Cwestiynau Cyffredin i Rieni

Gan amlaf, rydym yn argymell dechrau ymchwil prifysgol o gwmpas y Gwanwyn, cyn y gellir cyflwyno ceisiadau i UCAS rhwng Medi - Ionawr ar gyfer y flwyddyn academaidd ganlynol.

Mae ein canllaw i wneud cais yn cynnig arweiniad cam wrth gam ar gyfer pob cam o’r broses ymgeisio ynghyd â dyddiadau allweddol. Mae gennym hefyd nifer o dudalennau gwe lle gall eich plentyn ddod o hyd i gefnogaeth cais UCAS a datganiad personol.

Mae Prifysgol Abertawe yn rhestru gofynion mynediad cyrsiau ar sail canlyniadau Safon Uwch, ond rydym hefyd yn derbyn cymwysterau eraill megis BTEC a’r Fagloriaeth Ryngwladol. Mae rhestr lawn ar gael yn ein prosbectws. Mae rhai cynlluniau gradd yn gofyn am bynciau Safon Uwch penodol a bydd y manylion hyn ar gael ar dudalennau’r cyrsiau hynny ar ein gwefan ac yn ein prosbectws.

Does dim rhwymedigaeth gyfreithiol i gyfrannu o gwbl; fodd bynnag, bydd Cyllid Myfyrwyr yn ystyried incwm yr aelwyd wrth gyfrifo hawl i grantiau a benthyciadau a’r cyfraniad tybiedig. Mae rhai rhieni’n dewis talu tuag at ffioedd dysgu, ac mae eraill yn helpu gyda rhent/llety neu’n talu swm penodol bob mis i gyfrif banc y myfyriwr er mwyn cynorthwyo gyda chostau byw pob dydd. Gallwch ddod o hyd i ragor o wybodaeth ar ein tudalennau Cyllid ac Ariannu i rieni. 

Bydd y ffioedd dysgu yn dibynnu a yw eich plentyn yn fyfyriwr yn y DU neu'n fyfyriwr rhyngwladol. Yn y DU mae llawer o gymorth ariannol ar gael trwy'r gwahanol wefannau cyllid myfyrwyr i helpu'ch plentyn i sicrhau ei le Addysg Uwch. Ceir manylion llawn gan gynnwys benthyciadau ffioedd dysgu a benthyciadau cynhaliaeth yn ein hadran gyllid.

Gall gwariant amrywio, gan ddibynnu ar y lleoliad a dewisiadau ffordd o fyw. Mae gwariant wythnosol arferol yn cynnwys gwariant ar ben costau llety a biliau, megis bwyd, deunyddiau personol a deunyddiau astudio, ac mae’r myfyriwr nodweddiadol yn gwario tua £100 yr wythnos. Darllenwch gyngor UCAS am gyllidebu a rheoli cyllid myfyrwyr.

Bydd p'un a fydd eich plentyn yn cael cyfweliad ai peidio yn dibynnu ar y cwrs y mae wedi gwneud cais amdano. Os bydd angen eu cyfweld fel rhan o'r broses dderbyn, bydd yr adran berthnasol yn rhoi gwybod iddynt.

Gall cymryd blwyddyn i ffwrdd fod yn brofiad ffurfiannol i'ch plentyn. Mae interniaethau, gwirfoddoli a theithio yn ddim ond ychydig o gyfleoedd i'ch plentyn ddysgu sgiliau newydd, ennill profiad, a rhoi amser iddynt fyfyrio ar yr hyn y maent am ei wneud nesaf. Fodd bynnag, cyn i'ch plentyn ohirio'u mynediad, dylent ystyried pam eu bod am gymryd blwyddyn i ffwrdd a phwyso a mesur y manteision a'r anfanteision.

