Datganiad o Egwyddorion Buddsoddi Cynllun Pensiwn Prifysgol Abertawe (SUPS)

Amcan yr Ymddiriedolwyr yw buddsoddi asedau'r Cynllun yn ddarbodus er mwyn sicrhau bod y buddion a addawyd i aelodau'n cael eu darparu. Wrth bennu'r strategaeth fuddsoddi, ystyriodd yr Ymddiriedolwyr yn gyntaf y dyraniad asedau risg isaf y gallai ei fabwysiadu mewn perthynas â rhwymedigaethau'r Cynllun. Cynlluniwyd y strategaeth a ddewiswyd ganddynt i gyflawni adenillion uwch na'r strategaeth risg isaf, gan gynnal ymagwedd ddarbodus at fodloni rhwymedigaethau'r Cynllun. Mae'r amcan cyffredinol, y cytunwyd arno gyda'r Cyflogwr, fel a ganlyn:

Pennu strategaeth fuddsoddi sy'n targedu adenillion disgwyliedig dros y rhwymedigaethau (fel y'u prisiwyd gan arenillion gilt) o 4.5% y flwyddyn.

Mae'r tabl isod yn amlinellu'r strategaeth dyrannu asedau bresennol, a ddewiswyd i gyflawni'r amcan uchod. Bydd yr Ymddiriedolwyr yn monitro'r dyraniad asedau gwirioneddol o'i gymharu â'r pwysoliad targed.

Gall gwerthoedd yr asedau amrywio o'r pwysoliadau uchod oherwydd adenillion ar fuddsoddiadau. Nid oes ystod wedi'i phennu ar gyfer y symiau y caniateir i'r asedau amrywio o'r pwysoliadau hyn. Bydd yr Ymddiriedolwyr yn adolygu'r sefyllfa'n flynyddol ac, os yw hyn yn angenrheidiol yn eu barn hwy ac ar ôl ymgynghori â'u cynghorwyr buddsoddi, byddant yn ail-gydbwyso i gyrraedd y pwysoliad targed.

Pennwyd y strategaeth dyrannu asedau gan roi sylw i nodweddion actiwaraidd y Cynllun, yn benodol, nerth y sefyllfa o ran cyllid a'r proffil rhwymedigaethau adeg dyddiad yr adolygiad diwethaf. Polisi'r Ymddiriedolwyr yw tybio y bydd ecwitïau'n perfformio'n well na giltiau yn y tymor hir ac y gellir disgwyl y bydd rheoli cronfeydd yn weithredol yn ychwanegu gwerth. Fodd bynnag, mae'r Ymddiriedolwyr yn cydnabod natur newidiol bosib adenillion ar ecwiti, rhywbeth sy'n hynod berthnasol i rwymedigaethau'r Cynllun, a'r risg na fyddai rheolwyr cronfa'n cyflawni'r targedau a bennwyd.

Wrth ddewis strategaeth dyrannu asedau'r Cynllun, ystyriodd yr Ymddiriedolwyr gyngor ysgrifenedig gan ei gynghorwyr buddsoddi ac, wrth wneud hyn, rhoddwyd sylw i'r canlynol:

• Yr angen i ystyried ystod lawn o ddosbarthiadau asedau.
• Risgiau a gwobrwyon amrywiaeth o strategaethau dyrannu asedau eraill.
• Addasrwydd pob dosbarth asedau.
• Yr angen i amrywio’n briodol.

Yn ogystal, ymgynghorodd yr Ymddiriedolwyr â'r cyflogwr noddi wrth bennu'r strategaeth hon. Disgwylir i'r strategaeth dyrannu asedau gael ei hadolygu yn 2023 ar y cyd â'r prisiad actiwaraidd teirblwydd.

Mae'r Ymddiriedolwyr yn cydnabod mai asedau annigonol i fodloni 100% o rwymedigaethau'r Cynllun yw'r brif risg mae'r Cynllun yn ei hwynebu. Mae'r Ymddiriedolwyr wedi nodi nifer o risgiau a allai achosi i lefel cyllid y Cynllun ddirywio gan felly gyfrannu at risg i'r cyllid. Mae'r rhain fel a ganlyn:

