Cyngor ar gyfer myfyrwyr sy'n byw oddi ar y campws

Cysylltwch â'ch cymuned

Beth rydym yn ei wneud

Mae'r Tîm Cymuned yma i'ch helpu i deimlo'n ddiogel ac wedi'ch cysylltu â'ch cymuned leol, ac i'ch cefnogi gydag unrhyw broblemau allai fod gennych wrth fyw oddi ar y campws.

Ein nod yw hybu cydlyniad cymunedol rhwng ein myfyrwyr a phreswylwyr lleol drwy ein gwasanaethau. Gallai hyn fod drwy gefnogaeth megis eich helpu i ymdrin â gweithdrefnau cwyno, neu ar nodyn mwy positif, drwy gynnal digwyddiadau yn y gymuned ar gyfer myfyrwyr a phreswylwyr.

Gallwch gysylltu â'ch Swyddog Cyswllt Cymunedol, drwy e-bostio community.campuslife@abertawe.ac.uk.

Ei rôl yw cynrychioli myfyrwyr ac aelodau'r gymuned, yn ogystal â chysylltu â'n partneriaid yn y cyngor lleol, yr heddlu a'r sector llety preifat. Mae yn ymweld yn rheolaidd ag ardaloedd lle mae llawer o fyfyrwyr yn byw, megis Uplands, Brynmill a Thwyni Crymlyn, felly cofiwch fynd ati am sgwrs os byddwch yn ei gweld.

Cofiwch cadw at y Siarter Myfyrwyr, gallwch chi ddarganfod y siarter yma.

Cliciwch fan hyn i ddarganfod mwy am yr ap SafeZone

Diogelwch Harddwch Campws y Bae:

Mae Bae Abertawe'n ardal hyfryd o draethau, môr ac awyr agored, sydd wedi bod yn hanfodol i fwynhad llawer o bobl o natur a chymdeithasu yn ystod eu hamser yn Abertawe. Os ydych yn cymdeithasu ar y traeth, rydym yn eich annog i lynu wrth ganllawiau presennol y llywodraeth sydd ar gael yma.

Mae'n bwysig hefyd eich bod yn rhoi eich sbwriel yn y biniau cyn gadael ac, os yw'r biniau'n llawn, ewch â'ch sbwriel adref. Drwy glirio ein sbwriel ar ein hôl, gallwn sicrhau bod y Bae'n parhau'n hafan natur hyfryd y gall myfyrwyr, aelodau'r gymuned, plant a chŵn i gyd ei mwynhau.

Os oes gennych ddiddordeb mewn helpu i gadw'r traeth yn lân, rydym yn awgrymu dilyn mudiadau megis 2minutebeachclean a Don't Be a Tosser sy'n trefnu sesiynau casglu sbwriel ar raddfa fawr pan fydd eu hangen mwyaf. Gallwch hefyd wirfoddoli gyda Discovery ar sesiynau casglu sbwriel rheolaidd gyda'ch cyd-fyfyrwyr ac aelodau'r gymuned.

Canllawiau Craff i Osgoi Cwynion am Sŵn:

Yn aml mae gan fyfyrwyr ac aelodau'r gymuned ffyrdd o fyw gwahanol, gan gynnwys bod yn weithgar ar amserau gwahanol, sy'n golygu y gall sŵn darfu ar gymdogion. Fel tenantiaid neu berchnogion tŷ, mae gennych hawl i fwynhau'r eiddo fel y gwelwch orau ac nid yw materion megis cau drysau â chlec, defnyddio'r grisiau neu siarad yn cael eu hystyried fel cwynion.
Fodd bynnag, gallwch gael ymweliad gan yr heddlu os bydd rhywun yn cwyno am sŵn anarferol o uchel megis gan seinyddion neu'r teledu. Fel rheol, os gallwch glywed eich cerddoriaeth neu'r teledu hyd yn oed o'r tu allan i'r tŷ, mae'n debygol eu bod yn rhy swnllyd. Dyma ychydig ganllawiau i leihau sŵn.

