Prosiectau Allweddol

Mae IMPACT ar Gampws y Bae Prifysgol Abertawe yn rhan o'r Coleg Peirianneg fel Sefydliad Ymchwil lled-ymreolaethol, gydag amcanion ymchwil strategol y'u pennir gan Fwrdd Llywio Gwyddonol a chyngor gan randdeiliaid diwydiannol, llywodraethol ac academaidd allanol. Bydd yn darparu labordai hynod arbenigol sydd wedi'u diogelu at y dyfodol ar gyfer ymchwil sylfaenol a swyddfeydd yn creu amgylchedd deinamig ar gyfer cydweithio rhwng diwydiant a'r byd academaidd, gyda'r nod o ddenu ariannu ymchwil sylweddol.

Bydd cam hwn y Sefydliad Ymchwil lled-ymreolaethol yn gweithredu ym maes blaenoriaeth Her Fawr Peirianneg a Deunyddiau Uwch i ychwanegu at alluoedd sy'n arwain y ffordd yn fyd-eang y Coleg Peirianneg.

Bydd IMPACT yn galluogi newid sylweddol mewn ymchwil ac arloesi yng ngrwpiau ymchwil rhagorol cyfredol y Coleg mewn Technolegau Deunyddiau, Prosesu a Rhifiadol.

Caiff rhaglen ymchwil IMPACT ei chyflwyno gan dîm sy'n gystadleuol yn rhyngwladol o fwy na 65 o ymchwilwyr academaidd mewnol a mwy na 155 o ymchwilwyr ychwanegol yn gweithio mewn cyfleusterau ymchwil o ansawdd uchel. Bydd ethos pendant IMPACT yn sicrhau bod ei ymchwil yn dod ag arbenigedd sy'n arwain y ffordd yn fyd-eang ar draws y Coleg Peirianneg at ei gilydd i greu timau amlddisgyblaethol sy'n gallu denu arbenigwyr a doniau sy'n arwain y ffordd yn fyd-eang ac ariannu ychwanegol sylweddol i gynnal ymchwil ymestynnol sylfaenol.

Fe'i hategir gan feysydd mwy newydd, megis ymchwil ffotofoltäig drwy gydleoliad Consortiwm Ymchwil Academaidd Ffotofoltäig Solar (SPARC II) Cymru.

Bydd y Ffowndri Gyfrifiadol ar Gampws y Bae Prifysgol Abertawe yn trawsnewid Abertawe, gorllewin Cymru, y cymoedd a'r genedl yn gyrchfan byd-eang ar gyfer gwyddonwyr cyfrifiadol. Bydd y Ffowndri'n sefydlu ecosystem ddigidol o fri rhyngwladol ar gyfer ymchwil gwyddor gyfrifiadol o'r radd flaenaf gan ddod ag ymchwil rhyngddisgyblaethol at ei gilydd a mynd i'r afael â'r heriau mawr y mae'r economi a chymdeithas yn eu hwynebu dan dair thema, sef Cynnal Bywyd, Gwella Bywyd a Sicrhau Bywyd. Bydd yn parhau i gynyddu gallu Prifysgol Abertawe o ran ei chryfderau ymchwil o fri rhyngwladol mewn gwyddor gyfrifiadol.

Bydd y Ffowndri Gyfrifiadol yn amgylchedd pwrpasol a adeiledir at ddiben darparu cartref i wyddonwyr cyfrifiadol yng nghanol Campws y Bae. Nod y Ffowndri yw cynyddu cydweithio rhwng diwydiant a'r gymuned academaidd, a chynnig lleoedd ysbrydoledig ac ystafelloedd ar gyfer digwyddiadau, seminarau a chyfarfodydd i alluogi i'r sgyrsiau hyn ffynnu.

Bydd y Crwsibl Ymchwil yn y Ffowndri'n cynnig cyfleusterau i fwy na 150 o ymchwilwyr, gan gynnwys labordai ymchwil a datblygu, cyfleusterau ar gyfer myfyrwyr ôl-raddedig ac ymchwilwyr, ac ardal rwydweithio. Bydd yn cynnwys labordai ymchwil pwrpasol a fydd yn cefnogi gwaith profi cysyniadau a phrototeipiau diwydiannol, yn ysgogi cyfleoedd masnachol, entrepreneuriaeth a chreu swyddi, gan arwain at ymgysylltu ystyrlon â diwydiant a busnesau o bob maint ac ym mhob sector.

