Deallusrwydd Artiffisial

Mae deallusrwydd artiffisial sy'n seiliedig ar ddata a'r technolegau cysylltiedig yn prysur ddod yn gyffredin mewn sawl rhan o gymdeithas. Yn benodol, mae gan y technolegau hyn y potensial i wella agweddau amrywiol ar ofal cleifion, o atal yn ehangach a diagnosio'n gynharach i ddarganfod cyffuriau newydd. Mae'r thema hon yn ystyried cymhwyso rhai o'r datblygiadau diweddaraf mewn deallusrwydd artiffisial i'r heriau technolegol sy'n gynhenid i'r gwyddorau iechyd. Mae'n cynnwys ymchwilwyr sydd â diddordeb yn rhai o bynciau llosg ymchwil i ddeallusrwydd artiffisial, o'r gallu i greu atebion newydd, i esbonio'r atebion a ddarperir gan ddeallusrwydd artiffisial a gwella ein dealltwriaeth ohonynt.