Adborth ynglŷn â'r Gymraeg yn y Brifysgol

Eich profiad o'r Gymraeg ym Mhrifysgol Abertawe

Mae Prifysgol Abertawe yn sefydliad dwyieithog. Rydym yn cefnogi hawl ein myfyrwyr, staff a'r cyhoedd i ddefnyddio'r Gymraeg, ac yn hyrwyddo cyfleoedd iddynt ddefnyddio'r iaith yn eu hastudiaethau academaidd, yn eu gwaith ac yn gymdeithasol.

Croesawn sylwadau o bob math, p'un a yw hyn yn gŵyn neu'n ganmoliaeth fel y gallwn ddysgu o'n diffygion a sicrhau ein bod ni'n cydnabod ac yn rhannu arfer da.

Mae Prifysgol Abertawe wedi ymrwymo'n llawn i gydymffurfio â Safonau'r Gymraeg ac i ymdrin ag unrhyw gwynion ynglŷn â methiant o safbwynt cyflawni'r Safonau, neu unrhyw gŵyn arall sy'n ymwneud â'r Gymraeg yn y Brifysgol.

Rhoddir crynodeb o'r weithdrefn gwyno lawn isod, a'r fersiwn llawn ar waelod y dudalen hon.

Cwyno, canmol a sylwadau eraill yn ymwneud â'r Gymraeg

Sut i gwyno

Gallwch anfon cwyn, neu unrhyw sylw arall, atom wrth gysylltu â Swyddog Polisi a Chydymffurfiaeth y Gymraeg y Brifysgol:

e-bost: cydymffurfiaeth@abertawe.ac.uk
ffôn: 01792 606743
llythyr: Swyddog Polisi a Chydymffurfiaeth y Gymraeg, Ystafell 166, Adeilad Talbot, Parc Singleton, Abertawe SA2 8PP

Ar ôl derbyn eich cwyn neu sylw byddwn yn dilyn y camau yn ein gweithdrefn gwyno. Yn gryno, byddwn yn:

• delio yn ddifrifol â'r gŵyn neu sylw
• cydnabod derbyn eich cwyn o fewn 5 diwrnod gwaith
• anelu at ddatrys a darparu ymateb llawn i'r gŵyn o fewn 20 diwrnod gwaith (gall hyn fod yn gyfnod hirach os yw'n fater cymhleth)
• cywiro pethau er mwyn osgoi ail-adrodd y digwyddiad, os ydyn ni wedi gwneud rhywbeth o'i le.

Os ydy cwyn yn cael ei derbyn dros y ffôn, neu wyneb yn wyneb, ein nod yw ceisio ei datrys yn y fan a'r lle. Os nad yw hynny'n bosibl byddwn yn cysylltu â chi drwy lythyr neu e-bost gan ddilyn y camau ffurfiol uchod.

Gallwch hefyd anfon cwyn yn uniongyrchol at Gomisiynydd y Gymraeg.

Cadw cofnod o gwynion

Rydyn ni'n monitro pob cwyn sy'n ymwneud â'r Gymraeg.

Byddwn ni'n cofnodi nifer y cwynion a dderbyniwn ynglŷn â chydymffurfiaeth â Safonau'r Gymraeg yn ein hadroddiad blynyddol i Gomisiynydd y Gymraeg. Byddwn hefyd yn cadw copïau o bob cwyn ysgrifenedig. Ni fyddwn yn rhannu eich manylion personol gyda chyrff allanol heb ganiatâd.

Mae Pwyllgor Strategaeth yr Iaith Gymraeg y Brifysgol yn derbyn adroddiadau rheolaidd ynglŷn â chwynion, ac mae adroddiad blynyddol o gwynion yn cael ei gyflwyno i Gyngor y Brifysgol.

Ymdrin ag adborth fel aelod staff

Os ydych chi'n cael eich cyflogi gan y Brifysgol ac wedi derbyn adborth am y Gymraeg, neu os hoffech chi roi gwybod i Swyddfa Polisi'r Gymraeg am eich profiad chi, mae canllawiau ar ein tudalennau mewnrwyd.