Peidiwch â gosod seinyddion neu'r teledu yn erbyn wal a rennir
Caewch y ffenestri i gadw'r sŵn i mewn
Wrth chwarae gemau ar eich dyfeisiau cadwch sŵn eich llais a sŵn y dyfeisiau i lawr, yn enwedig yn ystod yr oriau y gall rhai pobl eu hystyried yn oriau anghymdeithasol

Llyfryn Cynildeb

Sut gallwn ni helpu:

Gwrthdaro yn eich tŷ

Mae cyfathrebu yn allweddol. Rydym yn annog sefydlu sianel gyfathrebu glir am y materion neu'r anghytundeb - ac er y gallai fod yn demtasiwn gwneud hyn dros negeseuon testun, gall hyn waethygu'r sefyllfa oherwydd dryswch ynghylch ystyr a thôn. Rydym yn awgrymu eich bod yn eistedd i lawr ac yn siarad allan, gan wneud yn siŵr eich bod yn edrych ar y mater hwnnw o safbwynt y person arall.

Os ydych yn poeni bod y gwrthdaro yn eich tŷ yn eithafol, neu os hoffech gael cefnogaeth ychwanegol, gall Swyddfa Gymorth yr UM eich helpu i weithredu fel cyflafareddwr. Yn ein profiad ni, mae presenoldeb trydydd parti diduedd yn gallu bod o gymorth mawr wrth ddatrys problemau a sicrhau nad ydynt yn codi eto.

Gwrthdaro ag aelodau'r gymuned

Y ffordd fwyaf effeithiol o ddatrys y rhan fwyaf o faterion cymunedol yw adnabod eich cymdogion a chyfathrebu mewn modd deallgar a chymdogol.

Drwy gyfnewid rhifau ffôn, er enghraifft, gallwch agor llinell gyfathrebu i drafod problemau, materion neu gwynion. Mae hyn yn golygu bod eich cymdogion yn fwy tebygol o gysylltu â chi'n uniongyrchol yn ystod y sefyllfa sy'n tarfu arnynt, yn hytrach na chwyno i'r tîm Cymuned neu'r heddlu lleol. Mae'n gwrtais hefyd roi gwybod i'ch cymdogion ymlaen llaw os ydych yn bwriadu cynnal digwyddiad yn eich cartref a allai darfu arnynt. Mae neges destun neu nodyn drwy'r blwch llythyrau bob amser yn cael ymateb da!

Rydym ni'n cynghori cymdogion i siarad â'i gilydd ag empathi a cheisio meddwl am sut bydden nhw'n teimlo pe tasai'r rolau i'r gwrthwyneb, gan obeithio datrys problemau eu hunain pan fo'n bosibl.

Problemau gyda'ch landlord

Mae'n ofynnol i landlordiaid eu cofrestru eu hunain a'r eiddo maent yn berchen arno, felly gallwch chwilio am fanylion eiddo eich landlord drwy chwilio ar wefan Rhentu Doeth Cymru. Mae'n ddoeth gwneud hyn cyn llofnodi cytundeb tenantiaeth.

Mae ein tîm bob amser yn hapus i'ch cefnogi a'ch cynghori gydag unrhyw broblemau allai fod gennych gyda'ch landlord, ond ar gyfer yr agweddau cyfreithiol, byddwn yn eich cyfeirio at Ganolfan Gyngor Undeb y Myfyrwyr sydd â llawer o brofiad o ymdrin â deddfwriaeth.

Parcio

Yn debyg i lawer o brifysgolion eraill, nid yw campysau Prifysgol Abertawe’n darparu lleoedd parcio i fyfyrwyr, sy'n un o'r rhesymau niferus pam rydym yn eich cynghori i adael eich car gartref pan fyddwch yn dod i'r Brifysgol. Yn ogystal â bod yn wasanaeth tacsi a gyrrwr dynodedig i'ch ffrindiau a phawb yn y tŷ, mae'n bosib na fydd cadw car yn gost-effeithiol a gall fod yn anodd parcio mewn ardaloedd myfyrwyr, hyd yn oed os oes lleoedd neilltuedig i breswylwyr. Serch hynny, rydym yn deall nad yw hyn yn bosib i bawb ac mae angen car mewn rhai sefyllfaoedd.