• Risg o wahaniaeth sylweddol rhwng sensitifrwydd gwerthoedd asedau a rhwymedigaethau i newidiadau mewn ffactorau ariannol a demograffig ("camgymhariad risg") Ystyriodd yr Ymddiriedolwyr a'u cynghorwyr y camgymhariad risg hwn wrth bennu'r strategaeth fuddsoddi.
• Risg o ddiffyg asedau hylif o'u cymharu â rhwymedigaethau presennol y Cynllun ("risg llif arian parod"). Bydd yr Ymddiriedolwyr a'u cynghorwyr yn rheoli llifoedd arian parod y Cynllun gan ystyried amseru taliadau'r dyfodol er mwyn lleihau'r tebygolrwydd y bydd hyn yn digwydd.
• Rheolwyr cronfa'n methu cyflawni'r gyfradd adenillion o fuddsoddi roedd yr Ymddiriedolwyr yn ei disgwyl ("risg rheolwyr"). Mae'r risg hon yn cael ei hystyried gan yr Ymddiriedolwyr a'u cynghorwyr wrth benodi rheolwyr cronfa ac yn rheolaidd wedi hynny.
• Methiant i ledaenu risg buddsoddi ("Risg diffyg amrywio"). Ystyriodd yr Ymddiriedolwyr a'u cynghorwyr y risg hon wrth bennu strategaeth fuddsoddi'r Cynllun.
• Y posibilrwydd y bydd cyflogwr noddi'r Cynllun yn methu ("risg cyfamod"). Ystyriodd yr Ymddiriedolwyr a'u cynghorwyr y risg hon wrth bennu'r strategaeth fuddsoddi gan ymgynghori â'r cyflogwr noddi ynghylch addasrwydd y strategaeth arfaethedig.
• Risg twyll, cyngor gwael neu weithredoedd esgeulustod ("risg weithrediadol") Mae'r Ymddiriedolwyr wedi ceisio lleihau risg o'r fath drwy sicrhau bod yr holl gynghorwyr a darparwyr gwasanaethau trydydd parti'n meddu ar gymwysterau a phrofiad priodol a bod cymalau rhwymedigaeth a digolledu priodol wedi'u cynnwys ym mhob contract ar gyfer gwasanaethau proffesiynol a dderbynnir.

Oherwydd natur gymhleth a chydberthnasol y risgiau hyn, mae'r Ymddiriedolwyr yn ystyried y rhan fwyaf o'r risgiau hyn mewn modd ansoddol yn hytrach na meintiol, fel rhan o bob adolygiad ffurfiol o'r strategaeth fuddsoddi (bob tair blynedd fel arfer). Gall rhai o'r risgiau hyn gael eu modelu'n benodol hefyd yn ystod yr adolygiadau hyn. Cafodd y risg o gamgymhariad yn benodol ei modelu'n fanwl fel rhan o'r adolygiad diweddaraf o'r strategaeth fuddsoddi, wrth drafod lefel y rhagfantoli (hedging).

Wedi pennu amcan buddsoddi sy'n gysylltiedig yn uniongyrchol â rhwymedigaethau'r Cynllun, a'i roi ar waith gan ddefnyddio amrywiaeth o reolwyr cronfa, polisi'r Ymddiriedolwyr yw monitro'r risgiau hyn yn rheolaidd lle bo modd. Mae'r Ymddiriedolwyr yn derbyn adroddiadau blynyddol sy'n dangos:

• Gwir lefel y cyllid o'i chymharu â'r amcan penodol o ran cyllid gan Actiwari'r Cynllun.
• Perfformiad rheolwyr cronfa unigol o'i gymharu â'u targedau penodol.
• Unrhyw faterion arwyddocaol a all effeithio ar allu’r rheolwyr cronfa i gyflawni'r targedau perfformiad a bennwyd gan yr Ymddiriedolwyr.

Dewiswyd Aon i fod yn gynghorydd buddsoddi i'r Ymddiriedolwyr. Maent yn gweithredu o dan gytundeb i ddarparu gwasanaeth sy'n sicrhau bod yr Ymddiriedolwyr yn cael eu paratoi'n drylwyr i wneud penderfyniadau eu hunain ac i fonitro'r rhai hynny maent yn dirprwyo cyfrifoldebau iddynt. Telir ffi flynyddol gytunedig i Aon er mwyn darparu gwasanaethau y mae eu hangen yn rheolaidd. Codir ffi ar sail amser a deunyddiau am waith y tu allan i'r ffi flynyddol, neu codir ffi gytunedig ar gyfer prosiectau. Dewiswyd y strwythur hwn er mwyn sicrhau bod cyngor cost-effeithiol ac annibynnol yn cael ei dderbyn.

