Rheolwr Lleoliad a Gweithrediadau Canolfan Celfyddydau Taliesin
Dywedwch ychydig wrthym am astudio yn Abertawe a beth yw eich swydd erbyn hyn.
Dw i wedi profi amrywiaeth o swyddi dros y blynyddoedd! Fy mhrif ddiddordebau yw addysg (yn ei gwahanol ffurfiau), datblygu cymunedol a rheoli prosiectau. Ers mis Ionawr, fi yw Rheolwr Lleoliad a Gweithrediadau Canolfan Celfyddydau Taliesin, reit yng nghanol Campws Singleton.
Astudiais i Ffrangeg ac Almaeneg gydag Astudiaethau Busnes a graddio yn 2001. Treuliais i flwyddyn yn teithio Awstralia a Seland Newydd wedi graddio. Bues yn casglu grawnwin, yn sortio winwns a thatws ac yn gweithio mewn ffair – jyst unrhyw beth i ’neud ychydig o bres i allu mynd mlaen i’r dalaith nesaf!
Ar ôl dod nôl i Gymru bues yn gweithio i gwmni cysylltiadau cyhoeddus yn fy nhref enedigol, Aberystwyth. Anfonodd ffrind e-bost ata i yn dweud bod prifysgol yn Llydaw yn chwilio am diwtor Cymraeg, ac roedd angen gallu siarad Ffrangeg. Felly dyma fi yn anfon fy CV a deufis yn ddiweddarach ro’n i ar gwch i St Malo! Treuliais ddwy flynedd hapus iawn yn Rennes. Un o’r uchafbwyntiau oedd trefnu taith ieithyddol a diwylliannol i Gymru i’r myfyrwyr.
Bues i wedyn yn cyfieithu am gyfnod byr i adran farchnata Prifysgol Abertawe, ac wrth fy modd yn ôl ar gampws Singleton, er ychydig yn hiraethus am fy nyddiau Coleg!
Bum yn Gydlynydd Addysg i’r elusen dai a phobl, Shelter Cymru ac yn Brif Weithredwr cyntaf Canolfan Cymry Llundain. Treuliais 8 mlynedd gyda’r Coleg Cymraeg Cenedlaethol fel Swyddog Celfyddydau a Dyniaethau ac yna fel Rheolwr Academaidd. Bues yn Uwch Reolwr ar raglen TAR y Brifysgol Agored cyn ymuno gyda Phrifysgol Abertawe ddechrau 2023.
Mae’r swydd yma yn teimlo fel fy mod wedi dod adre’!
Pam Abertawe?
Doedd dim llawer o gyfoedion o’r ysgol yn dod i Abertawe bryd hynny. Roedd y rhan fwyaf yn anelu am Fangor, Caerdydd neu’n aros yn Aber. Falle mai awydd i fod ychydig yn wahanol, ac fe dalodd ar ei ganfed! Bues i ar gwrs preswyl yn Fferm Clyne ym mlwyddyn 12 a dw i’n meddwl bod hynny hefyd wedi dylanwadu ar fy mhenderfyniad. Ro’n i jyst wrth fy modd gyda’r lleoliad a’r golygfeydd a bod rhwng y wlad, y ddinas, y môr ac ambell fynydd!
Ro’n i wir yn hoffi’r syniad o astudio tri phwnc hefyd, ac Abertawe oedd yn cynnig y cyfle hwnnw.
Soniwch ychydig am eich amser yn Abertawe a’ch hoff bethau am y Brifysgol
Cefais fodd i fyw fel myfyrwraig ym Mhrifysgol Abertawe. Fe gwympodd popeth i’w le – y cwrs, y bywyd cymdeithasol, y cyfeillgarwch, y llety a’r ddinas. Dw i’n cofio llefain y glaw ar ddiwrnod olaf y flwyddyn gyntaf, wrth sylweddoli na faswn yn gweld y gang coleg am dri mis!
Ro’n i’n aelod brwd o’r Gymdeithas Gymraeg ac yn chwarae i dîm pêl-droed y merched. Roedd y ddau beth yn golygu tripiau i brifysgolion eraill a thaith wych i Belfast yn 1998 i gynrychioli tîm pêl-droed merched Prifysgolion Cymru.
Ro’n i wrth fy modd yn gallu astudio rhan o fy nghwrs drwy gyfrwng y Gymraeg. Roedd hyn cyn dyddiau’r Coleg Cymraeg Cenedlaethol ac rwy’n ddiolchgar iawn am flaengaredd ac ymroddiad y darlithwyr wnaeth hynny’n bosib. Roedd yn deimlad hollol naturiol i drafod Ffrangeg ac Almaeneg drwy’r Gymraeg. Bues i hefyd yn ffodus o dreulio blwyddyn dramor fel rhan o’r cwrs. Profiad bythgofiadwy arall a mwy o ddagrau pan ddaeth i ben!
Mae dau gampws ym Mhrifysgol Abertawe erbyn hyn, wrth gwrs. Mae Campws y Bae yn fodern iawn ond bydd Campws Singleton bob amser yn agos iawn at fy nghalon. Dw i jyst yn teimlo’n gartrefol pan dw i yma. Mae bwrlwm ond teimlad digon hamddenol hefyd.
Mae’r ffrindiau wnes i yn y Brifysgol yn ffrindiau oes. Rydyn ni wedi rhannu rhai o brofiadau gorau’n bywydau ac wedi tyfu’n oedolion gyda’n gilydd, a hynny yn un o ardaloedd prydfertha, mwyaf bywiog ac amrywiol Cymru (yn fy marn i!).
Beth fyddech chi’n ddweud wrth rywun sy’n ystyried dod i astudio ym Mhrifysgol Abertawe?
Fy nghyngor i byddai dod i Ddiwrnod Agored Prifysgol Abertawe. Hyd yn oed os yw’r tywydd yn ddiflas, mae’r hwyliau’n dda a’r croeso’n dwymgalon. Er ei bod hi’n ddinas, mae yna agosatrwydd arbennig yn perthyn i Abertawe a dw i’n meddwl bod trigolion yn gwerthfawrogi cyfraniad myfyrwyr i ddiwylliant ac economi’r ardal.
Mae cyfleoedd di-ri drwy Gangen y Coleg Cymraeg Cenedlaethol os wyt ti am astudio drwy’r Gymraeg ac mae canolfan Tŷ Tawe yng nghanol y ddinas yn croesawu myfyrwyr sy’n siarad neu’n dysgu’r iaith i ddigwyddiadau a gweithgareddau.
Dw i wedi gadael Abertawe sawl gwaith ond dyma ble dw i wedi dychwelyd bob tro. Mae hynny yn dweud cyfrolau. Dw i’n ystyried fy hun yn hanner Cardi ac hanner Jac erbyn hyn. Dw i’n teimlo’n ffodus iawn o fod wedi ymgartrefu a chael swydd dw i’n ei mwynhau mewn dinas a phrifysgol sy’n golygu cymaint i fi. Dw i’n aelod balch iawn o gymuned cyn-fyfyrwyr Prifysgol Abertawe ac yn gobeithio gallu cyfrannu mwy at ymgyrchoedd i ddenu a chefnogi myfyrwyr, yn y gobaith y byddan nhw hefyd yn mwynhau’r profiadau unigryw y gwnes i chwarter canrif yn ôl fel myfyrwraig, ac yn parhau i wneud heddiw fel aelod o staff.