Mae Prifysgol Abertawe'n hapus i ystyried ceisiadau am ohirio mynediad ar gyfer y rhan fwyaf o gyrsiau, ond cysylltwch â'r tîm derbyn cyn gynted â phosibl. Yn anffodus, ni allwn ganiatáu gohirio’r MBBCH mewn Meddygaeth, y BMid mewn Bydwreigiaeth, a’r BN mewn Nyrsio Plant oherwydd y nifer cyfyngedig o leoedd a chystadleuaeth ddwys ar gyfer y cyrsiau hyn.

Adolygir ceisiadau fesul achos. Byddem yn cynghori eich plentyn i ddechrau gwirio UCAS yn gyntaf - mae’n bosib ei fod eisoes wedi cael ei dderbyn. Os nad oes unrhyw benderfyniad clir, dylai wirio ei negeseuon e-bost - mae’n bosib bod cwrs gwahanol wedi cael ei gynnig. Os nad oes unrhyw arwydd bod penderfyniad wedi’i wneud o hyd, dylai gysylltu â’r Tîm Derbyn.

Os nad yw eich plentyn wedi cael lle Prifysgol, heb gael y graddau disgwyliedig ar ddiwrnod canlyniadau Lefel A, neu wedi gwneud yn well na'r disgwyl, mae modd iddynt wneud cais Clirio. Proses UCAS yw Clirio sy'n cysylltu ymgeiswyr â llefydd gwag ar gyrsiau. Mae ein tudalen Cyngor am Glirio i Rieni a Gwarcheidwaid yn esbonio'r broses gyfan i chi. 

Rydyn ni'n gwybod bod eich plentyn yn byw oddi cartref yn gallu bod yn frawychus, ond mae gan Brifysgol Abertawe ddigonedd o opsiynau i wneud iddyn nhw deimlo'n gartrefol!

Mae Prifysgol Abertawe yn cynnig amrywiaeth o lety myfyrwyr ar draws pedwar lleoliad, gydag ardaloedd dynodedig yn cynnwys tawel, un rhyw, di-alcohol, aeddfed a Chymraeg.

Mae criw diogelwch ar y campws 24 awr y diwrnod a hefyd rhwydwaith cymorth pwrpasol sy'n gallu cynnig cymorth a chyngor.

Mae llety wedi’i warantu os gwneir ceisiadau cyn 30 Mehefin ac ni fydd angen talu dim ymlaen llaw. Dim ond os yw lle eich plentyn wedi'i gadarnhau a'i fod yn dymuno derbyn y cynnig llety y bydd angen blaendal.

Mae dechrau yn y brifysgol yn amser cyffrous i'ch plentyn, ond gall y straen o wybod beth sydd ei angen fod yn llethol. Edrychwch ar ein rhestr wirio ar gyfer cyrraedd i gael arweiniad ar yr hyn y bydd angen iddynt ddod gyda nhw.

Mae Prifysgol Abertawe’n ymrwymedig i ddarparu amgylchedd dysgu a chymdeithasol diogel ar gyfer ei myfyrwyr. Yn ogystal â staff diogelwch 24 awr, mae ein Wardeniaid Lles, a Chynorthwyydd Bywyd Preswyl, ar gael i gynnig cymorth bugeiliol. Hefyd, mae Swyddogion yr Heddlu a Swyddogion Cymorth Cymunedol yr Heddlu (PCSOs) ar ddyletswydd ar Gampws Parc Singleton a Champws y Bae.

Er mwyn sicrhau bod holl fyfyrwyr Prifysgol Abertawe yn cael cyfleoedd dysgu cyfartal, mae'r Tîm Cymorth i Fyfyrwyr wedi'i greu i gynnig cyngor arbenigol, arweiniad a dewisiadau cymorth i fyfyrwyr. Mae’r gwasanaethau ar gyfer myfyrwyr sy’n profi anawsterau emosiynol a phersonol, yn ogystal â materion hirdymor mwy cymhleth gan gynnwys namau synhwyraidd neu gorfforol, cyflyrau meddygol hirdymor, anawsterau dysgu penodol (SpLD), cyflyrau ar y sbectrwm awtistig (ASC) a chyflyrau iechyd meddwl. Dysgwch fwy o'r dudalen cymorth i rieni a gwarcheidwaid.