Ariennir y Ffowndri Gyfrifiadol yn rhannol gan Gronfa Datblygu Rhanbarthol Ewrop drwy Lywodraeth Cymru. Mae'r Ffowndri Gyfrifiadol yn rhan o Goleg Gwyddoniaeth Prifysgol Abertawe.

Mae Prifysgol Abertawe'n cryfhau ei phartneriaeth a sefydlwyd degawd yn ôl â Navitas, 'Coleg Rhyngwladol Cymru Abertawe (ICWS)', yn sgil llofnodi cytundeb ar gyfer menter ar y cyd a fydd yn darparu buddsoddiad allanol o ryw £45m yn ystâd y Brifysgol.  O ganlyniad, bydd dau adeilad newydd yn cael eu creu ar Gampws y Bae Prifysgol Abertawe, sef adeilad academaidd a phreswylfa ar gyfer 411 o fyfyrwyr, yn ogystal ag enw newydd.  Caiff y bartneriaeth ei hadnabod fel 'Y Coleg, Prifysgol Abertawe’. 

Adeilad Canolog Peirianneg

Mae Adeilad Canolog Peirianneg yn rhan o’r Coleg Peirianneg ac mae’n canolbwyntio ar beirianneg a gweithgynhyrchu uwch. Mae'n gartref i Hyb Arloesi Bae Abertawe sydd, yn ogystal â'r Ganolfan Gweithgynhyrchu Peirianneg (EMC), wedi'u hariannu'n rhannol gan Gronfa Datblygu Rhanbarthol Ewrop drwy Lywodraeth Cymru.

Mae gan Adeilad Canolog Peirianneg gyfleusterau o safon fyd-eang ar gyfer addysgu myfyrwyr israddedig ac ôl-raddedig, yn ogystal â chyfleusterau ymchwil a datblygu diwydiannol mewn adeilad o'r radd flaenaf. Mae Adeilad Canolog Peirianneg yn cynrychioli buddsoddiad oddeutu £36 miliwn a fydd yn galluogi i'r Brifysgol gynyddu ei gweithgareddau mewn peirianneg a gweithgynhyrchu uwch.

Mae Adeilad Canolog Peirianneg yn cynorthwyo gyda'r canlynol hefyd:

• Addysgu israddedig ac ôl-raddedig.
• Iechyd a'r Biowyddorau i ddatblygu atebion peirianneg i heriau iechyd, gan gynnwys nanodechnoleg a dylunio ar gyfer gweithgynhyrchu er mwyn cynhyrchu ar sail dyfeisiau prototeip.
• Economi Carbon Isel mewn meysydd megis datblygu deunyddiau ar gyfer lleihau pwysau a pherfformiad erodeinamig.
• Clwstwr Economi Digidol i ddatblygu caledwedd a thechnolegau diwifr.

Mae'r rhyngweithio rhwng y meysydd pwnc yn gymhleth iawn ac mae sawl maes lle gellir integreiddio a chynnig cefnogaeth rhwng un ddisgyblaeth a'r llall.

Ariennir y prosiect hwn yn rhannol gan Gronfa Datblygu Rhanbarthol Ewrop drwy Lywodraeth Cymru.

Adeilad Dwyreiniol Peirianneg – cartref y Cyfleuster Cynhyrchu

Mae Adeilad Dwyreiniol Peirianneg ar Gampws y Bae Prifysgol Abertawe yn rhan o'r Coleg Peirianneg. Mae’n darparu cyfleusterau addysgu israddedig ac ôl-raddedig, ardaloedd gwaith a gofod ymchwil i staff a myfyrwyr ymchwil sy’n ymwneud â Pheirianneg Sifil, Peirianneg Drydanol, Peirianneg Ddeunyddiau a Pheirianneg Fecanyddol. Bydd yr adeilad yn cynnwys y prif gyfleusterau gweithdy ar gyfer y Coleg Peirianneg cyfan hefyd.

Mae Adeilad Dwyreiniol Peirianneg yn gartref i'r Cyfleuster Cynhyrchu, sy'n adnodd ymchwil a datblygu ar gyfer cymwysiadau gweithgynhyrchu yn y sector gweithgynhyrchu uwch. Mae'n gartref i gyfleuster Microsgop Sganio Electron o'r radd flaenaf, Canolfan Argraffu a Chaenu Cymru a phrosiect y Ganolfan Beirianneg Cynnyrch Cynaliadwy ar gyfer Haenau Diwydiannol Gweithredol Arloesol (SPECIFIC).