Dyma strwythur y rheolwyr cronfa ac amcanion buddsoddi pob rheolwr cronfa ("mandadau"):

Legal and General

Nod y cronfeydd ecwiti goddefol yw olrhain y mynegeion canlynol:
FTSE World Index
FTSE World Index GBP Hedged
Nod y mandad Buddsoddiad wedi'i Lywio gan Rwymedigaethau (LDI) yw sicrhau bod asedau ar gael sy’n cyfateb i gyfran o'r newid bras yn rhwymedigaethau o ganlyniad i newidiadau mewn arenillion a chwyddiant disgwyliedig.

Standard Life GARS Fund

Perfformio'n well na SONIA  5% y flwyddyn dros gyfnodau treigl o 3 blynedd â tharged ystod anwadalrwydd rhwng 4% ac 8%.

M&G

Mae'r gronfa yng nghamau terfynol diddymu ar hyn o bryd ac nid yw'n cael ei rheoli yn erbyn meincnod.

Insight

Perfformio'n well na SONIA  2% y flwyddyn.

Aon Investments Limited

Perfformio'n well na SONIA  4% y flwyddyn.

Mae'r Ymddiriedolwyr wedi dirprwyo cyfrifoldeb am benderfyniadau o ddydd i ddydd am y buddsoddiadau o fewn pob mandad, gan gynnwys gwireddu buddsoddiadau, i reolwr y gronfa berthnasol drwy gontract ysgrifenedig. Wrth ddewis buddsoddiadau, mae'n ofynnol i'r Ymddiriedolwyr a'r rheolwyr cronfa (yn unol â'r cyfrifoldeb a ddirprwywyd iddynt roi sylw i'r meini prawf buddsoddi a nodir yn Rheoliadau Cynlluniau Pensiwn Galwedigaethol (Buddsoddi) 2005 (rheoliad 4).

Wrth bennu strategaeth fuddsoddi'r Cynllun, blaenoriaeth bennaf yr Ymddiriedolwyr yw gweithredu er buddiannau gorau'r Cynllun a'i fuddiolwyr, gan geisio'r adenillion gorau sy'n gyson â lefel ddarbodus a phriodol o risg. Mae'r rhain yn cynnwys y risg y gallai ffactorau amgylcheddol, cymdeithasol a llywodraethu, gan gynnwys newid yn yr hinsawdd, effeithio'n negyddol ar werth y buddsoddiadau os nad ydynt yn cael eu deall a’u gwerthuso'n briodol. Mae'r Ymddiriedolwyr yn ystyried y risg hon drwy gymryd cyngor gan eu cynghorydd buddsoddi wrth bennu dyraniad asedau'r Cynllun, wrth ddewis rheolwyr ac wrth fonitro eu perfformiad.
Bydd yr Ymddiriedolwyr yn cynnal adolygiad ffurfiol o strategaeth fuddsoddi'r Cynllun yn 2023, a rhagwelir y bydd y ddogfen hon, ac ymagwedd yr Ymddiriedolwyr at fuddsoddi cyfrifol, i'r graddau y mae'n berthnasol i benderfyniadau a wneir mewn cysylltiad â'r Cynllun, yn cael eu hadolygu yn sgîl y casgliadau ac unrhyw newidiadau perthnasol a roddir ar waith yn strategaeth y Cynllun.
Mae'r Ymddiriedolwyr yn cydnabod bod y cyflogwr noddi wedi gwneud nifer o ymrwymiadau ynghylch cynaliadwyedd, lleihau carbon ac effaith amgylcheddol, a bod hwn yn faes pwysig i'r cyflogwr noddi ac i'r Ymddiriedolwyr.

Trefniadau gyda rheolwyr asedau

Mae'r Ymddiriedolwyr yn monitro buddsoddiadau'r Cynllun yn rheolaidd er mwyn ystyried i ba raddau mae'r strategaeth fuddsoddi a phenderfyniadau'r rheolwyr asedau yn gyson â pholisïau'r Ymddiriedolwyr. Mae hyn yn cynnwys monitro i ba raddau mae rheolwyr asedau yn:
• gwneud penderfyniadau ar sail asesiadau am berfformiad ariannol tymor canolig i dymor hir dyroddwr dyled neu ecwiti; ac
• yn ymgysylltu â dyroddwyr dyled neu ecwiti er mwyn gwella eu perfformiad yn y tymor canolig i'r tymor hir.

