Proffiliau Myfyrwyr Israddedig sy'n astudio trwy gyfrwng y Gymraeg

"Roedd aros yng Nghymru i astudio yn bwysig i fi, a Phrifysgol Abertawe oedd y sefydliad agosaf at gartref oedd yn cynnig Meddygaeth i Raddedigion. Pan ddes i’r diwrnod agored ac am fy nghyfweliad, roedd y Brifysgol yn teimlo fel lle cyfeillgar iawn. Roedd hyn yn wir am bawb nes i gyfarfod yn yr Ysgol Feddygol hefyd, a’r niferoedd weddol fach ar y cwrs yn gwneud i'r profiad deimlo'n fwy personol ac fel bod yn rhan o deulu. Dwi wedi bod yn ffodus i gael cwrdd â phobl a gweld pethau arbennig, sydd wir yn fraint. Dwi’n teimlo’n ffodus fy mod wedi cael lle i astudio Meddygaeth yma. Mae’r cwrs mor ddifyr ac yn cadw ni’n brysur ond dyw e ddim yn teimlo fel gymaint â hynny o waith pan fydd popeth mor ddiddorol.

"Mae cymryd y cyfle i astudio rhan o’r cwrs yn y Gymraeg yn bwysig i fi hefyd. Dwi wedi bod yn ffodus i dderbyn ysgoloriaethau drwy gydol fy amser yn y Brifysgol, Ysgoloriaeth Cymhelliant y Coleg Cymraeg ac Ysgoloriaeth Academi Hywel Teifi. Dwi wedi cael nifer o gyfleoedd ym Mhrifysgol Abertawe fel myfyriwr Cymraeg. Dwi wedi bod ar banel cyfweld y cwrs Meddygaeth, yn cynnig cyfweliadau Cymraeg i ddarpar fyfyrwyr. Bues i hefyd yn Llysgennad y Coleg Cymraeg Cenedlaethol am flwyddyn, a gobeithio gallu ysbrydoli myfyrwyr ysgolion Cymru i astudio Meddygaeth. Eleni, fe ges i’r cyfle unigryw i gymryd rhan yn Neges Heddwch ac Ewyllys Da yr Urdd oedd yn gyfle da i drafod materion pwysig a chwrdd â myfyrwyr eraill fydden i byth wedi gallu eu cyfarfod heblaw am y cyfle hwn.

"Mae yna gymaint o gymdeithasau i ymuno â nhw a rhywbeth at ddant pawb. Dwi wedi ymuno â’r côr gofal iechyd a sefydlu Cymdeithas Oncoleg Abertawe sydd wedi bod yn hwyl. Trwy sefydlu Cymdeithas Feddygol Gymraeg Prifysgol Abertawe dwi’n gobeithio y cawn ni gymdeithasu mwy drwy gyfrwng y Gymraeg a rhwydweithio gyda meddygon Cymraeg eraill."

"Rydw i’n astudio Geneteg Feddygol, felly’n edrych ar driniaethau a rheolaeth afiechydon. Mae’r cwrs yn cyffwrdd ar amrywiaeth o bynciau fel Imiwnoleg, Sgiliau i Ymchwilwyr a Bioleg Celloedd Ewcaryotig. Mae astudio yn Abertawe wedi bod yn brofiad gwahanol i mi oherwydd dechreuais yn ystod Covid-19 ond rydw i wedi cael mwy o ddarlithoedd a gweithdai wyneb yn wyneb ar y campws eleni a bob amser yn edrych ymlaen atynt. Fy hoff bwnc ar fy nghwrs hyd yma yw Imiwnoleg a Ffisioleg Ddynol. Rydw i’n hoff iawn o ddysgu am systemau’r corff a sut mae triniaethau'n gweithio a thrin amrywiaeth o glefydau a hefyd sut mae’r corff yn ymateb i’r driniaeth.

"Wrth astudio elfennau o fy nghwrs yn y Gymraeg, rydw i’n parhau i ddefnyddio’r iaith ar lafar ac yn ysgrifenedig. Mae defnyddio’r iaith mewn ffordd ffurfiol ac anffurfiol yn bwysig iawn i mi fel Cymraes. Mae yna lawer o gefnogaeth Gymraeg ym Mhrifysgol Abertawe. I ddechrau mae Academi Hywel Teifi a Changen y Coleg Cymraeg yn cynnig cefnogaeth i astudio yn y Gymraeg.  Mae hefyd cefnogaeth ar gael gan Diwtoriaid Personol sydd yn siarad Cymraeg ac mae’r grwpiau dysgu yn dueddol o fod yn llai sy'n rhoi’r hyder i bobl holi cwestiynau a mynegi barn. Rydw i hefyd yn derbyn ysgoloriaeth Academi Hywel Teifi a’r Coleg Cymraeg Cenedlaethol gan fy mod i’n astudio fy nghwrs yn y Gymraeg.

