Cyfraniad y cyhoedd a chleifion yn rhaglennu iechyd proffesiynol

Mae rhaglen Cynnwys y Cyhoedd a Chleifion yn grŵp gwirfoddol sy'n gweithio yn y Gyfadran Meddygaeth, Iechyd a Gwyddor Bywyd.

Cafodd ei sefydlu yn 2010 a'n nod ni yw cynnwys y cyhoedd wrth ddatblygu rhaglenni gofal iechyd ym Mhrifysgol Abertawe a chynnwys y cyhoedd wrth addysgu ein myfyrwyr a darparu addysg iddynt. Drwy ein grŵp, bydd gennych chi'r cyfle i roi'n ôl i wasanaethau iechyd drwy helpu i addysgu Gweithwyr Gofal Iechyd Proffesiynol y dyfodol. Mae gwirfoddolwyr iechyd yn cynnig profiad o lygad y ffynnon, straeon bywyd go iawn ac yn ysbrydoli myfyrwyr i gysylltu'r ddamcaniaeth â'r ymarfer.

Mae cyrff proffesiynol a rheoleiddio ar gyfer addysg gofal iechyd, megis Addysg a Gwella Iechyd Cymru (AGIC) oll yn gofyn i ddarparwyr addysg gynnwys y cyhoedd a chleifion wrth gynllunio, cyflwyno, addysgu a gwerthuso rhaglenni proffesiynol.

BOD YN WIRFODDOLWR IECHYD

Fel Gwirfoddolwr Iechyd, byddwch yn rhan o amrywiaeth o weithgareddau, gan gynnwys:

Bod ar baneli ar gyfer cyfweliadau dethol myfyrwyr ar gyfer rhaglenni amrywiol
Chwarae rôl /efelychu sesiynau addysgu ymarferol gyda myfyrwyr
Cyflwyno sgyrsiau neu gyflwyniadau ynglŷn â'ch profiadau personol chi i fyfyrwyr
Datblygu adnoddau dysgu megis rhoi cyflwyniadau neu wneud ffilmiau
Grŵp CYMHEIRIAID - Darparu adborth i amryw brosiectau ymchwil

Drwy gydol y flwyddyn, rydym ni'n cynnal sesiynau hyfforddiant ar gyfer gwirfoddolwyr iechyd newydd a phresennol.

Pam fod Cynnwys Cleifion a'r Cyhoedd yn bwysig?

Mae cynnwys y cyhoedd a chleifion yn dechrau chwarae rôl fwy mewn rhaglenni gofal iechyd. Mae hyn yn deyrnged i'r buddion a'r effaith mae'n ei chael ar fyfyrwyr a'r adborth cadarnhaol mae myfyrwyr yn ei roi am eu profiadau o weithio gyda gwirfoddolwyr iechyd.

Tra bydd myfyrwyr yn cael profiad o safbwynt cleifion mewn lleoliadau clinigol, er enghraifft pan fyddant ar leoliad, efallai y bydd cleifion yn rhy sâl neu'n rhy bryderus i unrhyw ddysgu o bwys ddigwydd.

Nod y Rhaglen Cynnwys y Cyhoedd a Chleifion yw darparu amgylchedd dysgu cyffyrddus i fyfyrwyr a'r claf/gwirfoddolwr iechyd weithio ar y cyd. Gall cwrdd â gwirfoddolwyr iechyd y tu allan i amgylcheddau clinigol helpu myfyrwyr i gael dealltwriaeth gliriach o sut mae cyflyrau meddygol a chymdeithasol yn effeithio ar fywydau pob dydd pobl.

Mae cynnwys gwirfoddolwyr iechyd ar ein rhaglenni gofal iechyd yn gwella sgiliau cyfathrebu myfyrwyr, gan gynyddu eu dealltwriaeth o anghenion iechyd a gofal cymdeithasol cleifion ac yn helpu eu datblygiad gwybyddol ac emosiynol.

Mae rhaglen Cynnwys y Cyhoedd a Chleifion hefyd yn darparu llwyfan i'r cyhoedd gael y cyfle i gyfrannu at ddatblygiad a dilyniant rhaglenni gofal iechyd yn y Brifysgol.

Rydym ni bob amser yn dadansoddi'r adborth am ansawdd ein cyrsiau yn y Gyfadran a phan fyddwn yn ei ddadansoddi, rydym ni'n sicrhau ein bod ni'n cynnwys adborth ac awgrymiadau gwirfoddolwyr iechyd i geisio gwella ansawdd addysg y myfyrwyr.

Pa gefnogaeth fyddwch chi'n ei derbyn?

Mae gan bob rhaglen hyrwyddwr staff dynodedig a fydd yn cynnig ei gymorth llawn i chi ac mae gweinyddwr ein rhaglen ar gael rhwng 9am a 5pm o ddydd Llun i ddydd Gwener i gynnig cymorth a chyngor llawn.

Byddwn yn ad-dalu costau teithio a pharcio, byddwch chi hefyd yn derbyn taleb gwerth £10 ar gyfer lluniaeth wrth wirfoddoli ar y campws.

Os hoffech ddysgu mwy am Gynnwys Cleifion a'r Cyhoedd, neu fynegi eich diddordeb mewn bod yn wirfoddolwr iechyd, cysylltwch â'r tîm yn FMHLSHealthVolunteers@swansea.ac.uk i gael gwybod mwy.