Mae Adeilad Dwyreiniol Peirianneg yn cynnwys grwpiau ymchwil sy'n astudio polymerau a deunyddiau cyfansawdd, deunyddiau, peirianneg sifil, electroneg a gwyddor chwaraeon ac ymarfer corff. Mae ganddo wyth Hyb Ymchwil yn lletya hyd at 60 aelod staff academaidd a hyd at 275 o ymchwilwyr.

Dyluniwyd yr adeilad i ddarparu cyfleusterau o'r radd flaenaf i fyfyrwyr ac ar gyfer ymchwil, yn enwedig ym maes gweithgynhyrchu. Mae'n cynnig gofod ymchwil sy'n hyblyg ac yn fawr a fydd yn galluogi cynnal arbrofion a datblygu prototeipiau ar raddfa lawn.

Mae Adeilad Dwyreiniol Peirianneg yn gartref i'r Ganolfan Gweithgynhyrchu Peirianneg (EMC) sydd, ar y cyd â Hyb Arloesi Bae Abertawe, wedi'i hariannu'n rhannol gan Gronfa Datblygu Rhanbarthol Ewrop drwy Lywodraeth Cymru. Darllenwch ragor am y Ganolfan Gweithgynhyrchu Peirianneg.

Mae adeilad o'r radd flaenaf yr Ysgol Reolaeth yn gartref i fyfyrwyr a staff Cyfrifeg, Rheoli Busnes ac Economeg. Cynigir ymchwil cymhwysol, arloesedd a chyfleoedd cyflogaeth gan yr amgylchedd gwaith eithriadol hwn.

Wedi'i lleoli ar lan y môr, bydd gan yr Ysgol Reolaeth ystafelloedd darlithio ac addysgu pwrpasol ar gyfer myfyrwyr israddedig ac ôl-raddedig.

Mae tri llawr wedi'u neilltuo ar gyfer profiadau myfyrwyr ac ardaloedd addysgu ac ymchwilio uwch-dechnoleg sydd, ar y cyd ag ardaloedd cydweithio a chydymarfer, yn sicrhau y gall yr Ysgol gyflawni ei hymrwymiad i gynnig profiad diddorol ac arloesol i fyfyrwyr.

Mae gan yr Ysgol amgylchedd unigryw sy'n meithrin ymgysylltu, cydweithio ac arloesi. Bydd y myfyrwyr yn elwa o leoliadau gwaith, datblygu sgiliau ac awyrgylch o fentergarwch ac entrepreneuriaeth.

Mae'r preswylfeydd myfyrwyr newydd ar Gampws y Bae wedi'u cynllunio fel bod y gofod mewnol yn fodern a bod ochr allanol yr adeilad yn gallu goroesi treigl amser, o ran cynllun ac yn erbyn yr elfennau.

Dechreuodd y gwaith ar gam nesaf datblygu llety myfyrwyr ym mis Ionawr 2016, a bydd wedi'i gwblhau yn barod i fyfyrwyr symud i mewn ym mis Medi 2017. Bydd hwn yn dod â chyfanswm y llety sydd ar gael i fyfyrwyr, a ddarperir mewn tri cham gwahanol gan St. Modwen ar gyfer Campws y Bae, i 2,000 erbyn hydref 2017.

Visit the Accommodation pages

Yng nghanol Campws y Bae, Llyfrgell y Bae yw'r man lle ceir mannau dysgu, ymchwil ac academaidd cymdeithasol sy'n cefnogi gwaith myfyrwyr israddedig, myfyrwyr ôl-raddedig a staff. Bydd y campws yn darparu mynediad at ein hystod lawn o gyfnodolion ar-lein, e-lyfrau, setiau a'n 850,000 o eitemau print, naill ai'n lleol neu, ar gyfer meysydd pwnc penodol, drwy drosglwyddo rhwng ein campysau.

Mae'r Sefydliad Ymchwil Diogelwch Ynni (ESRI) yn cyfeirio cryfder y Coleg Peirianneg ar y sector ynni.

Mae'r Sefydliad yn derbyn nawdd gan y diwydiant. Mae'n canolbwyntio ar faterion diogelwch sy'n ymwneud â datblygu ac ehangu ar brosesau ynni presennol, yn ogystal â defnyddio ac integreiddio technolegau ynni 'gwyrdd' newydd yn ddiogel.

Bydd cynllun ac adeiladwaith adeilad newydd 3,800m² yn galluogi i'r Brifysgol ddatblygu ansawdd a maint ei hymdrechion ymchwil ym maes ynni a diogelwch.