Cefnogir yr Ymddiriedolwyr yn y gweithgarwch monitro hwn gan eu cynghorydd buddsoddi.
Mae'r Ymddiriedolwyr yn derbyn adroddiadau o leiaf bob chwarter, ynghyd â diweddariadau ar lafar am eitemau amrywiol gan y cynghorydd buddsoddi, gan gynnwys y strategaeth fuddsoddi, perfformiad a sefyllfa portffolio yn y tymor hwy. Mae'r Ymddiriedolwyr yn canolbwyntio ar berfformiad tymor hwy wrth ystyried addasrwydd parhaus y strategaeth fuddsoddi mewn perthynas ag amcanion y Cynllun, ac maent yn asesu'r rheolwyr asedau dros gyfnodau o 3 blynedd.
Mae'r Ymddiriedolwyr hefyd yn derbyn adroddiadau stiwardiaeth am y gweithgareddau monitro ac ymgysylltu a wneir gan eu rheolwyr asedau. Mae hyn yn cynorthwyo'r Ymddiriedolwyr wrth bennu i ba raddau y glynwyd wrth bolisi ymgysylltu'r Cynllun drwy gydol y flwyddyn.
Cyn penodi rheolwr ased newydd, mae'r Ymddiriedolwyr yn adolygu'r ddogfennaeth lywodraethu sy'n gysylltiedig â'r buddsoddiad a byddant yn ystyried i ba raddau y mae'n gyson â pholisïau'r Ymddiriedolwyr.
Mae'r Ymddiriedolwyr o'r farn bod meddu ar ddogfennaeth lywodraethu briodol, pennu disgwyliadau clir i'r rheolwr asedau drwy ffyrdd eraill (lle bo'n angenrheidiol), a monitro perfformiad a strategaeth fuddsoddi rheolwyr asedau yn ddigonol, yn y rhan fwyaf o achosion, i gymell y rheolwyr asedau i wneud penderfyniadau sy'n gyson â pholisïau'r Ymddiriedolwyr ac sy'n seiliedig ar asesiadau o berfformiad ariannol ac anariannol tymor canolig a thymor hir.
Lle tybir bod rheolwyr asedau wedi gwneud penderfyniadau nad ydynt yn gyson â pholisïau a disgwyliadau'r Ymddiriedolwyr na'r ystyriaethau eraill a nodir uchod, fel arfer, bydd yr Ymddiriedolwyr yn trafod â'r rheolwr i ddechrau ond, yn y pen draw, gallent ddisodli’r rheolwr asedau lle tybir bod hyn yn angenrheidiol.
Nid oes cyfnod penodol ar gyfer hyd trefniadau gyda'r rheolwyr asedau, er y caiff penodiad parhaus yr holl reolwyr asedau ei adolygu'n gyfnodol, ac o leiaf bob tair blynedd pan adolygir y strategaeth. Ar gyfer cyfryngau pengaead penodol, gall natur y buddsoddiadau isorweddol ddiffinio'r hyd.
Nid yw'r Ymddiriedolwyr yn monitro rheolwyr ased yn rheolaidd yn erbyn meini prawf anariannol y buddsoddiadau a wneir ar eu rhan.

Stiwardiaeth - Pleidleisio ac Ymgysylltu

Mae'r Ymddiriedolwyr yn cydnabod pwysigrwydd eu rôl fel stiward
iaid cyfalaf a'r angen i sicrhau'r safonau uchaf o ran llywodraethu a hybu cyfrifoldeb corfforaethol yn y cwmnïau a'r asedau y mae'r Cynllun yn buddsoddi ynddynt, gan fod hyn, yn y pen draw, yn creu gwerth ariannol tymor hir i'r cynllun a'i fuddiolwyr.
Fel rhan o'u cyfrifoldebau dirprwyedig, mae'r Ymddiriedolwyr yn disgwyl i reolwyr buddsoddi'r Cynllun:
• Lle y bo'n briodol, ymgysylltu â'r cwmnïau y buddsoddir ynddynt â'r nod o amddiffyn a gwella gwerth asedau; ac
• Arfer yr hawliau pleidleisio mewn perthynas ag asedau'r Cynllun.

