Caffael

Caffael Cadarnhaol

Ym Mhrifysgol Abertawe, rydym yn prynu ystod eang o nwyddau a gwasanaethau o ddeunydd ysgrifennu ac offer ymchwil i wasanaethau teithio a TGCh.

Mae gan ein penderfyniadau prynu oblygiadau pwysig ar gyder datblugy cynaliadwy

Rydym yn ymwybodol o effeithiau economaidd, cymdeithasol ac amgylcheddol popeth rydym yn ei brynu a'r gwasanaethau rydym yn eu defnyddio drwy gydol eu cylchoedd bywyd.

Er enghraifft:

Myfyrwraig yn siopa am ffrwythau a llysiau ffres

Effaith deunyddiau crai a gweithgynhyrchu celfi neu TGCh, ar fywyd ar y tir ac ar heddwch a chyfiawnder.
Effeithiau ar yr hinsawdd o gludo a chyflenwi nwyddau neu ddefnyddio gwasanaethau
Gwastraff ac allyriadau o gynhyrchu a defnyddio nwyddau a gwasanaethau fel y rhai sy’n deillio o fwyd, nwyddau traul a'n hadeiladau
Buddion cymunedol o waith teg a thwf economaidd gan gynnwys addysg o ansawdd, dim newyn ac ynni glân a fforddiadwy.

Dyna pam rydym yn ymrwymedig i gaffael cadarnhaol. Golyga hyn:

Dileu neu leihau effeithiau negyddol ac uchafu’r manteision, pan fyddwn yn dewis a ddylem brynu neu beth y dylem ei brynu, neu pa wasanaethau i'w defnyddio
Gweithio gyda'n cyflenwyr a darparwyr gwasanaethau i leihau effeithiau a chodi safonau mewn ffordd gyfrifol

Polisi a Strategaeth Caffael Cynaliadwy

Mae gan dimau Cynaliadwyedd a Chaffael Prifysgol Abertawe ymrwymiadau Strategaeth Cynaliadwyedd ar y cyd i gynnwys caffael cadarnhaol yn ein polisi a’n trefniadau caffael gan ddilyn arweiniad Caffael Cynaliadwy. Mae ein Polisi Caffael Cynaliadwy yn amlinellu ein gofynion i ymgorffori cynaliadwyedd, moeseg, iechyd a lles ym mhob agwedd ar brynu yn y brifysgol.

Cadwyni Cyflenwi Moesegol

Yma ym Mhrifysgol Abertawe, rydym yn ymddwyn yn gyfrifol i sicrhau ein bod yn cydymffurfio â Deddf Caethwasiaeth Fodern 2015. Rydym yn ymrwymedig i weithio tuag at sicrhau nad yw caethwasiaeth fodern na masnachu pobl yn rhan o'n cadwyni cyflenwi neu unrhyw ran o'n busnes. Gweler ein: Datganiad Blynyddol ar Gaethwasiaeth Fodern a Masnachu Pobl.

Er mwyn sicrhau cydymffurfiaeth a gwella arferion llafur ac amgylcheddol, rydym yn gysylltiedig â'r sefydliadau a safonau canlynol:

Masnach Deg

MAE MASNACH DEG YN YMWNEUD Â PHRISIAU GWELL, AMODAU GWAITH DA, CYNALIADWYEDD LLEOL A THELERAU MASNACH TEG I FFERMWYR A GWEITHWYR YN Y BYD SY'N DABTLYGU.

Ni oedd y brifysgol gyntaf yng Nghymru i ennill statws Masnach Deg, gan gyflawni ein Dyfarniad Prifysgol Masnach Deg diweddaraf yn 2023. Mae gan ein contractiwr arlwyo a'r mannau arlwyo sy'n cael eu rheoli gan y Brifysgol ymrwymiad cadarn i gynaliadwyedd, Masnach Deg a phrynu'n lleol. Mae Prifysgol Abertawe wedi ymrwymo cyllid ac adnoddau i fod yn rhan o'r garfan o brifysgolion a cholegau sy'n gweithio i gyflawni statws Masnach Deg yn yr asesiad nesaf yn 2025. Yn ogystal â chynyddu ymwybyddiaeth staff a myfyrwyr am bwysigrwydd Masnach Deg, mae hyn hefyd yn cynnig cyfleoedd iddynt gyfrannu at y prosiect.