Mae gan y Sefydliad bwyslais rhyngwladol ac mae'n aelod cyfansoddol o'r Sefydliad Diogelwch Ynni Byd-eang (a sefydlwyd yn Houston, Tecsas yn 2011); mae'n chwaer sefydliad i'r Sefydliad Ynni a Systemau Amgylcheddol ym Mhrifysgol Rice, Houston; ac mae'n gydymaith i'r Ganolfan Ymchwil Cyrydiad Cenedlaethol ym Mhrifysgol A&M Tecsas (a gefnogir gan BP yng Ngogledd America).

Mae hyn yn adeiladu ar gysylltiadau hirdymor presennol y Coleg Peirianneg ym maes petrolewm a phrosesu cemegau, yn benodol o ran gwyddor gyfrifiadurol (modelu hollti creigiau a 'ffracio') a chyrydu.

Ategir gan lwyddiant ymchwil mwy diweddar mewn ynni morol, ynni niwclear, ynni llanw, uwch drin dŵr ('ffracio' ôl-driniaeth a gwahanu), deunyddiau, rheoli argyfwng a meysydd mwy newydd megis ffotofoltäig a nanodechnoleg.

Y Neuadd Fawr eiconig yw cymynrodd BP i Brifysgol Abertawe. Mae'r Neuadd wedi'i lleoli yng nghanol Campws y Bae ac mae'n ofod hardd i'r Brifysgol gynnal cyngherddau, cynadleddau a seremonïau graddio a digwyddiadau mawr eraill. Mae ar gael i staff, myfyrwyr a'r gymuned ei mwynhau.

Ar y llawr cyntaf mae cyfleusterau cyngherddau, arddangosfeydd a chynadleddau gyda lle i gynnal digwyddiadau i hyd at 700 o bobl.

Mae'n cynnwys naw gofod addysgu, gan gynnwys:

Darlithfeydd rhenciog 300 o seddau

Ystafelloedd seminar 20 sedd

Cyfanswm o 1,300 o seddau

Mae'r Sefydliad Deunyddiau Strwythurol (ISM) yn cynnwys cymysgedd o ymchwil academaidd a gweithgareddau masnachol.

Mae rhai o brif noddwyr ymchwil ISM yn cynnwys Rolls-Royce, Airbus, TWI a Timet, gydag arian gan nifer o fentrau'r Cyngor Ymchwil Peirianneg a'r Gwyddorau Ffisegol (EPSRC), y Bwrdd Strategaeth Technoleg (TSB) a'r Undeb Ewropeaidd.

Un o'r grwpiau ymchwil amlwg yn ISM yw Canolfan Technoleg Prifysgol (UTC) Rolls-Royce mewn Deunyddiau, sy'n cefnogi deuddeg o staff ymchwil ôl-ddoethurol ac oddeutu 40 o fyfyrwyr ôl-raddedig.

Caiff y labordai arbrofi mecanyddol sylweddol yn adeilad ISM eu rheoli gan Swansea Materials Research and Testing Ltd (SMaRT).

Mae SMaRT yn enghraifft wych o'r model trosglwyddo gwybodaeth rhwng diwydiant a'r byd academaidd sydd wrth wraidd datblygiad y Bae.

Ariennir ISM gan Lywodraeth Cymru.

Yr Ystafell Ddosbarth Weithredol yw prosiect arddangos graddfa lawn diweddaraf y Ganolfan Beirianneg Cynnyrch Cynaliadwy ar gyfer Caenau Diwydiannol Gweithredol Arloesol (SPECIFIC), wedi'i leoli ar Gampws y Bae gwerth £450 miliwn Prifysgol Abertawe.

Mae'r Ystafell Ddosbarth Weithredol yn cynnwys labordy ac ystafell ddosbarth, a chaiff ei defnyddio ar gyfer addysgu myfyrwyr. Caiff ei monitro'n agos hefyd, gan alluogi ymchwilwyr i brofi a dilysu perfformiad yr adeilad mewn cyfleuster addysg ac i weld sut mae defnyddwyr yn rhyngweithio â thechnoleg.

Mae arddangos ar raddfa adeilad yn hanfodol wrth werthuso a phrofi technegau a thechnolegau cyn y cânt eu mabwysiadu gan y sector adeiladu, rheoleiddwyr a defnyddwyr. Cynlluniwyd rhaglen arddangos SPECIFIC i brofi'r adeiladau fel cysyniad pwerdai mewn ystod o ddefnyddiau.

SPECIFIC