â chyfweliadau ansoddol, er mwyn darparu dealltwriaeth o’r dirwedd wleidyddol newidiol. Nod y canfyddiadau fydd rhagweld tueddiadau pleidleisio’r dyfodol a llywio strategaethau ymgysylltu gwleidyddol wrth i ddynameg wleidyddol-gymdeithasol ddatblygu.

Keiron Burgess

Mae Keiron yn fyfyriwr PhD ym Mhrifysgol Abertawe, ac mae ei ymchwil yn canolbwyntio ar y cydadwaith rhwng Argyfyngau Iechyd ar Lefel Pandemig (PLHC) a llwybr democrataidd cyfundrefnau gwleidyddol hybrid. Mae'n codi'r ddadl bod PLHCs yn chwalu’r cydbwysedd ac mae angen ymateb gwleidyddol drwy bolisïau o fewn y broses rheoli argyfwng, gydag ymatebion o'r fath yn meddu ar y gallu i ddarparu llwybrau gwneud penderfyniadau canolog neu gyfethol gwleidyddol. Mae hyn yn agor y drws i’r traethawd ymchwil drafod elfennau mewnbwn ac allbwn cyfreithlondeb a'u pwysigrwydd tuag at ddemocrateiddio, neu awtocrateiddio, posibl cyfundrefnau hybrid.

Quadri Alimi

Mae Quadri Alimi yn fyfyriwr PhD ym Mhrifysgol Abertawe. Mae ei brosiect ymchwil, o'r enw 'Identity politics: Examining the inclusion of religio-political identity into Nigeria's modern democracy', yn archwilio gwreiddiau gwleidyddiaeth hunaniaeth yn Nigeria, gyda naratif manwl o bedwar cyfnod: y cyfnod cyn-drefedigaethol, y cyfnod trefedigaethol, y cyfnod ôl-drefedigaethol/annibyniaeth a'r cyfnod neo-drefedigaethol. Gan ddefnyddio ymagwedd dulliau cymysg, mae'n archwilio allgáu gwleidyddol ac amddifadedd economaidd fel ysgogwyr sylfaenol gwleidyddiaeth hunaniaeth. Mae Quadri'n meddu ar radd BA mewn Astudiaethau Crefyddol Islamaidd ac MA mewn Astudiaethau Affricanaidd a Diaspora o Brifysgol Lagos. Yn 2024, dyfarnwyd iddo Ysgoloriaeth Rhagoriaeth Ymchwil Ôl-raddedig Ryngwladol Prifysgol Abertawe (SUIPRES) i ddilyn astudiaethau PhD mewn Gwleidyddiaeth a Chysylltiadau Rhyngwladol.

Rapee Tapta

Mae Rapee yn fyfyriwr PhD ym Mhrifysgol Abertawe sy’n ymchwilio i hawliau dynol, diogelwch dynol a gweithwyr mudol. Mae ei draethawd ymchwil yn archwilio sut mae gweithredoedd llywodraethau a gweithredu polisïau yn effeithio ar weithwyr mudol, yn benodol y rhai heb lawer o sgiliau. Mae ei gefndir addysgol yn cynnwys BA mewn Llywodraeth Leol ac MA mewn Astudiaethau Ewropeaidd o brifysgolion Khon Kaen a Chulalongkorn yng Ngwlad Thai. Yn 2024, dyfarnodd Gweinyddiaeth Addysg Uwch, Gwyddoniaeth, Ymchwil ac Arloesi Gwlad Thai ysgoloriaeth iddo i ymgymryd ag astudiaethau PhD ym maes gwleidyddiaeth a chysylltiadau rhyngwladol.

Molly Cranch

Mae Molly yn fyfyrwraig PhD sy'n cynnal ymchwil sy'n canolbwyntio ar ddiogelwch ecolegol, asiantaeth ôl-ddynol, ecoleg wleidyddol a chyfiawnder amgylcheddol. Mae ei thraethawd ymchwil yn archwilio sut mae trafodaethau diogelwch amlwg yn methu â chydnabod lleisiau amgen mewn arferion diogelwch hinsawdd. Gan ddefnyddio safbwyntiau ôl-fodernistaidd, mae hi'n ceisio datgelu sut y gall prosesau ecolegol deialog, myfyrdod a gostyngeiddrwydd roi asiantaeth i actorion ôl-ddynol mewn arferion diogelwch byd-eang. Gyda'i chefndir mewn Daearyddiaeth (BA), ac Ymchwil Rhyngwladol a Gwleidyddiaeth (MA) mae hi'n edrych i ddefnyddio ei chefndir rhyngddisgyblaethol i ddatgelu syniadau newydd i ailddychmygu beth mae diogelwch yn ei olygu yn wyneb argyfwng hinsawdd.