Mae Stephanie Burgis yn byw yng Nghymru gyda'i gŵr, eu dau fab a'u cath frech, wedi'u hamgylchynu gan fynyddoedd a chestyll. Mae hi'n ysgrifennu anturiaethau ffantasi MG, ac yn fwyaf diweddar y drioleg Dragon with a Chocolate Heart a The Raven Heir. Mae byd The Raven Heir (a'r llyfr dilynol sydd ar ddod, The Raven Throne) wedi'i ysbrydoli'n uniongyrchol gan dirwedd Cymru a'r hanes y tu ôl iddi, gydag ardaloedd lleol megis coetiroedd Coed Cefn a Chastell Rhaglan yn helpu i greu'r ysbrydoliaeth am y tiroedd chwedlonol sy'n cael eu harchwilio yn y ddwy nofel ffantasi
'The Raven Heir' gan Stephanie Burgis
Mae Cordelia a’i brawd a chwaer Giles a Rosalind – sy’n dri gefaill – wedi byw’n ddiogel yn y castell yng nghanol y goedwig ar hyd eu hoes, wedi’u hamddiffyn gan swynion eu mam. Yr unig dro y mae Cordelia yn teimlo’n wirioneddol rydd yw pan fydd hi’n troi’n was y neidr neu’n aderyn du ac yn hedfan y tu hwnt i’r waliau cerrig mawr. Ond un diwrnod, mae’r byd mawr tu allan yn dod atyn nhw. Mae dau ddug gelyniaethus a’u milwyr wedi dod i gipio’r tri gefaill – oherwydd mai’r hynaf o’r tri yw etifedd yr orsedd.
Ond mae eu mam yn gwybod, ers torri’r goron, nad oes neb wedi gallu rheoli teyrnas Corvenne a byw, a dydy hi ddim yn fodlon rhoi’r fath faich ar ysgwyddau yr un o’i phlant. Pan mae’n gwrthod datgelu pa blentyn yw’r hynaf, mae’n cael ei charcharu, ac mae Cordelia, Giles a Rosalind ar ffo mewn byd newydd peryglus. Wrth iddyn nhw deithio ar draws Corvenne i achub eu mam, mae Cordelia yn dechrau gweld bod hud dwys ar waith, gan ei gyrru tuag at dynged a allai rwygo ei theulu ar wahân, dwyn ei rhyddid am byth neu, efallai, iachau teyrnas sydd wedi’i dinistrio gan ryfel sy’n parhau ers cenedlaethau.
'The Raven Throne' gan Stephanie Burgis
Mae Cordelia wedi cael ei choroni’n frenhines, ond gyda’r grym newydd daw perygl newydd. Y dilyniant diguro i The Raven Heir a chyfrol glo’r gyfres ffantasi epig i ddisgyblion ysgol ganol sy’n berffaith ar gyfer selogion Abi Elphinstone a Piers Torday.
Ar ôl i’w chwaer Cordelia ddod yn frenhines, gwyddai Giles a Rosalind y byddai’n rhaid iddyn nhw ddysgu bihafio yn y llys. Dim mwy o ymladd i Rosalind a dim mwy o ganu i Giles. Ond wnaethon nhw ddim rhagweld y byddai’n rhaid iddyn nhw atal cynllwyn yn erbyn eu chwaer.
Wrth i Cordelia syrthio i gwsg hudolus na ellir ei deffro ohono, mae’n rhaid i Rosalind a Giles grwydro’r deyrnas i geisio cymorth gan eneidiau hynafol y wlad. Ond mae gelynion mwyaf y teulu yn llechu ym mhob twll a chornel, a bydd angen holl gryfderau’r tri gefaill i ymladd yn eu herbyn.
Diweddglo gwefreiddiol i’r gyfres hudolus a chyfriniol.