Os oes problem ynghylch parcio a'r hawl i gael mynediad, rydym yn awgrymu eich bod yn cysylltu â'ch cymdogion ac yn agor llinell gyfathrebu os ydych chi'n teimlo bod trefniant gwell yn bosib ar gyfer pob parti.

Oni bai bod cyfyngiadau parcio lleol yn rhoi hawl i le penodol, nid oes gan breswylwyr hawliau awtomatig i le parcio ar ffyrdd cyhoeddus, hyd yn oed y tu allan i'w tai - waeth a ydyn nhw'n rhentu neu'n berchen ar y tŷ. Fodd bynnag, mae gan yr holl breswylwyr hawl i gael mynediad i'w dreif neu eu garej. Os ydych yn rhannu dreif, mae gan bob person hawl mynediad ac ni ddylai'r naill na'r llall rwystro mynediad i'r dreif.

Mae gan yr awdurdod lleol a'r heddlu bwerau helaeth i symud cerbydau sydd wedi'u parcio'n anghyfreithlon ac sy'n rhwystro'r brif ffordd neu sydd wedi'u gadael. Ceir rhagor o wybodaeth ar y wefan am sut i roi gwybod am y problemau hyn.

Os hoffech ddefnyddio'r lleoedd parcio i breswylwyr, bydd angen i chi gyflwyno cais i'r cyngor am hawlen. Os ydych yn byw mewn tŷ amlfeddiant, bydd angen i chi gofrestru gan ddefnyddio'r ffurflen ar-lein hon cyn cyflwyno cais am hawlen. Gwnewch yn siŵr eich bod yn gallu bodloni'r gofynion tystiolaeth a sylwch y bydd dwy hawlen yn unig ar gael i bob aelwyd.

Bod yn gymdogol:

Y ffordd fwyaf effeithiol o ddatrys y rhan fwyaf o faterion cymunedol yw adnabod eich cymdogion a chyfathrebu mewn modd deallgar a chymdogol.

Mae gan unrhyw un sy'n byw mewn tŷ, boed yn rhentu neu'n berchennog, yr hawl i fyw ynddo a mwynhau'r tŷ. Gallai'r mwynhad hwn gynnwys gweithgareddau sy'n amharu arnoch chi fel cymydog yn eich barn chi, ond nid yw hyn yn golygu bod eich cwynion yn gofyn ichi wneud mwy na thrafod y broblem yn anffurfiol. Drwy rannu rhifau ffôn, er enghraifft, gallwch agor dull cyfathrebu ar gyfer problemau, materion neu gwynion.

Rydym ni'n cynghori cymdogion i siarad â'i gilydd ag empathi a cheisio meddwl am sut bydden nhw'n teimlo pe tasai'r rolau i'r gwrthwyneb, gan obeithio datrys problemau eu hunain pan fo'n bosibl. Fodd bynnag, os bydd hyn yn methu bydd y tîm ar gael i gyfryngu gwrthdaro a thensiynau rhwng cymdogion, os bydd angen.

Oes gennych syniad i wella eich cymuned leol?

Mae ein cynllun Grantiau Cymunedol yn rhoi hyd at £250 i grŵp sydd â syniad am sut i wella cymuned ddaearyddol er lles myfyrwyr ac aelodau'r gymuned. Gall hyn fod mor syml â chodi sbwriel neu brosiect harddu, neu ddigwyddiad cymunedol mwy. Mae rhagor o wybodaeth am ein proses ymgeisio syml a byr yma. Mae croeso i chi gysylltu â ni unrhyw bryd am gymorth a chyngor.

Beth sy'n digwydd yma ym MywydCampws?

Mae BywydCampws yn cynnal amrywiaeth eang o ddigwyddiadau yn rheolaidd i'r holl fyfyrwyr (a staff) ddod i'w mwynhau. O deithiau i weithgareddau llai, mae rhywbeth at ddant pawb! Mae hefyd yn ffordd wych o gwrdd â ffrindiau newydd, felly dewch draw i weld beth yw pwrpas ein digwyddiadau! Cliciwch yma i ddarganfod mwy!