"Yn fy mlwyddyn gyntaf dewisais fyw mewn llety Cymraeg ar y campws. Rydw i mor ddiolchgar am y cyfle yma oherwydd roedd hyn wedi sicrhau fy mod i gyda chyfoedion sy’n rhannu’r gallu i siarad yr un iaith sydd yn rhoi ymdeimlad cartrefol mewn amgylchedd hollol newydd."

“Mae Adran y Gymraeg yn wych gan ei bod hi’n cynnig modiwlau i bawb megis modiwlau cyfreithiol a hanesyddol ynghyd â modiwlau gramadegol.  Yn bennaf, rydw i wedi mwynhau astudio’r modiwlau mwy llenyddol oherwydd rydw i wrth fy modd yn darllen yn enwedig nofelau o gyfnodau gwahanol. Ar ben hyn, roedd fy modiwl cyfieithu a astudiais yn fy nhrydedd flwyddyn yn ddiddorol oherwydd cefais y cyfle i weld sut mae’r Gymraeg yn cael ei defnyddio mewn gyrfa benodol bob dydd.”

“Mae fy mhrofiad i fel myfyrwraig israddedig wedi bod yn eithaf gwahanol o gymharu â myfyrwyr eraill oherwydd penderfynais i beidio byw ar y campws na’r ddinas yn ystod fy amser yn astudio yn Abertawe. Felly, mi wnes i deithio i’r campws bob dydd er mwyn mynychu fy narlithoedd. Fodd bynnag, roeddwn i'n dal i deimlo fel rhan o’r gymuned yn Abertawe yn enwedig gan fod pawb sy’n rhan o Adran Gymraeg Abertawe (y darlithwyr a’r myfyrwyr) yn glos a’n gefnogol iawn. Rydw i’n dod o gefndir di-Gymraeg a chyn dechrau fy ngradd yn Abertawe doeddwn i ddim yn defnyddio’r Gymraeg tu allan i’m dosbarthiadau Cymraeg yn fy ysgol gyfun o gwbl. Mae’r gymuned Gymraeg yn Abertawe wedi rhoi’r cyfle i mi siarad Cymraeg yn aml ac yn ystod fy nghyfnod yn Abertawe roeddwn i'n defnyddio’r iaith bob dydd! Rydw i hefyd wedi cael y cyfle i gwrdd â nifer o bobl newydd trwy gymdeithasu trwy gyfrwng y Gymraeg yn rheolaidd felly mae’r gymuned Gymraeg yn Abertawe yn wych."

"Penderfynais astudio trwy gyfrwng y Gymraeg gan fy mod yn teimlo’n gryf dros y Gymraeg. Fel siaradwr Cymraeg mae Prifysgol Abertawe a’r Coleg Cymraeg wedi cynnig cyfleoedd anhygoel i mi, fel bod yn rhan o’r rhaglen ddogfen S4C ‘Nyrsys’ trwy ddilyn fy nhaith fel myfyriwr ym mlwyddyn gyntaf y cwrs nyrsio. Roedd yn brofiad bythgofiadwy. Rwyf hefyd wedi derbyn cyfleoedd i gynrychioli‘r Coleg Cymraeg a Phrifysgol Abertawe trwy rannu fy mhrofiadau fel myfyriwr nyrsio gyda darpar fyfyrwyr mewn ysgolion wrth iddynt ystyried ar eu cam nesaf ar ôl lefel A. Cefais fy newis i fod yn gynrychiolydd ar dîm Academi Myfyrwyr Arweiniol y Brifysgol. Ers hynny, rwyf wedi cael gwahoddiad i siarad mewn cynhadledd ynghylch pwysigrwydd yr iaith Gymraeg ym maes arweinyddiaeth.