Un o’r pryderon mwyaf i rieni a gwarcheidwaid yw a fydd eu plentyn yn setlo, yn gwneud ffrindiau ac yn ffitio i fywyd prifysgol. Ym Mhrifysgol Abertawe, mae cymuned gref o fyfyrwyr, gyda dros 150 o glybiau a chymdeithasau ynghyd â chlybiau a chymdeithasau cyfrwng Cymraeg. Bydd ymuno yn ffordd wych i’ch plentyn gwrdd â phobl o’r un anian a gwneud ffrindiau newydd, ac os na allant ddod o hyd i’r gymdeithas berffaith mae llawer o gyfleoedd iddynt ddechrau eu cymdeithas eu hunain.

Yn ystod Wythnos y Glas anogir myfyrwyr i fynychu Ffair y Glas ar y campws a chymryd rhan ym mywyd myfyrwyr, mae hwn yn gyfle gwych i ddechrau cyfarfod â phobl a darganfod popeth sydd gan Brifysgol Abertawe i’w gynnig! Bydd Swyddogion Undeb y Myfyrwyr wrth law drwy’r amser i ateb cwestiynau a helpu myfyrwyr newydd i ymgartrefu.

Pwrpas Bywyd Campws Prifysgol Abertawe yw helpu myfyrwyr i gyrraedd eu potensial yn yn Brifysgol.

Mae timau arbenigol yn cynnig cefnogaeth cyfrinachol rhad ac am ddim i fyfyrwyr ar feysydd amrywiol:

• Cymuned
• Ffydd
• LHDT+
• Arian
• Cyfranogiad
• Llesiant

Yn ogystal â rhain, mae'r Tîm Gwasanaethau Myfyrwyr yn cynnig cyngor ac arweiniad arbenigol i unigolion os ydynt yn profi anhawsterau yn ystod eu hamser yn y Brifysgol, gan gynnwys anhawsterau personol ac emosiynol ynghyd â chyflyrrau meddygol ac iechyd meddwl hir dymor.

Mae Academi Cyflogadwyedd Abertawe (SEA) yn wasanaeth rhad ac am ddim i bob myfyriwr Prifysgol Abertawe yn ystod eu hastudiaethau ac ar ôl graddio. 

Mae tîm ymroddedig yr Academi Gyflogadwyedd yn darparu cyfle i fyfyrwyr i ymgysylltu â phartneriaid o ddiwydiant ac i gymryd cyfleoedd lleoliad neu brofiad gwaith fel eu bod yn barod am y gweithle pan fyddant yn graddio. 

Mae SEA yn darparu cefnogaeth eang gan gynnwys:

• Cyfleoedd am leoliad gwaith
• Ffeiri Gyrfaoedd
• Gweithdai ysgrifennu CV

Mae nifer o gynghorwyr gyrfaoedd ar gael i gynnig y cefnogaeth sydd angen. Cysylltwch â SEA am ragor o wybodaeth.  

Mae gan Barc Singleton a Champws y Bae lwybrau cerdded a beicio rhagorol o ganol y ddinas a all fod yn wych ar gyfer iechyd a lles. Fodd bynnag, pan nad yw hyn yn bosibl mae'r Brifysgol yn hyrwyddo trafnidiaeth gyhoeddus fel opsiwn teithio cynaliadwy a fforddiadwy. Mae rhwydwaith UniBus, a weithredir gan First Cymru, yn cysylltu dau gampws Prifysgol Abertawe; Parc Singleton a Champws y Bae, i'r preswylfeydd myfyrwyr a chanol y ddinas. Mae'r gwasanaeth yn rhedeg bob 30 munud ac yn gweithredu 24 awr y dydd (Llun-Sadwrn) yn ystod y tymor.

I’r rhai sy’n dymuno gyrru a pharcio, mae opsiynau parcio talu ac arddangos cyfyngedig ar gael ger y ddau gampws, mewn rhai amgylchiadau, gall myfyrwyr fod yn gymwys i gael trwydded barcio ar y campws.