Mae'r Ymddiriedolwyr yn adolygu addasrwydd parhaus y rheolwyr buddsoddi a benodwyd yn rheolaidd ac yn derbyn cyngor gan y cynghorydd buddsoddi ynghylch unrhyw newidiadau. Mae'r cyngor hwn yn cynnwys ystyried materion stiwardiaeth ehangach a sut mae'r rheolwyr a benodwyd yn arfer hawliau pleidleisio. Os canfyddir bod rheolwr yn methu cyflawni'r safonau mae'r Ymddiriedolwyr wedi'u nodi yn eu polisi, bydd yr Ymddiriedolwyr yn trafod â'r rheolwr a cheisio cyrraedd sefyllfa fwy cynaliadwy, ond gallant ystyried penodi rheolwr newydd.
Mae'r Ymddiriedolwyr yn adolygu gweithgareddau stiwardiaeth eu rheolwyr cronfa’n flynyddol, gan roi sylw i weithredoedd ymgysylltu a phleidleisio. Bydd yr Ymddiriedolwyr yn adolygu i ba raddau mae polisïau rheolwyr cronfa'r Cynllun yn gyson â'u polisïau hwy ac yn sicrhau bod eu rheolwyr, neu drydydd partïon eraill, yn defnyddio eu dylanwad fel buddsoddwyr sefydliadol mawr i gyflawni hawliau a dyletswyddau'r Ymddiriedolwyr fel cyfranddaliwr a pherchennog asedau cyfrifol. Bydd hyn yn cynnwys pleidleisio a - lle y bo'n berthnasol ac yn briodol - ymgysylltu â chwmnïau ac asedau y buddsoddir ynddynt er mwyn hyrwyddo llywodraethu corfforaethol da, atebolrwydd a newid cadarnhaol.
Bydd yr Ymddiriedolwyr yn ymgysylltu â'u rheolwyr buddsoddi i gael rhagor o wybodaeth, yn ôl yr angen, er mwyn sicrhau bod ymddygiadau perchnogaeth gadarn a gweithredol, sy'n adlewyrchu eu polisïau perchnogaeth weithredol, ar waith.
O bryd i'w gilydd, bydd yr Ymddiriedolwyr yn ystyried o dan ba amgylchiadau byddent yn monitro ac ymgysylltu â dyroddwr dyled neu ecwiti, a rheolwr ased neu ddeiliad dyled neu ecwiti arall, a rhanddeiliaid eraill, a pha ddulliau byddent yn eu defnyddio. Gall yr Ymddiriedolwyr ymgysylltu ynghylch materion sy'n ymwneud â dyroddwr dyled neu ecwiti, gan gynnwys ei berfformiad, strategaeth, risgiau effaith amgylcheddol a chymdeithasol a llywodraethu corfforaethol, y strwythur o ran cyfalaf a sut mae'n rheoli gwrthdaro gwirioneddol neu bosib rhwng buddiannau.

Barn Aelodau a Ffactorau Anariannol

Wrth bennu strategaeth fuddsoddi'r Cynllun a'i rhoi ar waith, nid yw'r Ymddiriedolwyr yn rhoi sylw penodol i farn aelodau a buddiolwyr y Cynllun mewn perthynas ag ystyriaethau moesegol, effaith gymdeithasol ac amgylcheddol, na materion sy'n ymwneud ag ansawdd bywyd nawr neu yn y dyfodol (diffinnir y rhain fel "ffactorau anariannol").

Monitro Costau

Mae'r Ymddiriedolwyr yn ymwybodol o bwysigrwydd monitro cyfanswm costau eu rheolwyr cronfa a'r effaith y gall y costau hyn ei chael ar werth cyffredinol asedau'r Cynllun. Mae'r Ymddiriedolwyr yn cydnabod bod eu rheolwyr cronfa yn mynd i nifer o gostau eraill yn ogystal â’r taliadau rheoli blynyddol, a gall y rhain gynyddu'r gost gyffredinol sy'n gysylltiedig â'u buddsoddiadau.

Mae'r Ymddiriedolwyr yn derbyn adroddiad blynyddol am dryloywder costau sy'n cynnwys eu holl fuddsoddiadau. Caiff yr wybodaeth hon ei choladu a'i chynnwys mewn adroddiad a gynhyrchir gan ClearGlass. Mae hyn yn galluogi'r Ymddiriedolwyr i ddeall yn union beth maent yn ei dalu i'w rheolwyr buddsoddi ac, os ydynt yn dewis gwneud hynny, i gymharu'r costau hyn â chostau cyfartaledd ar y farchnad ar gyfer mandadau tebyg. Mae'r Ymddiriedolwyr yn gweithio gyda'u cynghorydd buddsoddi a'u rheolwyr cronfa i gael dealltwriaeth fanylach o'r costau hyn lle bo angen.