"Ar ôl canlyniadau gwych a chefnogaeth heb ei hail ar y modiwl cyntaf wnes i astudio trwy gyfrwng y Gymraeg, rwyf wedi penderfynu ysgrifennu fy holl draethodau yn y Gymraeg. Mae'r gefnogaeth Gymraeg yn rhagorol gan gynnwys fy nhiwtor personol Cymraeg a’r darlithwyr eraill sy’n rhoi naws gartrefol i Brifysgol Abertawe.

"Rydw i’n derbyn Ysgoloriaeth Cymhelliant y Coleg Cymraeg Cenedlaethol. Mae’r Ysgoloriaeth yn golygu fy mod wedi gallu parhau â'm hastudiaethau trwy gyfrwng y Gymraeg sydd wedi gwneud fy mhrofiad gymaint yn well. O safbwynt ariannol, mae derbyn £500 y flwyddyn dros gyfnod fy ngradd wedi fy helpu'n sylweddol i leihau’r baich hwnnw."

“Wnes i benderfynu astudio ym Mhrifysgol Abertawe ar yr union ddiwrnod y gwnes i fynychu'r diwrnod agored, oherwydd wnes i gwympo mewn cariad â'r ardal yn syth. Roeddwn i’n dwlu ar y ffaith y gallwn i fyw ar gampws oedd mor agos at y traeth, a bod gwersi dim ond 5 munud i ffwrdd wrth gerdded. Wnes i fwynhau cwblhau fy ngradd yn fawr iawn, a dwi’n teimlo ei bod wedi fy helpu i gymaint. Yn ogystal â gwella fy sgiliau iaith, bellach mae gen i brofiad o weithio dramor mewn ysgol gynradd - a oedd yn brofiad anhygoel. Mae hefyd wedi fy ngalluogi i barhau â’m hastudiaethau ym Mhrifysgol Abertawe, ar ffurf cwrs meistr mewn Cyfieithu Proffesiynol, sy’n rhoi ystod anhygoel o sgiliau cyflogadwyedd i mi trwy ganolbwyntio ar dechnoleg cyfieithu (offer CAT) a rhoi’r cyfle i mi gwblhau interniaeth fel cyfieithydd Cymraeg. Rydw i hefyd wedi ennill gwybodaeth go iawn am y ffordd y mae ein gwlad yn cael ei rhedeg diolch i fodiwlau fel ‘Datganoli a’r Gyfraith.

“Roeddwn i’n ddigon ffodus i astudio rhan Sbaeneg fy nghwrs trwy gyfrwng y Gymraeg ac felly ennill ysgoloriaeth gan y Coleg Cymraeg Cenedlaethol. Roeddwn i’n mynychu gwersi gyda myfyrwyr eraill, ond cefais sesiynau “adolygu” un-i-un gyda Dr Geraldine Lublin bob wythnos hefyd. Mae’r ffaith fy mod i wedi astudio elfennau o’m cwrs i drwy gyfrwng y Gymraeg, yn arbennig fel siaradwr ail iaith, wir yn profi fy mod i’n hyfedr yn yr iaith. Dyma rywbeth y galla i ei gynnwys ar fy CV a fydd yn dangos i gyflogwyr nad ydw i’n llai rhugl neu hyderus na siaradwr iaith gyntaf.

“Dyma i chi brifysgol lle rydych chi wedi'ch amgylchynu gan ddarlithwyr cefnogol a chyfeillgar, ystod eang o gyfleusterau dysgu, ac yn bwysicaf oll - bywyd nos anhygoel!”

"Dewisais Abertawe yn benodol o'r holl brifysgolion eraill yng Nghymru oherwydd ei lleoliad yn y ddinas a'r daith lawr i'r traeth. Rydw i’n astudio ar gampws Singleton a gan fod y campws yn weddol fach rwyt ti’n dod i adnabod wynebau pobl o gwmpas y lle sy’n rhoi ymdeimlad cartrefol a chlos.

"Rwy’n astudio Hanes, sy’n bwnc eang gyda'r opsiwn i ddysgu am gyfnodau amser gwahanol. Mae astudio’r pwnc hwn yn Abertawe wedi bod yn wych gan fy mod yn gwneud rhywfaint o’r cwrs yn y Gymraeg. Trwy wneud hyn rydw i wedi cwrdd â phobl debyg i fi ac mae hefyd wedi fy nghyflwyno i gymdeithasau eraill sydd â diddordebau tebyg. Rwy'n mwynhau dysgu am y dadeni ac am gelf o'r cyfnod hwn yn arbennig. Rwy’n credu bod astudio rhan o’r cwrs trwy gyfrwng y Gymraeg wedi fy helpu i fagu hyder yn y Gymraeg. Rwy' wedi datblygu’r sgil o wneud cyflwyniadau llafar i’r dosbarth sydd yn fy mharatoi ar gyfer gyrfa yn y dyfodol lle bydd yn rhaid i mi siarad a chario fy hun yn hyderus.