Yn y cyfamser, rydym yn parhau i gynnig amrywiaeth wych o gynhyrchion Masnach Deg yn ein holl fannau arlwyo ac ar fwydlen arlwyo'r tîm lletygarwch, fel y nodir yn ein Polisi Bwyd Iach Cynaliadwy . Yn ogystal, mae ein Polisi Caffael Cynaliadwy yn ein hymrwymo i brynu cotwm Masnach Deg ar gyfer lifreion neu ddillad lle bynnag y bo'n ymarferol.

Rydym yn cefnogi Fforwm Masnach Deg Abertawe, rhwydwaith o grwpiau, busnesau ac unigolion lleol sy'n ymrwymedig i egwyddorion Masnach Deg.

Electronics Watch

Ni oedd y sefydliad cyntaf yng Nghymru i gysylltu ag Electronics Watch. Mae Electronics Watch yn sefydliad monitro annibynnol sy'n helpu prynwyr y sector cyhoeddus i gydweithio er mwyn sicrhau parch at hawliau llafur a safonau diogelwch yn y ffatrïoedd sy'n cynhyrchu'r galedwedd TGCh maent yn ei phrynu. Electronics Watch yw'r “llygaid a'r clustiau” i’w aelodau, gan weithio gyda rhwydwaith byd-eang o fonitoriaid cymdeithas sifil cymwysedig i ganfod, problemau hawliau llafur a diogelwch mewn ffatrïoedd, adrodd amdanynt a mynd i’r afael â nhw’n brydlon ac yn effeithiol. Mae methodoleg fonitro Electronics Watch yn ein helpu i ddod yn ymwybodol o achosion posib o dorri hawliau llafur a rheoliadau diogelwch yn ein cadwyn gyflenwi, cyfrannu at atebion, a defnyddio ein trefniadau caffael mewn ffordd ddeinamig yn unol â'n gwerthoedd fel prifysgol. Yn yr hirdymor, mae Electronics Watch yn ein helpu i gyfrannu at weithleoedd mwy urddasol yn y diwydiant electroneg lle mae gan weithwyr lais cryf a gallant helpu i lywio gwelliannau cynaliadwy.

Buddsoddi Moesegol Cynaliadwy a Bancio

Drwy ein portffolio buddsoddiadau, mae Prifysgol Abertawe'n osgoi buddsoddi mewn busnesau y mae eu prif weithgarwch yn canolbwyntio ar alcohol, arfau, adloniant oedolion, gamblo, tybaco neu danwyddau ffosil. Darllenwch ddatganiad i'r wasg y Brifysgol.

Ym Mhrifysgol Abertawe, rydym wedi datblygu Polisi a Gweithdrefnau Buddsoddi Moesegol ac mae ein his-bwyllgor Buddsoddi'n ystyried yn ffurfiol sylwadau a gyflwynir o ran safbwynt moesegol unrhyw fuddsoddiad gan y Brifysgol.

Os hoffech gael rhagor o wybodaeth am fuddsoddiadau cynaliadwy a moesegol y Brifysgol, e-bostiwch ni.

Arlwyo Iach a Chynaliadwy

Ym Mhrifysgol Abertawe, rydym yn ceisio cynnig bwyd ffres, iach a chynaliadwy y gallwch chi ymddiried ynddo. Mae ein tîm Gwasanaethau Arlwyo'n defnyddio cynhwysion o ffynonellau lleol, moesegol sy'n gyfrifol tuag at yr amgylchedd. Rydym yn cynnwys meini prawf iechyd, lles a chynaliadwyedd yn ein harlwyo, fel y nodir yn ein Polisi Bwyd Iach Cynaliadwy . Rydym yn gweithio i gyflawni hyn a chaiff cynnydd ei fonitro mewn cyfarfodydd arlwyo rheolaidd.

Achrediadau Bwyd Cynaliadwy

Yn 2022, dyfarnodd y Sustainable Restaurant Association radd 1 seren i Brifysgol Abertawe yn eu hachrediad 'Food Made Good' ar gyfer y rhan fwyaf o'n mannau arlwyo ar y campws, ac rydym yn gweithio'n galed gyda'r Gwasanaethau Arlwyo i wella hyn i 2 seren.