Trosiant Portffolio

Mae'r Ymddiriedolwyr yn ymwybodol o gostau trosiant portffolio (diffinnir costau trosiant portffolio fel y costau sy'n codi o ganlyniad i brynu, gwerthu, rhoi benthyg neu fenthyca buddsoddiadau) sy'n gysylltiedig â'u buddsoddiadau isorweddol, drwy'r wybodaeth a ddarperir gan eu rheolwyr cronfa. Caiff targed trosiant y portffolio ac amrediad y trosiant eu monitro'n flynyddol gyda chymorth cynghorydd buddsoddi'r Cynllun.

Mae'r Ymddiriedolwyr yn derbyn y bydd costau'n codi o drafodion i hwyluso adenillion ar fuddsoddiad a bod lefelau'r costau hyn yn amrywio rhwng dosbarthiadau asedau ac yn ôl arddull fuddsoddi rheolwyr o fewn dosbarth asedau. Yn y ddau achos, mae lefel uchel o gostau trafodion yn dderbyniol ar yr amod ei bod yn gyson â nodweddion y dosbarth asedau ac arddull y rheolwr a thueddiadau hanesyddol. Lle mae gweithgarwch monitro'r Ymddiriedolwyr yn nodi diffyg cysondeb, caiff y mandad ei adolygu. Cefnogir yr Ymddiriedolwyr yn eu gweithgarwch monitro tryloywder costau gan eu cynghorydd buddsoddi.

Gwerthuso Perfformiad a Chydnabyddiaeth Ariannol

Mae'r Ymddiriedolwyr yn asesu perfformiad eu rheolwyr cronfa bob chwarter ac asesir cydnabyddiaeth ariannol eu rheolwyr cronfa bob blwyddyn drwy gasglu data am gostau yn unol â thempledi safonol y diwydiant.

Mae'r Ymddiriedolwyr yn dirprwyo cyfrifoldebau penodol. Wrth benderfynu pa benderfyniadau i'w gwneud eu hunain a pha rai i'w dirprwyo, mae'r Ymddiriedolwyr wedi ystyried a oes ganddynt yr hyfforddiant priodol a'r cyngor arbenigol i wneud penderfyniad gwybodus. Mae'r Ymddiriedolwyr wedi creu'r strwythur cyfrifoldebau canlynol:

Ymddiriedolwyr

• Pennu strwythurau a phrosesau ar gyfer ymgymryd â'u rôl
• Cyfeiriad strategol gan gynnwys dyrannu asedau lefel uchel
• Ystyried dyrannu asedau strategol tymor hir ac unrhyw faterion eraill sy'n ymwneud â buddsoddi
• Penderfynu ar ddyraniad tactegol asedau (wedi'i bennu o fewn dyraniad strategol asedau lefel uchel)
• Datganiad o Egwyddorion Buddsoddi
• Dewis buddsoddiadau uniongyrchol (gweler isod)
• Monitro rheolwyr buddsoddi'r Cynllun, gan gynnwys monitro eu perfformiad a risg yn erbyn meincnodau cytunedig.
• Penodi a diswyddo rheolwyr buddsoddi, gwarcheidwad a chynghorwyr buddsoddi
• Penderfynu ar feincnodau perfformiad a chanllawiau buddsoddi i'w pennu ar gyfer rheolwyr buddsoddi ac unrhyw warcheidwad
• Gwneud penderfyniadau parhaus sy'n berthnasol i egwyddorion gweithredol strategaeth fuddsoddi'r Cynllun
• Yn dilyn arweiniad a chyngor gan Aon a chan ystyried Datganiad o Egwyddorion Buddsoddi'r Cynllun, mynd i'r afael â materion cydymffurfiaeth sy'n ymwneud â buddsoddi

Cynghorwyr Buddsoddi

• Cynghori ar addasrwydd y strategaeth fuddsoddi gyffredinol a'i gweithrediad
• Cynghori ar fuddsoddiadau uniongyrchol
• Cynghori ar gynnwys y datganiad hwn
• Darparu hyfforddiant gofynnol