"Mae fy mhrofiad hyd yma wedi bod yn gadarnhaol iawn gan fy mod i wedi manteisio ar y cyfleoedd i gwrdd â phobl newydd. Trwy ymuno â chymdeithasau y tu allan i'm hastudiaethau, rwyf wedi gallu rhoi cynnig ar bethau newydd. Mae'r gymuned Gymraeg yma yn Abertawe yn wych. Rydw i wedi ymuno â’r GymGym ac rydym yn cwrdd bob pythefnos a threfnu tripiau gwych gyda myfyrwyr Cymraeg eraill."

"Un o’r prif resymau dewisais Brifysgol Abertawe oedd oherwydd aelodau staff Ysgol y Gyfraith.  Wrth ymweld ar ddiwrnod agored, roedd y staff mor garedig ac yn amlwg yn frwdfrydig i ddysgu. Hefyd roedd tipyn mwy o opsiynau ar gyfer dewisiadau'r ail a’r drydedd flwyddyn sydd yn agor mwy o ddrysau wedi i mi raddio. Fel merch o Sir Benfro, un o’r pethau gorau am Brifysgol Abertawe yw’r ffaith fy mod yn dal i fod yn agos at fy ffrindiau o gartref ond hefyd gyda’m ffrindiau newydd.

"Credaf fod astudio trwy gyfrwng y Gymraeg yn cyflwyno mwy o gyfleoedd o ran gyrfa yn y dyfodol ac yn ffordd dda o wella fy sgiliau cyfathrebu cyffredinol.  Rydw i’n ffodus fy mod i’n derbyn Ysgoloriaeth Cymhelliant y Coleg Cymraeg Cenedlaethol sy’n golygu fy mod i’n derbyn £500 am astudio gwerth 40 credyd yn y Gymraeg bob blwyddyn.

"Yn fy amser hamdden rydw i’n dawnsio fel rhan o Gymdeithas Ddawns Prifysgol Abertawe heb sôn am fod yn ysgrifenyddes y gymdeithas!"

"Roedd yn bwysig i mi gwblhau fy nghwrs yng Nghymru ac roedd Abertawe’n teimlo’n gartrefol gyda staff cyfeillgar, cefnogol ac mor frwdfrydig am y cwrs. Yn ogystal, roeddwn yn gwybod bod Prifysgol Abertawe yn sefydliad arbennig iawn gydag enw da ar gyfer Bydwreigiaeth.

"Mae’n gwrs dwys gyda hanner y cwrs yn cael ei addysgu yn y brifysgol a'r hanner arall mewn lleoliadau ymarfer, gan weithio gyda bydwragedd mewn timau cymunedol, canolfannau geni a arweinir gan fydwreigiaeth ac unedau mamolaeth mewn ysbytai.  Mae’r cwrs wedi gallu rhoi'r cydbwysedd i mi barhau mewn addysg yn ogystal â chael blas ar y byd gwaith go iawn. Er yn gwrs anodd dwi’n gwybod fy mod i ar y radd gywir ac rwy’n mwynhau pob eiliad wrth ddod a llawenydd newydd mewn i'r byd bob dydd yn ogystal â chefnogi mamau a’u teuluoedd trwy rhai o amserau anoddaf eu bywydau.

"Mae’r ffaith mod i wedi parhau i astudio elfennau o’r cwrs drwy gyfrwng y Gymraeg yn rhoi'r gallu i mi ddarparu gofal i fenywod yn ei mamiaith sydd mor bwysig er mwyn cynnig y gofal gorau posib. Fe ddysgais siarad Cymraeg pan yn unarddeg oed ac mae’n rhywbeth rwyf yn falch iawn ohono ac felly mae’n bwysig i mi barhau i’w defnyddio hi. Mae’r gymuned Cymraeg ym Mhrifysgol Abertawe yn un arbennig iawn ac yn un rwy’n ei werthfawrogi’n fawr - mae pawb mor gyfeillgar."