Gwnaethon ni hefyd ennill y Wobr Prifysgol Masnach Deg yn 2023, am weithredu i wreiddio arferion moesegol a chynaliadwy yn y cwricwlwm, yn ein gweithgarwch caffael ac ymchwil ac yn ein hymgyrchoedd.

Dim Gwastraff ac Allyriadau

Ym Mhrifysgol Abertawe, mae ein timau Arlwyo a Chynaliadwyedd yn gweithio mewn partneriaeth i atal gwastraff o'n mannau arlwyo ar y campws. Rydym yn cyflawni hyn mewn sawl ffordd:

Rydym yn gweithio'n agos gyda Discovery, elusen y Brifysgol sy'n cael ei harwain gan wirfoddolwyr, a'r elusen gymunedol Goleudy i ddosbarthu bwyd a fyddai wedi cael ei wastraffu i fyfyrwyr a staff am gostau fforddiadwy er mwyn helpu i leihau gwastraff a thlodi bwyd.
Mae ein mannau arlwyo'n cynnig gostyngiad ar ddiodydd poeth mewn cwpanau y gellir eu hailddefnyddio.
Rydym wedi newid i becynnu, llestri a chyllyll a ffyrc effaith is fel rhan o'n cenhadaeth i gael gwared ar blastigion untro.
Rydym yn defnyddio biniau ailgylchu didoli wrth waredu yn ein holl fannau bwyd a thrwy gydol y campws. Gallwch gael rhagor o wybodaeth am ein cyfleusterau ailgylchu ar ein tudalennau gwe gwastraff.
Darperir biniau ailgylchu ar wahân yn ein mannau arlwyo, yn benodol ar gyfer casglu ac ailgylchu cwpanau defnydd untro.
Caiff ein gwastraff bwyd ei gasglu a'i anfon i'w dreulio'n anaerobig.
Mae ailgylchu Tetra Pak wedi cael ei gyflwyno ar gyfer mannau arlwyo ar y campws.
Rydyn ni wedi cyflwyno cynllun gwaddodion coffi sy'n annog staff a myfyrwyr i fynd â'r gwaddodion coffi adref i'w defnyddio yn eu gerddi. Mae'r gweddillion yn cael eu defnyddio gan dîm tiroedd y Brifysgol.
Cyflwynwyd cynllun "Too Good to Go" yn ein holl fannau arlwyo, gan arbed dros 3,400 o brydau bwyd ac 8,500kg o CO2 ers 2021.
Caiff cegin gymdeithasol ei hagor yn fuan er mwyn addysgu staff a myfyrwyr am goginio cynaliadwy ac iach ac osgoi gwastraffu bwyd.
Mae ein cerbydlu ar y campws yn cynnwys Cerbydau Di-allyriadau.

Tyfu bwyd ar y campws

Mae ein prosiect tyfu ar y campws “Tyfu Tawe”, sy’n cael ei gefnogi gan gronfeydd buddion cymunedol ac NUS Student Eats, yn darparu lle i'n cymuned ddysgu am dyfu llysiau ar y campws. Mae'r manteision i'r meddwl, y corff a'r amgylchedd o dyfu eich bwyd eich hun yn hysbys, felly Cymerwch Ran gyda Tyfu Tawe.

Yn ogystal â phrosiect Tyfu Tawe, mae’r Tîm Cynaliadwyedd wedi bod yn gweithio drwy gydol 2021 i greu ac i ddarparu perllan gymunedol i staff, myfyrwyr, ac ymwelwyr ei mwynhau. Hyd heddiw, mae cyfanswm o 28 o goed ffrwythau wedi’u plannu ar ein dau gampws gyda chymorth staff a myfyrwyr gan gynnwys coed afalau, coed eirin, coed gellyg, coed eirin hirion, a ffigysbrennau. Daeth y cyllid ar gyfer y prosiect hwn trwy gymysgedd o ddyraniad o’r gyllideb Prifysgol Gynaliadwy a Chronfa’r Economi Gylchol Cymru.

Mae Ben, ein Swyddog Bioamrywiaeth, hefyd wedi bod yn gweithio gyda thîm y prosiect a staff yn IMPACT i ddatblygu ac i reoli wal werdd fyw. Mae’r wal fyw yn cefnogi rhywogaethau brodorol a nod y prosiect peilot hwn yw dangos sut y gallwn ni ddatblygu rhagor o waliau byw a chynnwys bwyd cynaliadwy yn rhan allweddol o hynny.