Rheolwyr Cronfa

• Gweithredu yn unol â thelerau'r datganiad hwn a'u contractau ysgrifenedig
• Dewis buddsoddiadau unigol yn ôl eu haddasrwydd ac amrywiaeth
• Cynghori'r Ymddiriedolwyr ar addasrwydd y mynegeion yn ei feincnod

Mae Deddf Pensiynau 1995 yn gwahaniaethu rhwng buddsoddiadau lle dirprwyir rheolaeth i reolwr cronfa â chontract ysgrifenedig a'r rhai lle caiff cynnyrch ei brynu'n uniongyrchol, e.e. prynu polisi yswiriant neu unedau o fewn cyfrwng a rennir. Gelwir y rhai olaf yn fuddsoddiadau uniongyrchol

Polisi'r Ymddiriedolwyr yw adolygu eu buddsoddiadau uniongyrchol a cheisio cyngor ysgrifenedig arnynt yn rheolaidd. Mae'r rhain yn cynnwys y cronfeydd a rennir y mae'r Cynllun yn eu defnyddio i fuddsoddi gyda'i reolwyr cronfa a'r cyfryngau sydd ar gael ar gyfer Cyfraniadau Ychwanegol Gwirfoddol aelodau. Wrth benderfynu a ddylid gwneud unrhyw fuddsoddiadau uniongyrchol newydd ai peidio, bydd yr Ymddiriedolwyr yn ceisio cyngor ysgrifenedig ac yn ystyried a ddylid dirprwyo penderfyniadau am y buddsoddiadau hynny i'r rheolwyr cronfa yn y dyfodol. Bydd y cyngor ysgrifenedig yn ystyried y materion a amlinellir yn Rheoliadau Cynlluniau Pensiwn Galwedigaethol (Buddsoddi) 2005 a'r egwyddorion yn y datganiad hwn. Yn ôl y rheoliadau, rhaid i'r holl fuddsoddiadau gael eu hystyried gan yr Ymddiriedolwyr (neu gan y rheolwyr cronfa os yw'r cyfrifoldeb wedi'i ddirprwyo) yn erbyn y meini prawf canlynol:

• Buddiannau gorau ei aelodau a'r buddiolwyr
• Diogelwch
• Ansawdd
• Hylifedd
• Proffidioldeb
• Natur a hyd rhwymedigaethau
• Addasrwydd i'w masnachu ar farchnadoedd a reoleiddir
• Amrywiaeth
• Defnydd o ddeilliadau

Mae gan gynghorydd buddsoddi'r Ymddiriedolwyr yr wybodaeth a'r profiad sy'n ofynnol yn ôl Deddf Pensiynau 1995.

Mae'r Ymddiriedolwyr yn disgwyl i'r rheolwyr cronfa reoli'r asedau a ddirprwyir iddynt yn unol â thelerau eu contractau penodol ac i roi'r egwyddorion yn y datganiad hwn ar waith i'r graddau y mae hynny'n rhesymol ymarferol.

Caiff rheolwyr cronfa eu talu ar sail ffi ad valorem, gyda'r mandadau Cronfa Ragfantoli a Bond Adenillion Absoliwt yn cynnwys elfen am ffi perfformiad. Dewiswyd y strwythur hwn i sicrhau bod buddiannau'r rheolwyr cronfa'n gyson â rhai'r Cynllun.

Yn ogystal, mae'r rheolwyr cronfa'n talu comisiwn i drydydd partïon ar lawer o'r trafodion masnachu maent yn ymgymryd â nhw wrth reoli'r asedau ac maent yn mynd i gostau ad hoc eraill hefyd.

Mae'r Ymddiriedolwyr wedi buddsoddi eu hasedau drwy gronfeydd a rennir. Mae rheolwyr y cronfeydd hyn wedi penodi eu gwarcheidwaid eu hunain. Rôl y gwarcheidwaid yw diogelu holl asedau'r gronfa a chyflawni'r dyletswyddau gweinyddol cysylltiedig, megis casglu llog a'r difidendau ac ymdrin â gweithredoedd corfforaethol.

Bydd yr Ymddiriedolwyr yn adolygu'r Datganiad o Egwyddorion Buddsoddi hwn o leiaf bob tair blynedd ac yn ddi-oed yn dilyn unrhyw newid o bwys yn y polisi buddsoddi. Bydd yr Ymddiriedolwyr yn derbyn cyngor ar fuddsoddi ac yn ymgynghori â'r Cyflogwr Noddi ynghylch unrhyw newidiadau i'r Datganiad o Egwyddorion Buddsoddi.