Eilian Richards yn traddodi ei thesis tair munud
Mae Eilian Richmond, sy'n astudio am PhD mewn Ysgrifennu Creadigol, wedi ennill cystadleuaeth Thesis Tair Munud (3MT) Prifysgol Abertawe.
Cynhaliwyd y gystadleuaeth fel rhan o'r Ŵyl Ymchwil Ôl-raddedig, cyfres o ddigwyddiadau mis o hyd sy'n dangos yr ymchwil a wneir gan fyfyrwyr ym Mhrifysgol Abertawe.
Mae 3MT yn herio ymgeiswyr doethurol i draddodi cyflwyniad gafaelgar ar lafar am bwnc eu hymchwil a'i arwyddocâd mewn tair munud yn unig.
Yn ei anerchiad, siaradodd Eilian, sy'n astudio yng Nghyfadran y Dyniaethau a'r Gwyddorau Cymdeithasol, am feithrin dealltwriaeth o naratif y Beibl drwy arosod ail naratif dychanol drosto – ei nofel, Earthbound. Mae ei allu i gyfleu'r cwestiwn allweddol: ‘Sawl un o'r anghysondebau hyn yn y naratif sy'n gallu cael ei briodoli i fet rhwng Duw a Satan, yn unol â Llyfr Job?’ wedi gwella'n sylweddol o ganlyniad i gymryd rhan yn y gystadleuaeth.
Trechodd Eilian 14 o fyfyrwyr ymchwil ôl-raddedig eraill ar draws tair cyfadran y Brifysgol i ennill y gystadleuaeth.
Mae 3MT, a sefydlwyd gan Brifysgol Queensland yn 2008, yn gystadleuaeth ryngwladol a gynhelir mewn mwy na 200 o brifysgolion ledled y byd.
Mae Prifysgol Abertawe'n un o oddeutu 70 o sefydliadau yn y DU sydd bellach yn rhan o rwydwaith 3MT byd-eang, gan annog myfyrwyr ymchwil ôl-raddedig i hyrwyddo eu hymchwil a'u brwdfrydedd dros eu dewis bwnc i gyrraedd cynulleidfaoedd nad ydynt yn arbenigol. Nod 3MT yw dangos i amrywiaeth o gynulleidfaoedd yr ymchwil ardderchog ac amrywiol a wneir gan fyfyrwyr ymchwil ôl-raddedig ym Mhrifysgol Abertawe, ei pherthnasedd i'r byd rydym yn byw ynddo a'i heffaith ar y byd hwnnw.
Wrth drafod ei lwyddiant yn y gystadleuaeth hyd yn hyn, meddai Eilian: “Gwnaeth pawb a gymerodd ran yn glodwiw i gyflwyno eu gwaith esoterig mewn ffordd afaelgar i gynulleidfa leyg, ac roedd yr ymchwil i gyd mor drawiadol y mae'n arbennig o bleserus i gael fy nghyfrif yn eu plith. Byddwn i'n argymell y profiad i unrhyw un sydd am feithrin dealltwriaeth well o'i waith ei hun.”
Ychwanegodd yr Athro Gert Aarts, Dirprwy Is-ganghellor Cynorthwyol ar gyfer Ymchwil Ôl-raddedig ym Mhrifysgol Abertawe: “Roedd yn bleser mawr gweld yr Ŵyl Ymchwil Ôl-raddedig yn mynd rhagddi dros yr wythnosau diwethaf, a hynny'n ymdrech gydlynus ar draws y Brifysgol a'r cyfadrannau. Mae ymchwilwyr ôl-raddedig yn rhan annatod o weithgarwch ymchwil y Brifysgol. Gan eu bod nhw ar fin gorffen fel myfyrwyr, mae'n bwysig dwyn sylw i'w cyflawniadau. Gwnaeth yr Ŵyl Ymchwil Ôl-raddedig a chystadleuaeth 3MT hynny i'r dim.”
Bydd Eilian bellach yn mynd rhagddo i rownd gogynderfynol cystadleuaeth 3MT y DU ym mis Gorffennaf a bydd ganddo obaith o gyflwyno yn rownd derfynol ar-lein cystadleuaeth 3MT y DU ym mis Medi, a gynhelir gan Vitae, sy'n flaenllaw'n fyd-eang wrth ddatblygu ymchwilwyr.