Trosolwg o'r Cwrs
Bydd ein gradd Nyrsio Oedolion, sydd wedi’i chydnabod yn rhyngwladol, yn rhoi’r sgiliau a’r profiad i chi i ddechrau gyrfa werth chweil yn y proffesiwn amrywiol a hanfodol hwn.
Mae'r rhaglen hon yn wahanol i'n cwrs amser llawn gydag wythnos ddysgu 30 awr, cyfnodau astudio byrrach, a dull cyfunol o addysgu dan arweiniad, ar-lein ac ar y campws. Mae hyn ynghyd â mwy o wyliau blynyddol, a hyblygrwydd i reoli oriau ymarfer clinigol ar draws yr wythnos waith, sydd i gyd yn dod ynghyd i'ch helpu i gydbwyso'ch ymrwymiadau drwy gydol y rhaglen.
Dros gyfnod y rhaglen 4 blynedd hon sydd wedi'i chymeradwyo gan y Cyngor Nyrsio a Bydwreigiaeth (NMC) a'i chomisiynu gan Addysg a Gwella Iechyd Cymru (AaGIC), byddwch yn dysgu am anghenion cyfannol pobl, o oedolaeth gynnar hyd at henoed.
Wedi'i seilio ar athroniaeth gofal sy'n canolbwyntio ar y person, sy’n seiliedig ar dystiolaeth, ac yn cael ei arwain gan werthoedd, mae'r rhaglen yn pwysleisio tosturi, cynhwysiant, a phartneriaeth â phobl, teuluoedd, a chymunedau.
Mae ein cwricwlwm wedi cael ei ddatblygu i ymateb i newidiadau mewn cymdeithas a gofal iechyd, a bydd eich dysgu yn adlewyrchu disgwyliadau'r cyhoedd o'r proffesiwn nyrsio. Bydd myfyrwyr yn treulio 50% o'u hamser ar y rhaglen mewn lleoliadau clinigol a chymunedol, felly byddwch yn datblygu'r sgiliau a'r profiad i ddarparu gofal nyrsio mwy diogel, tosturiol ac effeithiol.
Mae gennym berthnasoedd rhagorol â llawer o ddarparwyr gofal iechyd, felly bydd gennych fynediad at ystod eang o leoliadau ledled de-orllewin Cymru, a gynhelir yn y GIG, a'r sector annibynnol, mewn ysbytai a lleoliadau cymunedol.
